Skinfaxi - 01.01.2020, Blaðsíða 11

S K I N FA X I 11
„Ég fór með vinum mínum í grunnskóla í skólabúðirnar á Reykjum
og man enn hvað það var skemmtileg upplifun. Ég vildi vinna meira
með börnum og vildi endilega fara á Laugarvatn þegar okkur stóð
það til boða í háskólanáminu okkar,“ segir María og heldur áfram:
„Þegar ég var á Reykjum velti ég því auðvitað ekkert fyrir mér hvað
væri á bak við alla leikina. Nú erum við búin að læra það og vitum af
hverju við áttum að gera hitt og þetta.“
Þær Margrét og María höfðu nóg að gera í Ungmennabúðum UMFÍ
á Laugarvatni. Þær voru í búðunum í tvær vikur, komu á mánudegi og
fóru svo á föstudegi eins og nemendurnir. Þær komu síðan aftur eftir
helgina og voru út þá viku með öðrum nemendahópi. Þær tóku virkan
þátt í starfinu í Ungmennabúðunum, skipulögðu útileiki og samskipta-
leiki, og leiki í íþróttasal, svokölluðum speglasal, og kvöldvökur. Þær
héldu dagbók tengda dvölinni og urðu að skila skýrslu til kennara síns
að náminu loknu.
„Það voru alltaf að bætast við verkefni hjá okkur. En við lærum meira
af því. Hér svo heimilislegt að okkur líður mjög vel,“ heldur María áfram.
Nemendur, sem dvelja í Ungmennabúðum UMFÍ, hafa nóg að gera dagana fimm sem
þeir dvelja þar með kennara. Farið er í ýmsa leiki á hverjum degi, bæði úti og inni.
Þegar frystir og viðrar til þess fara nemendurnir á skauta. Fjöldi kajaka er til í
Ungmennabúðunum og ef ekki er ís á vatninu (Laugarvatni) er hægt að sigla út á þeim.
Síðasta kvöldið í Ungmennabúðunum er heljarfjör, meðal annars sundlaugarpartí.
• Ungmennabúðir UMFÍ hófu starfsemi sína á Laugum í
Sælingsdal í Dalabyggð í byrjun árs 2005. Starfsemin var
flutt að Laugarvatni árið 2019.
• Ungmennabúðir UMFÍ eru fyrir nemendur í 9. bekk
grunnskóla. Nemendur eiga möguleika á að dvelja þar frá
mánudegi til föstudags við leik og störf.
• Viðburðir í búðunum eru í formi námskeiða sem tengjast
meginstoðum UMFÍ. Þær eru menning, útivist, hreyfing og
félagsfærni. Markmiðið með dvölinni er að styrkja félags-
færni ungmenna og efla vitund þeirra fyrir umhverfi sínu og
samfélagi ásamt mikilvægi þess að hafa heilbrigðan lífsstíl
að leiðarljósi.
• Árlega koma um 1.800 ungmenni í Ungmennabúðir UMFÍ.