Skessuhorn - 19.10.2022, Blaðsíða 5

MIÐVIKUDAGUR 19. OKTÓBER 2022 5
Bíóhöllin á Akranesi fagnar á
árinu 80 ára afmæli en árið 1942
fékk Akraneskaupstaður húsið að
gjöf frá útgerðarmanninum Har-
aldi Böðvars syni. Athafnamaður-
inn Ísólfur Haraldsson hefur verið
rekstraraðili Bíóhallarinnar frá
árinu 2001 og blaðamaður Skessu-
horns settist niður með honum í
rauðu sæti í Bíóhöllinni á dögunum.
Ísólfur segir að þegar hann horfi til
baka sé þetta búinn að vera ansi við-
burðaríkur og skemmtilegur tími.
Snýst um að hafa
líf í húsinu
„Í upphafi reyndum við að búa til
tónleikahefð og á þeim tíma var
hún í raun og veru ekki til staðar
á Íslandi. Þetta snýst enn og hefur
alltaf snúist um að búa til eitthvað
inn í húsið, að hafa líf í húsinu. Í
hruninu 2008 þá fórum við að reyna
að búa sem mest til inn í húsið því
þá var fólk mikið að sækjast eftir
afþreyingu. Hugarfarið breyttist
hjá fólki og það fór að mæta vel á
flesta viðburði. Í kringum 70 ára
afmælið árið 2012 settum við upp
leiksýningar, tónleika og margt
annað. Þetta var stöðug keyrsla
þar sem alls konar viðburðir voru í
gangi með góðri mætingu þangað
til við vorum búnir að keyra nánast
í gegnum allan markaðinn. Halda
sömu tónleikana aftur og aftur og
þá fann maður að kvótinn sem við
höfðum var farinn að minnka og
þá fórum við meira yfir í bíósýn-
ingar með kaupum á nýjum sýn-
ingarbúnaði. Svo fer þetta mikið
eftir því hvað er í boði á hverjum
tíma. Í kringum covid var þetta
fram og til baka. Oftast hefur þetta
verið þannig að þegar við finnum
að fólkið þarf á okkur að halda þá
búum við eitthvað til fyrir það.“
Tengdamamma
kemur að skúra
Hvernig gengur reksturinn? „Þetta
ár er búið að vera rosa erfitt, bíó-
bransinn í heiminum hefur verið
í rosalegri kreppu og það er til-
gangslaust að vera með eitthvað
í gangi ef það er engin eftirspurn
eftir því. Þegar það er eitthvað
bitastætt þá gengur þetta alveg
upp. Afþreyingarheimurinn hefur
breyst, sérstaklega upp úr covid.
Streymisveitur hafa sótt í sig veðrið
og bíóheimurinn þarf að laga sig að
breyttum aðstæðum. Það er í okkar
höndum að þróast í takt við tím-
ann, það er alltaf verkefnið. Bíó-
höllin er upphafið af því sem við
tókum okkur síðar fyrir hendur. Þar
lærðum við í raun grunninn af því
sem við erum að gera í dag. Þegar
maður kemur hérna inn í þetta hús
til starfa þá er þetta einhvern veg-
inn það skemmtilegasta sem ég
geri. Hér var maður sem krakki, í
kringum tónlistarkeppnirnar í FVA
og leiksýningar sem hljóðmaður
eða hvað það var. Ég set upp hverja
einustu bíósýningu sjálfur og er í
raun sá eini sem kann á og þekki
búnaðinn. Tengdamamma kemur
að skúra, krakkarnir hjálpa til í
sjoppunni. Góðir vinir hallarinnar
hjálpa einnig til við ýmist viðburða-
hald. Alveg sama hvað við höfum
gert þá endar maður alltaf hérna
inni með eitthvað. Maður er alltaf
að átta sig betur á því hversu mikla
möguleika þetta hús hefur til að
verða eitthvað ennþá stærra. Þetta
hús er eitt það skemmtilegasta á
landinu að koma í, setjast niður
og horfa á tónleika. Það er búið að
vera tiltölulega rólegt í nokkurn
tíma núna en mig dreymir um það
að taka síðasta dansinn hér í húsinu
og setja þetta á hærra plan.“
Ísólfur segir varðandi fram-
tíð hússins að næstu skref séu að
betrumbæta húsið og leggja drög
að skrefi tvö sem er að ljúka við
framkvæmdir í húsinu. „Það besta
sem við gætum gefið Bíóhöllinni í
afmælisgjöf er að gefa henni sterka
og öfluga framtíðarsýn því þetta
hús býr til menningu í kringum sig,
býr til tækniþekkingu og margt sem
getur þróast með því. Hér hefur
ýmislegt verið í gangi sem aflar
fólki reynslu og þekkingu. Þetta
fólk hefur síðan farið að vinna í
leikhúsunum eða á sjónvarps-
stöðvunum og skapað sér atvinnu í
kringum áhugamálin.“
Mugison var með tónleika um
þar síðustu helgi og Bubbi verður
með sína árlegu Þorláksmessutón-
leika í desember. Ísólfur segir að
margt fleira sé í burðarliðnum sem
verður tilkynnt á næstu dögum og
vikum. Á næstu mánuðum munu
stórmyndir verða sýndar þannig
að það verður ýmislegt í boði og
jafnt og þétt muni framboð sýninga
aukast í vetur.
Þurfum að halda
áfram að efla húsið
Það er mikil saga á bak við þetta
hús. Hvernig sérðu fyrir þér
næstu ár og ætlar þú að endurnýja
samninginn þinn? „Ég hef verið
óákveðinn í öll þessi skipti en húsið
kallar alltaf aftur á mig. Við komum
mjög ungir og sprækir inn á sínum
tíma og rifum þetta upp. Við höfum
farið upp og niður brekkuna í ansi
mörg ár og erum alltaf að reyna að
virkja sem flesta í kringum húsið.
Þetta snýst bara um fólk, þetta er
orðið erfiðara síðustu ár því við
erum að keppa við það að ungir
krakkar geta farið í þægilega vinnu
og fengið ágætis mánaðarlaun. Þau
eru kannski ekki alveg til í að vera
hér og eyða tímanum að kvöldi til
og um helgar að gera eitthvað sem
þau fá lítið greitt fyrir. Ég og þeir
sem eru í kringum þetta þurfum
í raun og veru að finna út úr því
hvernig við byggjum þetta hús aftur
upp og hvert við ætlum að fara með
það. Styrkja stöðu þess og horfa
mikið stærra heldur en við höfum
gert. Með þessa þekkingu sem við
erum komnir með í dag þá vitum
við alveg hvert við getum farið með
það en þá þurfum við að hafa kaup-
staðinn með okkur í því. Þau sem
stýra bæjarmálunum mega eiga það
að þau hafa sýnt þessu áhuga, þau
hafa staðið þétt við bakið á okkur.
Við þurfum að halda gæðum í hús-
inu þannig að fólk vilji koma aftur
og aftur og það sé þess virði að
koma hingað inn. Svona hús er ekki
á hverju strái, okkur þarf að þykja
vænt um það og sjá til þess að það
vaxi og dafni næstu árin og ára-
tugina.“ segir Ísólfur að endingu.
vaks
„Við þurfum að gefa Bíóhöllinni
sterka og öfluga framtíðarsýn“
Ísólfur Haraldsson rekstraraðili Bíóhallarinnar. Ljósm. vaks.
Ísi og Mugison eftir tónleikana á
dögunum en 20 ár voru þá liðin frá því
hann hélt sína fyrstu tónleika í húsinu.
Ljósm. aðsend.
Sigurjón Bergsteinsson hefur starfað hjá Vinum Hallarinnar frá því hann var 14 ára.
Ljósm. Mummi Lú.
Bíóhöllin á Akranesi. Ljósm. vaks.
Smiðjutorgi, Smiðjuvöllum 32 • www.dotari.is
OPNUNARTÍMI
VIRKA DAGA KL. 11-19
HELGAR KL. 11-15
Verslum líka í heimabyggð
Smiðjutorgi, Smiðjuvöllum 32 • www.dotari.is
VELDU Á 990 KR/STK
HREKKJAVAKAN ER
BYRJUÐ HJÁ OKKUR
Þú finnur alltaf
eitthvað sniðugt í Dótarí!