Bændablaðið - 28.03.2019, Page 4

Bændablaðið | Fimmtudagur 28. mars 20194
FRÉTTIR
Vöktun Matvælastofnunar á sýklalyfjaónæmum bakteríum 2018:
Sýklalyfjaónæmar bakteríur voru í
heilbrigðisvottuðu kjöti frá Spáni
Unnsteinn Snorri Snorrason,
framkvæmdastjóri Landssamtaka
sauðfjárbænda, segir að sýkla­
lyfjaónæmar bakteríur sem
fundust við skimun í íslenskum
lömbum hafi fundist í þörmum
lambanna en ekki kjöti þeirra.
Hér var ekki um að ræða
sjúkdómsvaldandi bakteríur
heldur bakteríur sem hafa ónæmi
fyrir sýklalyfjum eða geta þróað
ónæmi og dreift í aðrar bakteríur.
„Ég tel að ekki megi nota
niðurstöðuna til að afvegaleiða
umræðuna um góða stöðu
sýklalyfjaónæmis í íslenskum
landbúnaði. Það alvarlega í þessu
máli er að samkvæmt skýrslu
Mast er hingað til lands flutt kjöt
með heilbrigðisvottorð sem samt
inniheldur sýklalyfjaónæmar og
sjúkdómsvaldandi bakteríur.“
Við vöktun Matvælastofnunar
á sýklalyfjaónæmum bakteríum í
dýrum árið 2018 voru í fyrsta sinn
tekin sýni úr íslenskum lömbum til
skimunar. Í 4% þeirra 70 lamba sem
voru skimuð greindust ESBL/AmpC
myndandi E. coli í þörmum þeirra
en engar slíkar bakteríur greindust
í kjöti þeirra.
Sjúkdómastaða hér á landi
er einstök
Unnsteinn segir að þetta hafi að
vissu leyti komið á óvart. „Við
höfum svo sem alltaf vitað að hér
á landi finnast sýklalyfjaónæmar
bakteríur eins og alls staðar nema
hvað tíðni þeirra er mjög lág hér á
landi og það er sú staða og okkar
einstaka sjúkdómastaða sem við
eigum að verja.
Þar sem þetta er í fyrsta sinn sem
lömb hér á landi eru skimuð með
þessum hætti höfum við ekkert til að
miða við varðandi það hver þróunin
hefur verið. Samkvæmt skýrslu
Mast er tíðni ónæmu bakteríanna
svipuð á öðrum Norðurlöndunum
en minna en almennt er í Evrópu.
Ég bendi líka á að bakteríurnar
fundust í þörmum lambanna en
ekki í kjöti og því má ekki nota
niðurstöðuna til að afvegaleiða
umræðuna. Ástandið hér þegar
kemur að sýklalyfjaónæmi er eitt
það besta í heiminum. Það finnast
aðrar tegundir sýklalyfjaónæmra
baktería sem við viljum alls ekki fá
til landsins.“
Sýklalyfjaónæmar bakteríur í
vottuðu innfluttu kjöti
Í skýrslunni kemur líka fram
að sýklalyfjaónæmar bakteríur
hafi fundist í svínakjöti innfluttu
frá Spáni sem þó var að fullu
heilbrigðisvottað.
„Það er auðvitað gífurlega
alvarlegur hlutur. Getum við treyst
þeim heilbrigðisvottunum sem
fylgja innfluttum kjötafurðum?
Þetta hvetur okkur til þess að efla
frekar eftirlit með innflutningi.“
Ekki vitað um uppruna
bakteríanna
Í skýrslu Mast segir að hvernig
ónæmar bakteríur bárust í lömbin
eða hvort ónæmið myndaðist í
lömbunum sé ekki vitað og ekki
heldur hvort um aukningu sé að
ræða. Líkt og í öðru búfé, eru íslensk
lömb ekki laus við bakteríur sem eru
ónæmar fyrir sýklalyfjum eða sem
geta þróað slíkt ónæmi og dreift í
aðrar bakteríur. /VH
Unnsteinn Snorri Snorrason, framkvæmdastjóri Landssamtaka sauðfjár­
bænda.
Aðalfundur Landssambands kúabænda:
Samstaða mikilvæg kúabændum
Aðalfundur Landssambands kúa­
bænda var haldinn um síðustu helgi.
Fagþing nautgripa ræktar innar
var haldið samhliða fundinum.
Auk venjulegra aðal fundarstarfa
var farið yfir skýrslu formanns og
skýrsluhald í nautgriparækt.
Fundargestir voru sammála
um að samstaða kúabænda væri
mikilvæg til að standa vörð um
hagsmuni stéttarinnar.
Arnar endurkjörinn formaður
Arnar Árnason að Hranastöðum
var endurkjörinn formaður Lands­
sambands kúabænda á fundinum. Úr
stjórninni gekk Pétur Diðriksson að
Helgavatni og Jónatan Magnússon að
Hóli, Önundarfirði kom inn í hans stað.
Arnar segir að stóru málin á
aðalfundinum hafi verið endurskoðun
búvörusamninga, framleiðslu­
stýringarmál og tollamálin.
„Kúabændur voru búnir að kjósa
um framleiðslustýringu fyrir fundinn
og ákveða að þeir vilji viðhalda
kerfinu í greininni, fyrir fundinum
lá að útfæra fyrirkomulagið. Helstu
breytingar á kerfinu eru þær að miðað
við búvörusamninginn var gert ráð
fyrir að stýringarkerfið færi út.
Nú er aftur á móti búið að ákveða
að halda því áfram og því þarf að
breyta samningnum í þá veru. Til
þess að svo geti orðið þarf að breyta
fyrirkomulagi stuðningsbreiðslnanna.
Kúabændur standa saman
Arnar segir að á fundinum hafi
komið greinilegur vilji kúabænda til
að standa þéttar saman um að verja
hagsmuni sína og bændastéttarinnar
í heild.
„Ég fór yfir þetta í minni ræðu og
fundarmenn tóku undir þetta og að
við þyrftum að berja í brestina eins og
kom skýrt fram í kvótakosningunni
þar sem útkoman var mjög skýr.“
Tollamálin eru risastór
málaflokkur fyrir allan landbúnað
en ekki bara kúabændur og
nautgriparækt, segir Arnar.
„Tollverndin hefur rýrnað að
verðgildi og er hætt að halda og
tilgangslaust að hafa tolla ef þeir
virka ekki. Við viljum því fara í þá
vinnu með stjórnvöldum enda höfum
við fundið fyrir skilningi úr þeirri átt
að undanförnu.“
Samþykkt að hækka félagsgjöld
Á fundinum var samþykkt að hækka
félagsgjald til LK um 10%, eða úr
0,30 krónur á lítra í 0,33 krónur
á lítra mjólkur sem lagður er í
afurðastöð og úr 500 krónur á grip
í 550 krónur á grip í UN, KU og K
flokkum sem slátrað er í afurðastöð,
utan úrkasts. /VH
Arnar Árnason, bóndi á Hranastöðum, var endurkjörinn formaður Landssambands kúabænda. Mynd / HKr.
Afrekskýrin Braut 112 á Tjörn á Skaga:
Hefur rofið 100 tonna
mjólkurmúrinn
Afrekskýrin Braut 112 á Tjörn á Skaga hefur rofið 100 tonna múrinn í
æviafurðum.
Afrekskýrin Braut
112 á Tjörn á
Skaga hefur rofið
100 tonna múrinn í
æviafurðum, en hún
hafði í lok febrúar
síðastliðinn mjólkað
99.821 kíló mjólkur
yfir ævina. Dagsnyt
hennar hefur verið
ríflega 16 kíló og
reikna menn því
með að Braut hafi
mjólkað sínu 100
þúsundasta kílói mjólkur þann
12. mars eða þar um bil.
Braut 112 er fædd 12. september
árið 2005, dóttir Stígs 97010 og
Þúfu 026 frá Tjörn og er hún því
á fjórtánda ári. „Hún hefur svo
sannarlega skilað sínu,“ segir Bjarney
Jónsdóttir, bóndi á Tjörn. Hún lýsir
Braut þannig að hún hafi alla sína
tíð verið heilsuhraust, ungleg og
spræk, með sterka fætur, heilbrigt
og gott júgur, verið góð að éta og
haldið sínum holdum. „Hún er okkar
langbesti gripur,“ segir Bjarney.
Hefur borið níu sinnum
Braut bar sínum fyrsta kálfi þann
23 .október 2007 og hefur borið níu
sinnum síðan þá, síðast 12. febrúar
2017.
Mestum afurðum á einu ári náði
Braut árið 2011 þegar hún mjólkaði
10.961 kíló en hún hefur fjórum
sinnum náð ársafurðum upp á
meira en 10 þúsund kílóum, 2010
(10.007 kg), 2011 (10.961 kg), 2012
(10.190 kg) og 2017 (10.699 kg).
Mestu mjólkurskeiðsafurðir hennar
eru á yfirstandandi mjólkurskeiði
sem er orðið æði langt. Hún er nú
komin í 19.220 kíló frá síðasta
burði. Á sínu 5. mjólkurskeiði
mjólkaði hún hins vegar 14.630
kíló. Þessar upplýsingar má finna
á heimasíðu Ráðgjafarmiðstöðvar
landbúnaðarins.
Fátítt er að kýr nái 14 vetra aldri
en ekki síður er mjög sjaldgjæft
að þær skili svo miklum afurðum
sem raun ber vitni með Braut 112.
Vissulega hefur tímans tönn sett sitt
mark á kúna nú þegar hún er komin
á sín efri ár. /MÞÞ
Séð yfir bæinn Tjörn á Skaga.
Á nýafstöðnum ársfundi Bænda­
samtakanna var samþykkt
að hækka árleg félagsgjöld.
Félagsgjaldið er nýtt til þess að
gæta hagsmuna bænda og reka
Bændasamtökin en félagsmenn
þeirra eru rúmlega 3.140 talsins.
Á ársfundinum kom fram að
fjölga þyrfti félagsmönnum til
þess að treysta betur rekstur
samtakanna.
Grunngjald fyrir A­aðild að
samtökunum hækkar úr 47.000
krónum í 54.000 krónur. A­aðild
fylgja full félagsleg réttindi fyrir tvo
einstaklinga sem standa saman að
búrekstri. Hækkunin nemur 14,8%
en 2.000 krónur af gjaldinu renna í
Velferðarsjóð BÍ.
B­aðild, fyrir einstaklinga sem
standa að búi umfram tvo, verður
15.000 kr. á ári. Félagsmenn með
C­aðild, þ.e. þeir sem standa fyrir
rekstri sem telst minni háttar og
með veltu undir 1,5 milljónum á ári,
greiða 17.000 krónur á ári. Þar af
renna 2.000 krónur í Velferðarsjóð.
Aukaaðild að BÍ, fyrir þá sem
styðja markmið samtakanna, verður
15.000 krónur árið 2019.
Margvísleg réttindi
Með aðild njóta félagsmenn ýmissa
réttinda, s.s. afslátta af tölvuforritum,
leigu á orlofsíbúð, sérkjara á
gistingu á Hótel Sögu, stuðnings
Velferðarsjóðs og ráðgjafar um ýmis
málefni sem snerta bændur. Þá er
ótalið þeir hagsmunir sem felast í
samtakamætti heildarinnar, s.s. við
hagsmunagæslu og ímyndar­ og
kynningarmál.
Full aðild að BÍ veitir
félagsmönnum rétt til að gegna
trúnaðarstörfum og njóta kjörgengis
til kosninga um þá samninga sem
gerðir eru í nafni Bændasamtakanna
þegar það á við. Einungis þeir sem
greitt hafa félagsgjöld njóta réttinda
sem félagsmenn í Bændasamtökum
Íslands. Greiðsluseðlar fyrir
félagsgjöldum eru sendir út í mars
á hverju ári. Hægt er að gerast félagi
í BÍ með því að skrá sig á vefsíðu
samtakanna, bondi.is. /TB
Breytingar á
félagsgjöldum BÍ