Lögmannablaðið - 2020, Qupperneq 25

um bætur úr tilteknum tryggingum hefur ekki borist innan
tilkynningarfrests, sem áskilinn er í lögum um vátryggingar
eða að kröfu er lýst of seint í þrotabú o.s.frv. Þá hafa af og
til komið upp mál þar sem hagsmunagæslu hefur verið
ábótavant og eru þau mál af ýmsum toga.
Eru mörg mál að rata inn á borð tryggingafélaganna þar sem
gerðar eru kröfur í starfsábyrgðartryggingar lögmanna?
Björk: Heilt yfir eru þessi mál tiltölulega fá frá ári til árs. Það
er því ekki beint hægt að tala um mikinn málafjölda þegar
þessar tryggingar eru annars vegar. Ekki varðandi lögmenn.
Eru dæmi þess að lögmenn hafi frumkvæði að því að benda
skjólstæðingum sínum á starfsábyrgðartryggingu sína telji þeir
sig mögulega bótaskylda samkvæmt tryggingunni?
Hildur: Það er væntanlega allur gangur á því. Almennt tel
ég þó að lögmenn vilji síður að ágreiningur um störf þeirra
fari fyrir dómstóla og reyni því að sætta málin, með eða án
aðkomu tryggingafélaganna.
Björk: Það er mín reynsla að lögmenn eigi oftar en ekki
frumkvæði að því að beina sínum skjólstæðingum til
trygginga félaga þegar slíkt á við. Einnig hafa lögmenn
samband sjálfir og tilkynna um hugsanleg tilvik sem kunna
að þarfnast skoðunar.
Vitið þið til þess að mál af þessum toga hafi ratað fyrir dómstóla?
Hildur: Það er þó nokkur dómaframkvæmd á þessu sviði
en mörg mál eru gerð upp hjá vátryggingafélögunum. Á
síðustu 20 árum hafa gengið um 15 dómar í Hæstarétti
sem varða skaðabótaábyrgð lögmanna. Í fæstum tilvikum
hefur þó verið fallist á bótaábyrgð lögmannsins. Þá hefur
ekki tekist að sýna fram á saknæma háttsemi lögmannsins
eða að orsakatengsl séu milli háttsemi lögmannsins og
tjóns umbjóðanda hans. Fallist hefur verið á bótaskyldu
í fáum málum, m.a. þegar krafa hefur fyrnst í höndum
lögmannsins og þegar erfðaskrá var metin ógild vegna
þess að ekki var gætt að fullnægjandi vottun hennar.
Björk: Það hafa í raun tiltölulega fá mál ratað fyrir dómstóla
á sl. árum þar sem reynir beinlínis á gildissvið eða umfang
starfsábyrgðartryggingarinnar. Því eru afar fá fordæmi fyrir
hendi þegar þessi mál eru annars vegar, þ.e.a.s. varðandi
trygginguna sjálfa.
AF MÁLUM SEM HAFA HELST VERIÐ AÐ KOMA
INN Á BORÐ TRYGGINGAFÉLAGA ÞÁ MÁ BENDA
LÖGMÖNNUM Á AÐ GÆTA VEL AÐ ÞVÍ HVERNIG
ÞEIR HALDA Á MÁLUM M.T.T. TÍMAFRESTA.
Björk Viðarsdóttir lögmaður
Hildur Ýr Viðarsdóttir lögmaður