Árbók Hins íslenzka fornleifafélags - 2015, Side 196

195GAMLI BÆJARHÓLLINN Í DIGRANESI, KÓPAVOGI
Ekki er vitað til þess að nokkuð hafi verið átt við viðarleifarnar í
fjósinu og gæti verið áhugavert að grafa þær upp að nýju og gera á þeim
ítarlegri rannsókn en hægt var að gera árið 1980. Ljósmyndir og uppdráttur
af básunum sýna t.d. að þar var um óvenjulega gerð bása að ræða, sem
gæti verið mjög forn. Ástæða væri til að rannsaka fjósið betur og jafnvel
kanna hversu útbreiddir slíkir básar voru um landið og hvort þeir eigi sér
fyrirmyndir langt aftur í tíma.
Fornleifakönnunin sem gerð var árið 1980 fólst aðeins í rannsókn á
yngstu bæjarleifunum í Digranesi en ekki var kannað hvort eldri minjar
væru þar undir. Ef bæjarstæðið hefur alltaf verið á sama stað má ætla að
undir rústunum leynist bæjarleifar frá miðöldum og slíkar minjar hafa ekki
enn verið rannsakaðar mjög víða á Íslandi. Ekkert annað eldra bæjarstæði
fannst við fornleifaskráningu sem gerð var á svæðinu árið 2000, sem bendir
til þess að bærinn hafi frá upphafi alltaf staðið á þessum sama stað.6 Talið
hefur verið að byggð hafi hafist í Digranesi um 1300 af því þá kemur
hann fyrst fyrir í ritheimildum. Fornleifarannsóknir hafa hins vegar sýnt að
bæir gátu verið í byggð allt frá landnámsöld, jafnvel þekktir staðir eins og
Bessastaðir, þó að þeirra sé ekki getið fyrr en löngu síðar í ritheimildum.7
Gamli bæjarhóllinn í Digranesi gæti því enn lumað á upplýsingum um
fortíðina sem aðeins frekari rannsóknir geta afhjúpað.
6 Bjarni F. Einarsson 2000.
7 Guðmundur Ólafsson 2010.