Ljósmæðrablaðið - 01.07.2010, Blaðsíða 38

38 Ljósmæðrablaðið - júlí 2010
Árið hefur verið viðburðarríkt í lífi ljós-
mæðranema að venju. Þar ber hæst að haldin
var glæsileg árshátíð innan deildarinnar. Þar
komu saman ljósmæðranemar ásamt kenn-
urum, sem eyddu lunganu úr kvöldinu sitjandi
settlegar undir hátíðlegu borðhaldi. Skemmti-
atriði voru í höndum fagmanna og bar þar
hæst kynning á sprotafyrirtæki ljósmæðranema
en rómur þess hefur þegar farið víða - þrátt
fyrir stuttan starfsaldur. Einnig var flutt sagan
„Heldrikvennahöfgi” sem byggð var á sönnum
atburðum sem áttu sér stað norðan heiða.
Víkjum nú að öðrum málum. Í gegnum
árin hefur verið virkt net til alþjóðasamskipta,
Nordplus net, en þar hefur nemendum gefist
færi á að fara í skiptinám sækist þeir eftir því.
Undanfarið hafa einnig verið haldnar ráðstefnur
á vegum netsins þar sem nemendur frá Norður-
og Eystrasaltslöndunum koma saman ásamt
kennurum og leiðbeinendum. Undirritaðar fengu
tækifæri til að fara á eina slíka á vordögum en þar
voru kynnt ýmis áhugaverð efni.
Á ráðstefnunni, sem að þessu sinni var haldin
í Kaupmannahöfn og bar heitið „Empowering
Midwifery Students and Young Midwives of the
North“ voru nokkrir frábærir fyrirlesarar. Ólöf
Ásta Ólafsdóttir kynnti doktorsritgerð sína og
Guðrún Sigríður Ólafsdóttir ljósmóðir fjallaði
um hlutverk leiðbeinanda í verklegu námi. Jette
Aaroe Clausen hélt fyrirlestur sem byggður var
á óbirtri doktorsritgerð hennar og bar heitið
„What happens when a call for evidence meets
diverse listening practices in antenatal care?“.
Þar ræddi hún um tækni í víðum skilningi og
gerði það með þeim hætti að áhugi okkar var
vakinn. Svo mikið þótti okkur til erindis hennar
koma að við hvetjum alla til að hafa augun opin
og kynna sér skrif þessarar ljósmóður þegar
að birtingu ritgerðar hennar kemur. Þá hélt
Elisabeth Crang-Svalenius erindi um notkun
tækni í barneignarferlinu og misnotkun hennar
en Elisabeth hefur lengst af starfað við sónar-
skoðanir. Sara Kindberg ljósmóðir kynnti rann-
sóknir sínar á saumaskap eftir fæðingar. Í dokt-
orsritgerð hennar rannsakaði hún starfshætti
ljósmæðra við saumaskap og opnaði í kjölfarið
heimasíðu í samstarfi við annað heilbrigð-
ismenntað fagfólk. Heimasíðuna er að finna á
http://www.gynzone.dk en þar er meðal annars
kennt hvernig greina eigi rifur og rannsóknir
lagðar til grundvallar fyrir því hvernig best sé
að bera sig að. Seld er áskrift að þessari síðu og
teljum við það nokkuð sem stærstu sjúkrahús
landsins ættu að íhuga kaup á. Ljóst er að þarna
er um að ræða gríðarlega gagnlega síðu, bæði
fyrir nema sem og annað starfsfólk sem starfar á
sviði fæðinga- og kvensjúkdóma.
F.h. Oddrúnar
Lilja Þórunn Þorgeirsdóttir, formaður
Ásrún Ösp Jónsdóttir, varaformaður
Oddrún - Félag ljósmæðranema
Ingibjörg Ýr og Anna María með brjóstakökur sem bakaðar voru fyrir tíma.
Hlín og Eva Rut í saumakennslu.Jette Aaroe Clausen