Ægir - 2019, Blaðsíða 12

12
Útgerðar og fiskvinnslufyrirtækið G.Run í Grundarfirði hefur tekið í notkun nýtt og án efa tæknivæddasta fiskvinnsluhús
landsins í dag. Byggt var nýtt vinnsluhús við eldra hús G.Run og eru móttaka, vinnslusalur og pökkun ferskra afurða í nýja
húsinu en lausfrystar og pökkun frystra afurða í eldra húsinu. Viðbyggingin er um 2.700 fermetrar að stærð og eldra húsið
um 1.400 fermetrar. Á mælikvarða byggðarlags sem telur innan við 1000 íbúa er þessi fjárfesting gríðarstór og treystir land-
vinnslu staðarins í sessi til framtíðar. Enda segir Guðmundur Smári Guðmundsson, framkvæmdastjóri G.Run að eigendur
fyrirtækisins hafi í raun staðið frammi fyrir þeim valkostum að hætta rekstrinum eða byggja myndarlega upp til framtíðar
með allri þeirri nútímatækni sem er í fiskvinnslu dagsins í dag. Og sú leið var farin. Fjárfesting í verkefninu verður vel á
annan milljarð króna þegar upp verður staðið.
G.Run hefur tekið í notkun nýtt hátæknifiskvinnsluhús
Mikil sjálfvirkni
og tvöföld
afkastageta
Guðmundur Smári Guðmundsson, framkvæmdatjóri G.Run í nýja vinnslusalnum. „Með
tilkomu nýja hússins verður gjörbreyting á öllum sviðum fiskvinnslunnar hjá okkur.
Afkastagetan mun hátt í tvöfaldast þó mannaflinn verði sá sami og gjörbylting verður
á þeim möguleikum sem við höfum til að vinna í fjölbreyttar afurðir, nákvæmni upp á
gramm í bitaskurðinum og þannig má áfram telja. Erfiðustu störfin verða vélræn og
erfiðasti hluti snyrtingarvinnunnar færist yfir í vélbúnað.”