Bændablaðið - 21.07.2022, Blaðsíða 13

Lóa – nýsköpunarstyrkir fyrir landsbyggðina:
Verðmætasköpun úr
þörungum áberandi
Háskóla-, iðnaðar- og nýsköpunar-
ráðuneytið úthlutaði tæpum
100 milljónum króna úr Lóu,
nýsköpunarstyrkjum fyrir
landsbyggðina, þann 11. júlí sl.
Um 100 umsóknir bárust sjóðnum
en 21 umsókn hlutu brautargengi.
Stærsta styrkinn, 12,5 milljón
króna, hlaut Sjótækni ehf. fyrir
rannsóknarverkefnið StaðarOrka,
sem hefur það að markmiði að
kanna nýtingu straumrasta eða
sjávarfalla á Vestfjörðum í eða
nærri vegamannvirkjum í þveruðum
fjörðum til framleiðslu raforku.
Tvö verkefni tengjast sjávar­
föllum. Valdimar Össurarson
hlaut styrk til að kanna
raunhæfi sjávarfallavirkjana en
niðurstöður verkefnisins munu
nýtast við stefnumótun í byggða­
og orkumálum við þróun
sjávarorkutækni. Dagný Hauksdóttir
hlaut styrk til að gera forathuganir
og undirbúa nýtingu sjávarorku við
Vestmannaeyjar.
Fjögur verkefni snúa að
þörungum. Nýstofnað rannsókna­
og þróunarsetur um stórþörunga
á Reykhólum, Þörungamiðstöð
Íslands, hlaut 8,1 milljón króna
til stefnumótunar þar sem
framtíðarsýn og sóknaráætlun ásamt
upphafsaðgerðum verða mótuð.
Þá áformar Algó ehf. upp­
skölun á framleiðslu sæmetis,
sjávargrænmetis úr þörungum og
fékk styrk í verkið.
Blábjörg fékk styrk til að þróa
vörur og sjálfbæra framleiðslu úr
þara. Verkefnið mun skila vörum
fyrir framleiðslu á sterku áfengi,
kryddi í matreiðslu og heilsuvörur.
Þá eru Taramar Seeds ehf.
og Vaxa ehf. að þróa lífvirkar
húðvörur sem byggja m.a. á efnum
úr örþörungarækt Vaxa á Hellisheiði
sem þau hyggjast nýta styrk til að
þróa.
Ýmis þekkingar­ og fræðslu­
verkefni hlutu einnig stuðning Lóu.
Þróunarverkefnið STEM á Húsavík,
félagasamtökin Blámi á Vestfjörðum
og Nýheimar þekkingarsetur á Höfn
eru þar á meðal.
Norðanátt og Sunnanátt með
hvort sitt verkefnið norðan og
sunnan heiða sem byggir á að virkja
einstaklinga og fyrirtæki að taka þátt
í nýsköpunarverkefnum.
Einnig ætlar Yggdrasill Carbon
á Austurlandi að búa til alþjóðlega
vottaðar kolefniseiningar í gegnum
sjálfbær loftslagsverkefni með
nýskógrækt og endurheimt landgæða.
Hlutverk Lóu er að styðja við
nýsköpun, eflingu atvinnulífs
og verðmætasköpun sem byggir
á hugviti, þekkingu og nýrri
færni, á forsendum svæða á
landsbyggðinni. /ghp
Styðja nýliða
Opnað hefur verið fyrir
umsóknir um nýliðunarstuðning
í landbúnaði.
Markmið stuðningins er að
aðstoða nýliða við að hefja búskap og
auðvelda ættliðaskipti í landbúnaði.
Umsækjendur verða að uppfylla
kröfur sem tilteknar eru í tilkynningu
á vef matvælaráðuneytisins. Meðal
skilyrða er að vera á aldrinum 18­40
ára og hafi lagt út fyrir fjárfestingu
annaðhvort með eigin fé eða lántöku.
Áhugasömum er bent á að kynna
sé vel reglur um forgangsröðun í
nýliðaumsóknum.
Umsóknum skal skila inn á
afurd.is fyrir 1. september. /ghp
Hrútaþukl á Ströndum
Átjánda Íslandsmótið í hrútadómum
verður haldið á Sauðfjársetrinu í
Sævangi á Ströndum sunnudaginn
21. ágúst næstkomandi.
Þessari skemmtilegu keppni
hefur verið aflýst tvö ár í röð vegna
sóttvarnatakmarkana, en verður nú
endurvakin, að því er fram kemur í
fréttatilkynningu frá Sauðfjársetrinu.
Þar er haft eftir Ester Sigfúsdóttur
framkvæmdastjóra að hrútaþuklið
sé stærsti viðburðurinn í starfi
Sauðfjársetursins. Oft hafi á bilinu 300­
500 gestir mætt á viðburðinn og vonast
til að fólk fjölmenni einnig í ár. /ghp
Síðast þegar keppt var, árið 2019, sigraði Jón Þór Guðmundsson á
Galtarholti í Hvalfjarðarsveit. Mynd / Sauðfjársetrið