Ljósmæðrablaðið - 01.07.2021, Side 31

31LJÓSMÆÐRABLAÐIÐ - JÚLÍ 2021
kemur að þessu, þetta er ekki að fara neitt, ég er ekki að missa af
neinu, ég er ekki í tímaþröng.
Hvernig upplifðir þú fæðinguna þína?
Ég var hvattur til þess að láta það koma fram í fæðingaróskum
að ég væri trans, að nafnið á pappírunum og í kerfinu væri ekki
rétt nafn og hvaða fornöfn ég vildi láta nota. Svo var mamma með
mér og hún var alveg með svipuna á lofti. En ég gekk sem sagt
heilar 42 vikur en var farinn að bíða við 38 vikur, þannig að þetta
var langur mánuður. Ég var settur af stað með stílum og síðan
dreypi, fékk mænurótardeyfingu og allt það ferli en eftir sirka 20
klukkustundir af hríðum þá var bara ekkert að frétta og hún eins
og korktappi þarna niðri, hún er mjög höfuðstór - mjög höfuðstór -
við erum að tala um það að hún er fimm ára í dag og notar hjálm í
unglingastærð. Ég fór sem sagt að lokum í keisaraskurð. Þetta var
ekki gaman en í sjálfu sér ekkert tengt því hver ég var eða hvernig.
Gastu hugsað þér að hafa barnið á brjósti?
Já, ég var með hana í einn mánuð á brjósti en fannst það ekki
jafn mikill dans á rósum og sumir segja. Ég ræddi við ljósmóð-
urina mína um að mér fyndist þetta ótrúlega mikið bras og væri
bara að valda mér áhyggjum og pirringi yfir því að þetta væri ekki
að ganga eins og ég vildi. Ég ákvað að segja þetta gott en náði
þessum mánuði.
Hvernig fannst þér heilbrigðisstarfsfólk og kerfið fylgja þér í
gegnum meðgönguna og fæðinguna?
Ég hefði ekki getað beðið um að þetta færi neitt betur. Það voru
allir jákvæðir og tóku þessu satt að segja sem sjálfsögðum hlut. Í
fyrstu flakkaði ég á milli ljósmæðra en svo var ein sem fylgdi mér
síðasta spöl meðgöngunnar. Hún var alveg frábær og aðstoðaði
mig við að koma mér þannig á framfæri innan kerfisins að ég væri
ekki að rekast á veggi eða verða fyrir mótstöðu. Læknirinn sem
skar mig er líka frábær í alla staði, hann er bæði búinn að skera í
legið á mér og svo taka það úr núna um daginn. Hann sendi mér
einmitt bækling fyrir legnámið sem var mjög kvenmiðaður. Ég
ákvað að senda honum ábendingu um að það ætti eftir að koma
fleira transfólk sem skilgreinir sig ekki sem þessi kona sem talað
er um í bæklingnum. Hann tók mjög vel í það, afsakaði sig í bak og
fyrir og er strax byrjaður að græja þetta.
Henrý Steinn með dóttur sinni Védísi Báru Þórisdóttur