Skessuhorn - 11.04.2017, Blaðsíða 19

ÞRIÐJUDAGUR 11. APRÍL 2017 19
Svifnökkvar hafa fram til þessa ekki
verið þekktir hér á landi nema í
gegnum bíómyndir. Nú er hins veg-
ar búið að stofna fyrirtækið Íslands-
nökkva sem er að hefja innflutning
á fyrstu svifnökkvunum hingað til
lands. Fyrirtækið er komið í sam-
starf við stærsta framleiðanda svif-
nökkva í Evrópu; British Hovercraft
Company og er að hefja innflutning,
kynningu og þjónustu á svifnökkv-
um hér á landi. Tæki þessi eru knúin
með bensínmótor en stór vifta knýr
nökkvann áfram og blæs lofti undir
hann í gegnum gúmmíhulsur sem
tækið flýtur svo á. Tækið er byggt
á skel úr glertrefjaefni sem ekki get-
ur sokkið og auk þess sérstyrkt með
flotplasti við skut. Mengun og áhrif
á umhverfið er lítil sem engin, ef frá
er talinn hvinur frá viftu sem þó er
innan við heilsuverndarmörk þeg-
ar staðir er nærri tækinu. Þá hyggst
eigandi Íslandsnökkva bjóða ferða-
fólki upp á skemmri og lengri ferð-
ir meðal annars á Pollinum á Akur-
eyri, þar sem er heimili fyrirtækisins
og eigandans er.
Eigandi Íslandsnökkva er Arin-
björns Kúld. Hann er Skagamaður
að uppruna en hefur búið og starfað
á Akureyri eftir að hann lauk prófi
í viðskiptafræði frá Háskólanum á
Bifröst skömmu fyrir aldamótin. Ar-
inbjörn starfaði um árabil hjá Neyð-
arlínunni en hjá Becromal á Akur-
eyri síðustu þrjú árin. Arinbjörn seg-
ir í samtali við Skessuhorn að fyrsti
svifnökkvinn sé nú í framleiðslu og á
leið til landsins síðar í þessum mán-
uði. Hann verður frumsýndur á Ak-
ureyri en hér sunnan heiða verður
sami nökkvi fyrst sýndur á Stórsýn-
ingu Rafta og Fornbílafjelags Borg-
arfjarðar í Brákarey 13. maí.
Greint á um
hvort beri toll
Arinbjörn segir að hann hafi verið
búinn að skoða og kynna sér þessi
tæki í þrjú ár þegar hann ákvað að
fara utan og heimsækja verksmiðj-
una í Bretlandi, kynna sér tækin í
þaula og afla sér einkaleyfis hér á
landi. „Ég hreifst algjörlega af þess-
um tækjum fyrir margra hluta sakir.
Þau sameina í eitt marga af kostum
þeirra tækja sem við þekkjum á landi
og sjó. Á svifnökkva getur þú ferðast
um hvort heldur sem er á vatni, sjó,
sandi eða farið um mýrar sem ekki
eru tækar öðrum ökutækjum eða
bátum. Þá opnast með svifnökkv-
um ný veröld til dæmis á leirum
sem ekki eru manngengar eða fær-
ar öðrum tækjum eða bátum. Þetta
er í raun eitthvað sem er svo nýtt hér
á landi að mönnum greinir meira
að segja á um í hvaða tollaflokk þau
skulu skilgreind. Samgöngustofa vill
meina að þetta sé sjó- og vatnafar en
slík tæki bera ekki tolla. Tollstjóra-
embættið hins vegar heldur því fram
að þetta sé vélknúið ökutæki sem
skilgreina þurfi sem ökutæki og þar
með falla undir 30% toll. Reyndin
er hins vegar sú að farartæki af þess-
um toga hafa hvergi verið skilgreind
í lögum eða reglugerðum. Af þeim
sökum get ég með engu móti sagt
til um hvert útsöluverð fyrstu svif-
nökkvanna verður, en ég er að vinna
í málinu með tollayfirvöldum,“ seg-
ir Arinbjörn.
Smærri svifnökkvar eru hugsað-
ir fyrir tvo til þrjá en einnig eru til
stærri nökkvar sem taka fleiri far-
þega, allt upp í sex manns. Ef tæk-
in bera toll eins og ökutæki segist
Arinbjörn gera ráð fyrir að verðið
fyrir litla svifnökkva gæti orðið 4-5
milljónir króna, en 3-4 milljónir ef
þeir verða skilgreindir sem sjó- og
vatnaför, líkt og bátar. Einföld bíl-
kerra er notuð til að flytja svifnökkva
milli staða, en ekki er æskilegt fyr-
ir gúmmíin að þeim sé mikið „ekið“
eða „svifið“ um vegi eða á grýttri
jörð.
Opna nýjar víddir
og tækifæri
Arinbjörn kveðst renna blint í sjóinn
með innflutning og sölu á tækjun-
um, hann hafi hvergi kynnt væntan-
legan innflutning í fjölmiðlum fyrr
en nú í Skessuhorni. „Ég verð sífellt
sannfærðari um að svifnökkvar eiga
eftir að slá í gegn hér á landi. Þessi
tæki sameina kosti svo margra tækja,
svo sem báta, fjórhjóla, vélsleða og
fleira. Verðið er á pari við verð fyr-
ir þokkalegan vélsleða en notagildið
margfalt meira og þessi tæki er hægt
að nota allan ársins hring,“ segir Ar-
inbjörn.
„Það hefur orðið mikil framþró-
un í smíði svifnökkva, hönnun og
notkunarmöguleikum. Raunar má
fullyrða að um byltingu sé að ræða.
Þeir eru nú framleiddir úr glertrefja-
plasti, sama efni og er í smábátum
hér á landi. Þeir eru léttir, vega að-
eins frá 130 kg og upp í 600 kg þeir
stærstu. Svifnökkvarnir eru smíðaðir
í nokkrum stærðum og útfærslum,
allt frá eins og upp í sex manna, allt
frá skemmtinökkva og upp í atvinnu-
tæki svo sem til leitar- og björgunar.
Svifnökkvar opna okkur Íslending-
um leiðir að svæðum þar sem önn-
ur farartæki komast illa eða alls ekki
um. Skiptir þá engu máli hvort um
strendur landsins er að ræða, mýr-
lendi, votlendi, árósa, vötn, vatna-
svæði, ár, leirur og jafnvel sjálft há-
lendið og vatnasvæði þess. Jafnvel
viðkvæm gróðursvæði þar sem öll
umferð hjólatækja er bönnuð þar fer
svifnökki um án þess að valda nein-
um skemmdum og mun því auð-
velda rannsóknir á þeim svæðum og
eftirlit.“ Arinbjörn bætir við: „Notk-
un nökkvanna fer vaxandi um all-
an heim og vinsældir þeirra aukast
stöðugt. Það eina sem takmarkar
nokkun þeirra hér á Íslandi er skort-
ur á ímyndunarafli.“
Býður í ferðir
á Pollinum
Sjálfur segist hann ætla að kynna
svifnökkvann á Pollinum á Akur-
eyri og bjóða upp á ferðir inni á leir-
unum. „Svo er stefnan sett á sýn-
inguna í Borgarnesi 13. maí og eiga
áhugasamir þá kost á að fara í pru-
futúr með mér. Hann hvetur for-
svarsmenn björgunarsveita, veiði-
menn og allt áhugafólk um spenn-
andi tæki og tól til að mæta á kynn-
inguna í Borgarnesi.
mm
Fyrstu svifnökkvarnir á leið til landsins
Fyrirtækið Íslandsnökkvar hefur innflutning og sölu - kynning í Borgarnesi 13. maí
Svifnökkvi sömu gerðar og Íslandsnökkvar hafa nú pantað hingað til lands. Við kaldar strendur landsins getur verið hagstætt að hafa yfirbyggða nökkva líkt
og björgunarsveitir erlendis hafa víða tekið í notkun. Tækin þola talsverða ágjöf,
öldugang og vind, þurfa ekki bryggju eða önnur mannvirki en dugar strönd eða
aðliggjandi bílgengt svæði.
Svipmynd af samsetningarverkstæði
British Hovercraft Company.
Arinbjörn fór meðal annars í reynslu-
svif á breskri á og var þessi mynd tekin
í einni landlegunni. Arinbjörn Kúld hjá Íslandsnökkvum er Skagamaður en búsettur á Akureyri.
Myndin er frá ferð hans í bresku verksmiðjuna í liðnum mánuði.
Þessir nökkvar voru notaður við tökur á myndinni Frozen Planet og voru skildir
eftir á jökli yfir vetur, en grafnir upp að vori.
Svifnökkvar geta nýst vel við leit og björgun í straumhörðum ám.