Bændablaðið - 06.07.2017, Blaðsíða 39

39Bændablaðið | Fimmtudagur 6. júlí 2017
SKÓGRÆKT&LANDGRÆÐSLA
Skógræktarfélag Eyfirðinga:
70 rósakirsitré gróðursett
á 70 ára afmælisári
Gróðursett voru 70 rósakirsitré og
ýmsar fleiri blómstrandi tegund-
ir trjáa, runna og fjölæringa á
árlegum gróðursetningardegi
Skógræktarfélags Eyfirðinga á
dögunum, en það var stjórn
félagsins, starfsmenn þess og
fjölskyldur sem komu saman
og gerðu sér glaðan dag í tilefni
af því að 70 ár eru liðin frá því
starfsemi gróðrarstöðvar hófst í
Kjarnaskógi.
Tímamótanna verður minnst með
ýmsum hætti í sumar og 19. ágúst
verður skógardagur Norðurlands
haldinn á Birkivelli, nýju grill- og
leiksvæði sem þá verður formlega
tekið í notkun í Kjarnaskógi. Þar
hefur uppbygging staðið yfir undan-
farin misseri og eru þar nú strandbla-
kvellir, völundarhús, grillhús, margs
konar leiktæki, borðtennisborð,
hjólastólaróla og snyrtingar. Leitast
hefur verið við að hafa gróður sem
fjölbreytilegastan og trjátegundir
sem flestar að því er fram kemur á
vef Skógræktarinnar.
Bleikt blómahaf á vorin
Sólskógar reka nú gróðrarstöð-
ina í Kjarna sem Skógræktarfélag
Eyfirðinga rak áður en félagið sér
áfram um viðhald og uppbyggingu
í Kjarnaskógi og Naustaborgum.
Gott samstarf er þarna á milli og til
dæmis gefa Sólskógar rósakirsitrén
70 sem nú eru komin í jörð skammt
neðan við Birkivöll, á skjólgóðu
svæði þar sem komið verður upp
minigolfvelli. Þar má búast við að
verði bleikt blómahaf á vorin sem
verður æ tilkomumeira með hverju
árinu sem líður. Auk rósakirsitrjánna
voru gróðursettir heggir, blóðheggir,
gullregn, sírenur, álmar, lyngrósir
og fjölmargar fleiri tegundir sem
prýða munu svæðið og blómstra á
mismunandi tímum sumarsins.
/MÞÞ
-
Myndir / Pétur Halldórsson
Húnaþing vestra:
Ráðist í sjö búskaparskógræktarverkefni
– Markmið að bæta búsetuskilyrði og laga skógrækt að þörfum bænda
Unnið verður að sjö verkefnum í
Húnaþingi vestra undir merkjum
átaksverkefnis í búskaparskóg-
rækt sem efnt var til á síðasta ári.
Skjólbeltakerfi verður ræktað
á tveimur jörðum, snjófangari
á einni jörð og hagaskógur á
tveimur. Auk þess verða gerð-
ar tilraunir með skógarbeit og
klónatilraun með ösp í skjólbelti.
Á síðasta ári tilkynnti Sigrún
Magnúsdóttir, þáverandi
umhverfisráðherra, um eins árs þró-
unar- og átaksverkefni um búskap-
arskógrækt í Húnaþingi vestra.
Veittar voru sjö milljónir króna
til verkefnisins og Skógræktinni
falið að stýra því í samvinnu við
Húnvetninga.
Sæmundi Kr. Þorvaldssyni
skógfræðingi var falið að stýra ver-
kefninu fyrir hönd Skógræktarinnar
og ásamt honum sér Johan Holst
skógræktarráðgjafi um faglegu
hliðina. Efnt var til samráðs við
Búnaðarsamband Húnaþings og
Stranda og Sveitarfélagið Húnaþing
vestra. Þetta kemur fram á vef
Skógræktarinnar.
Skógrækt til bættra
búsetuskilyrða
Þegar stofnað var til verkefnisins
lagði ráðherra áherslu á að hugað
yrði að ræktun skjólbeltakerfa,
skjóllunda fyrir búfé, hagaskóga,
landgræðsluskóga, skjólskóga,
akurskóga og fjölnytjaskóga þar
sem timburvinnsla yrði til viðbótar
við önnur markmið. Bændur skyldu
fá ráðgjöf um hvernig nýta mætti
framantalda kosti til að bæta skil-
yrði til búsetu á jörðum sínum og
kanna skyldi hvers konar breytingar
væri æskilegt að gera á núverandi
stuðningi við skógrækt á lögbýl-
um svo að skógræktarverkefni yrðu
áhugaverðari fyrir bændur.
Með þessu verkefni er í raun
verið að styrkja í sessi fyrirbrigði
sem ráðherra kaus að kalla búskap-
arskógrækt en hefur líka verið
nefnt skógarlandbúnaður, og er
skipulagður út frá þeirri hugmynd
að saman fléttist í eina heild skóg-
rækt og annar búskapur. Markmiðið
er sjálfbær landnýting þar sem
trjárækt er á sama svæði og annar
búskapur og framleiðsla búsins
fæst bæði af ökrum, búfé og trjám.
Með þessu fáist sterkari vistkerfi á
bújörðinni og meiri líffjölbreytni.
Að flétta trjá- og skógrækt
saman við hefðbundnar búgrein-
ar á íslenskum búum hefur marg-
víslegan ávinning fyrir bóndann.
Skjólbelti draga úr áföllum vegna
tíðarfars og þau geta minnkað
ágang gæsa og álfta á túnum. Búast
má við meiri grósku og þar með
uppskeru í skjólinu. Trjágróðurinn
grípur næringarefnin sem ekki nýt-
ast á túninu eða akrinum og koma í
veg fyrir að þau skolist út í vatna-
svið.
Skjól- eða skógarbelti má líka
nota til að stýra því hvar snjór safn-
ast fyrir eða til að skýla lambfé á
vorin, skýla íbúðar- og útihúsum,
búa til umhverfi til útivistar, o.s.frv.
Svo má nefna teinungs¬skóg með
t.d. ösp þar sem markmiðið getur
t.d. verið að uppskera reglu¬lega
iðnvið, enn fremur hagaskóg
þar sem megintilgangurinn er að
skapa gjöfult beitiland fyrir búfé
en timburtekja getur verið aukageta
og margt fleira.
Verkefni á sjö jörðum
Fjórtán umsóknir bárust um
þátttöku í slíkum verkefnum.
Sæmundur og Johan skoðuðu við-
komandi jarðir í marsmánuði og nú
er stefnt að því að ráðast í verkefni
á alls sjö jörðum. Á Lækjamóti í
Víðidal verður ræktað skjólbelta-
kerfi en snjófangari á Gauksmýri í
Línakradal. Á Mýrum 3 í Hrútafirði
verður ræktað öflugt skjólbeltakerfi
um tún og bæjarhús. Í tilraunaskyni
er líka efnt til nokkurs konar auka-
verkefnis á Brekkulæk í Miðfirði
þar sem rýrt holt með eldri haga-
skógi hjá skógar- og sauðfjárbónda
verður varið fyrir hrossabeit en ekki
sauðfjárbeit.
Tilraunir með hagaskóg-
rækt verða enn fremur gerðar á
tveimur stöðum, annars vegar á
Fjarðarhorni í Hrútafirði á rúmlega
26 hekturum og hins vegar á 5,4
hekturum á Kolugili í Víðidal. Með
hagaskógi er átt við gisinn skóg
með góðum bithögum. Í þessum
tilraunum verður þess freistað að
koma upp lerkiskógi án friðunar
fyrstu árin. Sé þetta hægt sparast
miklir fjármunir sem ella færu í
girðingar. Loks skal nefna að á
Bakka í Víðidal verður líka gerð
áhugaverð tilraun. Þar verða gróð-
ursettir nokkrir sérvaldir asparklón-
ar í skjólbelti við tún í um 200
metra hæð yfir sjó. Framkvæmdir
eru hafnar við jarðvinnslu vegna
skjólbelta á Gauksmýri og gróð-
ursetning í snjófangara. Einnig
er gróðursetning í hagaskóginn í
Fjarðarhorni vel á veg komin. Vart
hefur orðið mikils áhuga meðal
bænda um allt land á þessum ver-
kefnum í Húnaþingi vestra. /MÞÞ