Morgunblaðið - 15.04.2021, Qupperneq 14

14 DAGLEGT LÍF
MORGUNBLAÐIÐ FIMMTUDAGUR 15. APRÍL 2021
Kristín Heiða Kristinsdóttir
khk@mbl.is
V
ið höfum starfað á Ís-
landi í tæp tvö ár og á
þeim tíma hef ég sent
úr landi í kringum
fjörutíu þúsund tæki,
langmest símtæki. Öll tækin fara
út og þar er þeim komið í söluferli
og þau öðlast áframhaldandi líf,“
segir Þorsteinn Þorsteinsson sem
er umboðsmaður fyrir Foxway hér
á landi, en það er alþjóðlegt fyrir-
tæki sem safnar saman úti um alla
Evrópu notuðum síma- og tölvu-
búnaði til að endurnýta og endur-
vinna.
„Á hverju einasta heimili á Ís-
landi liggja þrír til fimmtán gaml-
ir símar, spjaldtölvur, borðtölvur,
mp3-spilarar og annað slíkt, og oft
hefur það legið þar svo árum
skiptir. Við tökum við þessu, far-
símum, spjaldtölvum, snjallúrum,
fartölvum og öllum tækjum sem
heita Apple. Þetta snýst um að
endurnýta eins mikið og mögulegt
er af þessum tækjum. Í dag end-
urnýtum við yfir áttatíu prósent af
öllu því sem kemur inn og úr þeim
tækjum sem ekki er hægt að nota
áfram er unnið gler, plast og góð-
málmar. Gert er við tækin og þau
seld á markaði sem notuð tæki,
þar sem þau verða notuð áfram.
Stóri kosturinn er að engu máli
skiptir í hvað ástandi tækið er; við
kaupum það samt, líka þótt það sé
ónýtt. Við höfum tekið við gríðar-
lega miklu magni af hlutum sem
eru svo gott sem verðlausir, en
þeir fara þá á réttan stað, því
Foxway er vottað í bak og fyrir
hvað varðar umhverfisstefnu og
annað slíkt, eyðingu á gögnum og
búnaði.“
Margir kaupa nýjan síma
árlega eða annað hvert ár
Þegar Þorsteinn er spurður
hvert hinn almenni borgari hér á
landi geti snúið sér, sem vill
leggja sitt af mörkum og koma
sínum gömlum tækjum til
Foxway, segir hann það einfalt
mál.
„Þetta fer þannig fram að til
dæmis sá sem á gamlan síma og
ætlar að kaupa sér nýjan, hann
getur komið með gamla símann í
þær verslanir sem við erum í sam-
starfi við og látið hann upp í þann
nýja. Tækið er verðmetið á staðn-
um og keypt af honum, eða hægt
að setja það upp í ný kaup. ELKO
og NOVA voru fyrst fyrirtækja
hér á landi til að gera samstarfs-
samning við okkur, en nú hafa
bæst við Epli, Macland, Tölvutek,
Origo, Advania og fleiri. Á næstu
misserum bætast Síminn og Voda-
fone í hóp þeirra sem munu taka
við notuðum tækjum frá fólki.
Hvar sem hægt er að kaupa þessi
tæki verður hægt að skila inn eldri
tækjum,“ segir Þorsteinn og bætir
við að fólk komi með fimmtán ára
gamla NOKIA 5110-símana sína
og nýlega iphone-síma, og allt þar
á milli.
„Margir notendur kaupa sér
ný tæki árlega eða annað hvert ár.
Þá er um að gera að koma með
eins árs tæki í góðu lagi og fá þá
vel borgað fyrir þau. Tækin eru
eðli málsins samkvæmt verðmæt-
ari eftir því sem þau eru nýrri.“
Gögnum er strax eytt
Þorsteinn segir að fólk þurfi
ekki að óttast að gömul gögn sem
séu í tækjunum fari neitt á flakk.
„Það fyrsta sem tæknimenn
Foxway gera þegar þeir hafa
fengið tæki í hendurnar er að
eyða gögnum. Áður en fólk skilar
af sér tækjum ætti það að vera
búið að safna saman þeim gögnum
í búnaðinum sem það vill halda.
Fólk skrifar undir yfirlýsingu
þess efnis að það viti að gögnum
verði eytt og ekki verði hægt að
sækja þau eftir það.“
Fyrirtæki leita leiða til að
setja sitt jákvæða spor
Þorsteinn er virkilega ánægð-
ur með þá vegferð sem Foxway er
á, enda er fyrirtækið afar um-
hverfisvænt.
„Á opinberum tölum frá
Foxway má sjá að 65 þúsund far-
tölvur fóru í gegnum fyrirtækið á
síðasta ári og við það sparast
16.900 tonn af losun koltvísýrings.
Þetta er gríðarlegt magn af tölv-
um sem öðlast áframhaldandi líf,
þær eru í notkun og fyrir vikið
þurfti ekki að framleiða 65 þús-
und nýjar tölvur. Við það sparast
þessi mikla losun koltvísýrings og
þannig er hægt að koma í veg fyr-
ir mikla mengun með því að end-
urnýta það sem þegar er búið að
framleiða. Langmest kemur þó
inn af símum, um 600 þúsund not-
aðir farsímar komu til Foxway í
fyrra,“ segir Þorsteinn og bætir
við að fyrirtæki á Íslandi hafi tek-
ið honum og vinnu hans fyrir
Foxway opnum örmum.
„Enda eru öll fyrirtæki í dag
að leita leiða til að setja sitt já-
kvæða spor á koltvísýrings-
mengun í heiminum. Notuðu tæk-
in eru seld um víða veröld, til
dæmis eru Spánn, Portúgal, Ítalía
og England stór markaðssvæði,
sem og Austur-Evrópa og á Ind-
landi er risastór markaður, rétt
eins og í mörgum löndum í Asíu.
Hugarfarið hjá almenningi er í
vaxandi mæli í þá átt að láta gott
af sér leiða í umhverfismálum, við
finnum það á móttökunum hér á
landi,“ segir Þorsteinn og bætir
við að móttökustöðvar séu flestar
á höfuðborgarsvæðinu og Akur-
eyri.
„Einnig er aðili á Egils-
stöðum sem mun fljótlega tengj-
ast verkefninu og taka við tækjum
og fljótlega munum við bjóða upp
á þessa þjónustu á netinu. Þá geta
þeir sem búa afskekkt gert þetta í
gegnum vefinn, til dæmis hjá
NOVA, en þá sendir fólk tækin í
pósti.“
Símar og tölvur fá framhaldslíf
„Með því að endurnýta það sem þegar er búið að framleiða sparast mikil losun koltvísýrings. Þannig er hægt að koma í veg fyrir mikla
mengun með því að endurnýta síma og tölvur,“ segir Þorsteinn Þorsteinsson, umboðsmaður Foxway á Íslandi, alþjóðlegs fyrirtækis sem
safnar saman notuðum síma- og tölvubúnaði til að endurnýta og endurvinna. Um 600 þúsund notaðir farsímar komu til Foxway í fyrra
og 65 þúsund fartölvur. Íslendingar hafa tekið þessum möguleika fagnandi, að fá gömul tæki verðmetin og að geta sett þau upp í ný tæki.
Morgunblaðið/Árni Sæberg
Þorsteinn „Á hverju heimili á Íslandi liggja þrír til fimmtán gamlir símar, spjaldtölvur, borðtölvur og fleira.“
Reuters
Alls konar Fólk getur komið með hvers kyns gamla síma í hvaða ástandi
sem er, líka ónýta. Foxway tekur við þeim öllum og endurnýtir.