Lögmannablaðið - 2022, Qupperneq 31

LÖGMANNABLAÐIÐ TBL 01/22 31
Undirskriftir
Á þessu stigi máls getur einstaklingur kosið að hafa
ólöglærðan fyrirsvarsmann og/eða lögmann en það
er þó ekki skilyrt. Helstu mistök hvað þetta varðar eru
þau að undirskriftir í umboðslið eyðublaðsins eru ekki
upprunalegar, heldur ljósritaðar eða skannaðar. Þá er
algengt að upplýsingar um fyrirsvarsmenn komi ekki fram á
sjálfu kærueyðublaðinu heldur er sérstakt umboðseyðublað
látið fylgja kæru. Hvað varðar kærendur sem ekki eru
einstaklingar, s.s. samtök eða félög, þá eru algengustu
mistökin að fylla ekki út upplýsingar um fyrirsvarsmann
kæranda, eins og krafist er, og að sönnunargögn um rétt
hans til að fara með málið fyrir hönd kæranda fylgja ekki
með kærunni. Ef kærandi kýs að hafa lögmann á þessu
stigi málsins eru algengustu mistökin þau sömu og hjá
kærendum sem eru einstaklingar, þ.e að undirskriftir í
umboðshluta kærueyðublaðsins eru ekki upprunalegar
og að upplýsingar um lögmann séu ekki fylltar út á sjálfu
eyðublaðinu heldur á sérstöku umboðseyðublaði.
Efni kæru
Talsverður fjöldi mistaka tengjast þeim hlutum kæru-
eyðu blaðsins er varða efni kæru þ.e. málsatvikalýsingu,
yfirlýsingu um meint brot á sáttmála og/eða samnings-
viðaukum og upplýsingum um að öll tiltæk réttarúrræði í
viðkomandi aðildarríki hafi verið tæmd og að kærufrestur til
dómstólsins skv. 1. mgr. 35. gr. MSE hafi verið virtur. Helstu
mistök sem gerð eru í þessum hlutum kærueyðublaðsins
eru að þessir hlutar eru ekki fylltir út, að vísað sé til viðauka
við kæruna hvað þessa hluta varðar eða að frásögn hefjist á
eyðublaðinu sjálfu og haldi áfram í meðfylgjandi skjali. Þá
er og algengt að umbeðin skjöl sem styðja frásögn kæranda
eða sýna fram á að réttarúrræði í viðkomandi ríki hafi verið
tæmd og kæra hafi verið send innan kærufrests, fylgi ekki
með kærunni.
Skjalalista þarf að fylla út
Í kærueyðublaðinu er farið fram á að gerð sé skrá um öll
skjöl sem fylgja kæru til dómstólsins, að skjölin séu læsileg,
að þau hafi blaðsíðunúmer og sé raðað í tímaröð. Algeng
mistök sem gerð eru hvað þetta varðar er að skjalalistinn
er ekki fylltur út, ekki séu sett blaðsíðunúmer og skjölum
sé ekki raðað í tímaröð. Þá er algengt að undirskrift á
lokablaðsíðu eyðublaðsins sé ekki upprunaleg eins og
krafist er.
Ef gerð eru mistök við undirbúning kæru og henni vísað
frá dómstólnum þá er heimilt að senda nýja gilda kæru,
að því gefnu að það sé gert innan kærufrestsins. Það eru
algeng mistök að ófullnægjandi kæra sé send aftur til
dómstólsins. Þegar kæru er vísað frá vegna formgalla eru
engin gögn geymd, öllu er fargað. Það er því ekki nægilegt
að senda inn leiðréttingar á þeim mistökum sem gerð voru
við undirbúning fyrri kærunnar. Senda þarf inn gilda kæru
ásamt öllum viðeigandi fylgiskjölum að nýju.
Kærufrestur
Algeng mistök við undirbúning kæru er að hún er póstlögð
til dómstólsins á síðasta degi kærufrestsins. Ef kæru er
svo vísað frá af dómstólnum á þeirri forsendu að hún
uppfylli ekki formskilyrði er fresturinn liðinn og ekki tími
til að senda inn nýja gilda kæru. Því er mjög mikilvægt að
senda kæru til dómstólsins tímanlega, sérstaklega nú þegar
kærufrestur hefur verið styttur.
Þann 1. febrúar 2022 styttist kærufrestur til dómstólsins í
fjóra mánuði í samræmi við 15. viðauka við MSE. Þetta tekur
til mála þar sem dagsetning lokaákvörðunar í viðkomandi
aðildarríki er 1. febrúar 2022 eða síðar. Ef engin raunhæf
úrræði eru til staðar er varða kæruefni telst fjögurra mánaða
tímabilið vera frá degi athafnar, atviks eða úrlausnar sem
varðar kæruefnið.
Hér hefur verið farið yfir helstu kröfur sem gerðar eru
til gildrar kæru og algeng mistök við frágang hennar.
Yfirferðin er ekki tæmandi um þau skilyrði sem gilda og því
er mælt með að lesa ítarlegar leiðbeiningar dómstólsins auk
þeirra reglna og laga sem gilda um kærur til dómstólsins,
áður en kæra er fyllt út og send dómstólnum.