Ljósmæðrablaðið - 01.07.2015, Blaðsíða 6

6 Ljósmæðrablaðið - júlí 2015
Ég held að ég geti sagt með algjörri vissu
að þessi vetur mun seint líða mér úr minni
fyrir margra hluta sakir. Efst í huga mér er
kjarabarátta félagsins ásamt félögum okkar
í BHM. Atkvæðagreiðsla um verkfall var
samþykkt af 80% félagsmanna okkar en
þó voru skoðanir mjög skiptar um hvernig
best væri að sækja fram. Ekki voru allir á
eitt sáttir í upphafi og töluvert var tekist á
enda „eru ljósmæður töffarar“ svo vitnað sé í
samninganefnd ríkisins. Það gleður mig samt
að segja að eftir því sem vikurnar liðu fór
samstaða vaxandi, félagsmenn urðu jákvæðari
í tali, mættu betur á fundi og stóðu mjög vel
við bakið á kjaranefnd og formanni og er það
ómetanlegt.
Þegar þetta er skrifað er enn ósamið við
ríkið og ekki komin niðurstaða úr félagsdómi
varðandi launafrádrátt ljósmæðra. Það er þó
farið að hilla undir samninga og þá tekur við líf
að loknu verkfalli.
Eftir átök sem hafa staðið í þetta langan tíma getur verið erfitt
að byggja upp traust að nýju. Ég hef heyrt margar ljósmæður tala
um vonbrigði sín með vinnustaðinn og finnst bæði virðingarleysi
og ósanngirni hafa komið fram af hálfu spítalans. Til að byggja
aftur upp góðan vinnuanda og þar með gott
og faglegt starf þá er mikilvægt að sættast við
vinnuveitandann og horfa fram á veginn, það
sama gildir um innra starf félagsins. Það verða
aldrei allir alveg á eitt sáttir með samninga
eða framkvæmd kjarabaráttunnar en það er
mikilvægt að halda áfram samstöðu og vinna
að framgangi fagsins og félagsins.
Mörg verkefni hafa verið sett á bið innan
félagsins þar sem gríðarlegur tími hefur farið í
kjaramál undanfarin tvö ár. Það er mikið verk
óunnið og af nægu að taka. Eitt af því sem mér
þykir aðkallandi er að félagið móti sér stefnu
í þeim málum sem heitast brenna á faginu.
Ljósmæður eru fáar og félagið lítið. Því er hver
einstakur félagsmaður enn dýrmætari og hefur
meira vægi. Meira mæðir á hverri ljósmóður
að standa vörð um stéttina og fagið heldur en
félagsmönnum stærri félaga.
Mig langar til að nota þetta tækifæri og þakka
öllum þeim ljósmæðrum sem hafa sýnt kjarabaráttu okkar stuðning
sinn bæði í verki og orðum, og eins og áður hefur komið fram þá er
það ómetanlegt. Það er von mín að allar ljósmæður og fjölskyldur
þeirra njóti sumarsins og komi fullar af eldmóði og úthvíldar næsta
haust – tilbúnar í þá slagi sem taka þarf í framtíðinni.
Áslaug Valsdóttir
formaður Ljósmæðrafélags Íslands
Ljósmæður eru töffarar
Á V A R P F O R M A N N S L M F Í