Skessuhorn - 26.10.2022, Qupperneq 25

MIÐVIKUDAGUR 26. OKTÓBER 2022 25
Bjarni Guðmundsson prófessor og
fyrrum kennari við Landbúnaðar­
háskóla Íslands á Hvanneyri hefur
á liðnum árum skrifað fjölda bóka
um sitthvað sem tengist íslenskum
landbúnaði; sögu búskapar og
bútækni. Hefur hann með vinnu
sinni náð að skrá fjölmargar heim­
ildir sem hætt er við að ella hefðu
glatast. En nú á fyrsta degi vetrar
varpaði hann á veraldarvefinn nýj­
ustu afurð sinni, sem því er ekki
áþreifanleg líkt og fyrri bækur
hans, gefur út rafbók sem öllum
tölvu­ og símatengdum er aðgengi­
leg án endurgjalds.
Rafbók Bjarna nefnist „Hvann­
eyrar­pistlar Bjarna Guðmunds­
sonar: þættir um sögu og þróun
byggðarhverfis og búnaðarskóla.“
Eins og titillinn ber með sér skráir
Bjarni þarna ýmsar heimildir sem
hann hefur safnað í áranna rás og
tengjast Hvanneyri með einum eða
öðrum hætti, en að Hvanneyri kom
hann fyrst sem nemandi haustið
1961, eða fyrir réttu 61 ári. Pistlana
brýtur Þórunn Edda dóttir hans
um í rafbókarformið. Þarna eru
samankomnar á liðlega 180 síðum,
skreyttar allmörgum ljósmyndum
og teikningum, greinar sem allir
sem hafa áhuga á Hvanneyri og
sögu staðarins geta fært sér í nyt,
lesið í bútum milli mjalta og messu,
eða í einni beit; allt eftir behag.
„Nú ætla ég að bjóða þeim
vinum mínum, sem um hann sig
kæra, aðgang að bók, sem hjá mér
hefur orðið til á all­löngum tíma.
Uppátækið er dálítil tilraun mín í
anda tímanna til rafrænnar útgáfu
bókarefnis sem ólíklegt er að hafi
mjög almenna skírskotun,“ skrifaði
Bjarni þegar hann fylgdi nýjustu
afurð sinni úr hlaði á björtum fyrsta
vetrardegi. Rafbókin Hvanneyrar­
­pistlar Bjarna Guðmundssonar:
þættir um sögu og þróun byggðar­
hverfis og búnaðarskóla liggur á
vefslóðinni; issuu.com/bjgudm
mm
Í ár verða í fyrsta sinn haldnir Hall­
grímsdagar í Saurbæ í Hvalfirði. Þá
verður menningardagskrá í Hall­
grímskirkju í Saurbæ dagana 27.
­30. október, í tilefni af ártíð Hall­
gríms Péturssonar (1614 – 1674)
en dánardagur hans er 27. október.
Ekki er vitað með vissu hver er
fæðingardagur Hallgríms og því fær
dánardagur hans enn meira vægi.
27. október í fyrra var fræðslu­
skilti um Hallgrím Pétursson og
Guðríði Símonardóttur, konu
hans, afhjúpað á hlaðinu í Saurbæ.
Margrét Bóasdóttir, söngmála­
stjóri Þjóðkirkjunnar og ábúandi
í Saurbæ segir að í kjölfarið á því
hafi komið upp sú hugmynd að vera
með árlega dagskrá í kirkjunni, í
kringum þennan dag. „Við ræddum
það, sóknarnefndin og prestarnir,
að það væri ánægjulegt að nota fleiri
tækifæri til að halda minningu Hall­
gríms á lofti og þá lagði ég til hvort
við ættum ekki að stefna að því að
vera með árlega dagskrá í kringum
þennan dag. Núna erum við svo að
gera þetta í fyrsta sinn og ætlum að
láta þetta heita Hallgrímsdaga, eða
jafn vel Hallgrímsdaga að hausti,“
segir Margrét og bætir við að Hall­
grímsdagar að hausti sé jafn vel
betra heiti því að í Dymbilviku er
einnig dagskrá og á Föstudaginn
langa eru Passíusálmar Hallgríms
Péturssonar lesnir í heild sinni, það
séu því fleiri dagar á ári þar sem
Hallgríms er minnst.
Torfi K. Stefánsson Hjaltalín
vinnur nú að því að rita ævisögu
Hallgríms og mun hann lesa upp
úr óbirtu verki sínu á fimmtudags­
kvöldið 27. október og svara spurn­
ingum. Þá mun Benedikt Kristjáns­
son tenór syngja einsöng og einnig
með kirkjukór Saurbæjarprestakalls
hins forna þar sem Zsuzsanna Budai
er stjórnandi.
Á laugardaginn kl. 16 verða tón­
leikar í kirkjunni, þar er það tríóið
Sírajón sem mun flytja íslenska
og erlenda tónlist. Tríóið skipa
Laufey Sigurðardóttir á fiðlu,
Einar Jóhannesson á klarinett og
Anna Áslaug Ragnarsdóttir á píanó.
„Nafnið á tríóinu er tilkomið af
því að þau þrjú eru öll afkomendur
séra Jóns í Reykjahlíð, það er mjög
skemmtilegt og munu þau að spila
í um klukkustund,“ segir Mar­
grét. Aðgangseyrir á tónleikana eru
2.500 krónur.
Á sunnudaginn verður svo kvöld­
messa kl. 20.00 þar sem Benedikt
Kristjánsson tenór, kór Saurbæjar­
prestakalls og Zsusanna Budai sjá
um tónlista. Sr. Kristján Valur Ing­
ólfsson predikar en sr. Þóra Sig­
urðardóttir sér um messuna.
gbþ
Bjarni gefur út rafbók með pistlum um Hvanneyri
Bjarni Guðmundsson á Hvanneyri. Samsett mynd/ Þórunn Edda Bjarnadóttir.
Hallgrímsdagar að hausti haldnir í fyrsta sinn
Hallgrímskirkja í Saurbæ.
Benedikt Kristjánsson, tenór.
Kór Saurbæjarprestakalls.