Múlaþing: byggðasögurit Austurlands - 01.01.2014, Síða 12

Múlaþing
Droplaugastaðir í Fljótsdal. Eigandi myndar: Bergljót Hallgrímsdóttir.
Eins og ég hef nefnt fannst mér gaman í
skólanum, ekki síst í frímínútunum þegar hægt
var að vera í skipulögðum leikjum en það
fannst mér óskaplega skemmtilegt. Ég man
sérstaklega eftir tveimur leikjum: Hafnarleik
þar sem hlaupa átti á milli tveggja hafna án
þess að láta þann sem var‘ann góma sig með
„klukki“ og Pottleik þar sem tveir risar áttu að
fanga hina og færa þá í pott sinn og jafnframt
að koma í veg fyrir að þeir sem eftir voru „úti“
frelsuðu hina úr pottinum jafnóðum. Ég var
mjög fljót að hlaupa og gat hlaupið fljótustu
strákana uppi svo að ég naut mín mjög vel
í leikjum.
Fljótlega fór mér að leiðast stríðnin sem
alltaf var dálítil í krakkahópnum. Krakkar
frá sumum heimilum virtust útsettari fyrir
stríðni heldur en frá öðrum heimilum og sama
gilti um ákveðna einstaklinga. Alla mína
skólagöngu leiddist mér þessi stríðni, hvort
sem hún beindist gegn mér eða einhverjum
öðram. I dag myndu þessar athafnir krakkanna
meira og minna flokkast undir einelti en á
þessum árum var það ekki þekkt hugtak. Mér
var lífsins ómögulegt að botna í því til hvers
var verið að eyða orku og tíma í stríðni með
tilheyrandi leiðindum og gráti, þegar hægt var
að vera í skemmtilegum leikjum.
Annan veturinn minn á skólanum fylgdi
ég strákunum tveimur sem voru ári eldri
upp í eldri deild. Mér líkaði það betur, þessir
krakkar voru þroskaðri og voru minna að
stríða. Þeir tóku mér vel þótt ég væri yngri
og ég var líka komin með námsefni sem ég
þekkti ekki allt fyrirfram, svo ég hafði eitthvað
við að vera við heimalærdóm eftir skóla. Við
fengum nýja námsbók í heilsufræði og nýja
landabréfabók. Hún var litprentuð í stóru
broti og mér fannst og fmnst enn hún vera
hinn mesti dýrgripur.
Stafsetning og málfræði bættust líka við en
fög eins og handavinna og leikfimi vora ekki
kennd. Ég var minna í skólanum eftir áramót
því pabbi fékk stundum frí fyrir mig. Honum
og kennaranum mun hafa komið saman um
að ég kynni samt það sem til var ætlast í
skólanum.
10