Ljósmæðrablaðið - 01.07.2010, Side 4
4 Ljósmæðrablaðið - júlí 2010
Nú er sumar á eyjunni okkar grænu og
landið skartar sínum fegursta búningi.
Lund langflestra léttist mikið með
björtum sumarnóttum og lífið verður
að flestu leiti auðveldara á einhvern
hátt. Ljósmæður, eins og aðrir, taka sín
sumarfrí og þá er gott og gaman að geta
litið í og lesið Ljósmæðrablaðið sem er
nú, sem fyrr, fullt af góðum greinum. En
ekki fara allir í frí og þeir sem standa vörð
um heilbrigðisþjónustuna hafa ekki kost
á því að fara af vaktinni. Í síðustu pistlum
mínum hef ég komið inn á umfjöllun um
niðurskurð, kreppu og svo til endalausar
aðhaldsaðgerðir stjórnvalda og finnst
manni á hverjum tíma að lengra verði
ekki gengið í sparnaði án þess að öryggi
skjólstæðinga verði skert. Löngum hefur
því verið haldið fram að þær sparnaðar-
aðgerðir sem hafa komið til framkvæmda
eigi ekki að skerða þjónustu við skjól-
stæðinga en nú er svo komið að það er
eins og að stinga höfðinu í sandinn að
líta framhjá þeirri þjónustuskerðingu sem
orðin er. Nú verðum við að leggja kapp
okkar á að standa vörð um öryggi skjól-
stæðinga okkar og þar liggur Ljósmæðra-
félagið ekki á liði sínu. Mikið starf er
í gangi á vegum félagsins varðandi
stefnumótun, könnun á heimaþjónustu
við sængurkonur og margt fleira. Það
er ósk mín að þessi vinna komi til með
að skila þeim árangri sem vonast er til,
þ.e. að leiða það enn á ný í ljós að störf
ljósmæðra og þjónusta þeirra er skilvirk
og þjóðfélaginu ódýr. Enn á ný kemur
styrkur félagsins þannig í ljós með óeig-
ingjarnri vinnu félagsmanna.
Á síðum þessa tölublaðs birtist fyrri
grein Ástþóru Kristinsdóttur og Sigríðar
Halldórsdóttur um ofbeldi, ótta og kvíða
kvenna á meðgöngu. Við lestur grein-
arinnar birtist manni heimur sem flestum
er hulinn og í þessum heimi eru ekki
bjartar sumarnætur.
Anna Sigríður Vernharðsdóttir er
höfundur greinar um notkun ilmkjarnaolía
í fæðingu. Einhverra hluta vegna
hefur notkun þeirra ekki náð almennri
útbreiðslu og er það án efa að einhverju
marki þekkingarleysi um að kenna og
mögulega hræðslu við hið óþekkta. Það
er von okkar að með þessari umfjöllun
verði ljósmæður opnari fyrir því að nota
þessa tækni.
Íslenskar ljósmæður hafa í gegnum
tíðina verið duglegar að hleypa heim-
dragann og kynnst í heimsóknum sínum
ólíkum háttum miðað við þá sem við
búum við. Það er alltaf ómetanlegt þegar
þær ljósmæður eru tilbúnar til að deila
þeirri reynslu með okkur sem heima
sitjum og verðum við fróðari fyrir vikið.
Á síðum Ljósmæðrablaðsins nú birtast
frásagnir frá starfi íslenskra ljósmæðra
í Nuuk á Grænlandi og heimsókn ljós-
móðurnema á fæðingarspítala í Nairobi
í Kenía. Ólíkara getur það varla verið. Í
blaðinu er einnig grein ljósmóðurnema
um brjóstagjöf asískra kvenna og má
því segja að fjölþjóðlegur blær sé yfir
blaðinu. Þegar við kynnumst menningu
annarra þjóða og skynjum viðhorf þeirra
til fæðinga og barneignarferlisins er
óhætt að segja að við verðum ríkari fyrir
vikið og ættum að eiga auðveldara með
að leggja línurnar varðandi þá stefnumót-
unarvinnu sem stöðugt er í gangi varð-
andi barneignarþjónustu á Íslandi.
En þó svo að sögur annarra af
heimsóknum á framandi slóðir séu alltaf
til gagns og gamans er fátt sem kemur
í stað menntunar. Í blaðinu kemur fram
að enn á ný standa fyrir dyrum breyt-
ingar á námskrá í ljósmóðurfræði og er
nú stefnt að því að breyta inntöluskil-
yrðum og skipuleggja 5 ára nám strax að
loknu stúdentsprófi. Óneitanlega hljómar
það vel að vegurinn frá stúdentsprófi
að ljósmæðraleyfinu verði styttur og
verður vonandi til þess að styrkja námið
og þann góða þekkingargrunn sem er
forsenda þess að ljósmóðurþjónusta eflist
í samfélaginu. Einnig er hægt að lesa um
stafsnám til sérfræðiviðukenningar sem
hefur staðið til boða á Landspítalanum í
tæp tvö ár. Mun það án efa vera til þess
fallið að styrkja ljósmæður og renna enn
styrkari stoðum undir sjálfstæði stétt-
arinnar.
Nú, þegar lengsti dagur ársins er liðinn
fara dagarnir að styttast á ný og áður en
við vitum af gengur haustið í garð með
litríkum laufum á trjánum, skólum sem
iða á ný af lífi og öðru því sem einkennir
haustið. Fram að því er öllum gott að njóta
íslenska sumarsins. Koma í huganna orð
skáldsins Guðmundar Guðmundssonar
sem hann orti um íslenska sumarið; „Seg
mér hvað indælla auga þitt leit, íslenska
kvöldinu’ í fallegri sveit.“ .
Ég vona að þið njótið þessa tölublaðs
Ljósmæðrablaðsins og sendi ljósmæðrum
öllum mínar bestu sumarkveðjur.
Bergrún Svava Jónsdóttir
ritstjóri Ljósmæðrablaðsins
Ritstjórapistill