Læknaneminn - 01.04.2010, Qupperneq 66

Fáir íslendingar þekkja vel til læknanáms í Ungverjalandi
og ýmsar spurningar hafa vaknað sem vonlegt er. Fólk spyr
sig gjarnan hvort námið sé metið á Islandi og hvers vegna svo
margir íslendingar hafi kosið að læra til læknis í Ungverjalandi.
Spurningar vakna ekki síst hjá þeim sem taka þá ákvörðun að
fljúga þessa 3300 km leið til lands sem þeir þekkja ekki vel og
ætla sér að búa þar í sex ár.
Ástæður og aðstæður þeirra sem útí þetta leggja eru mis-
jafnar en allir eiga það sameiginlegt að vilja sækja traustan og
góðan grunn í læknisfræði. Sjálf erum við nemendur á 4. ári
(Hafsteinn) og 2. ári (Katrín) við læknadeildina í Háskólanum í
Debrecen og vonumst til með að geta svarað helstu spurningum
sem hafa vaknað í tengslum við námið og háskólalífið hér úti.
Sem stendur stunda rúmlega 70 Islendingar læknanám í
Debrecen auk tveggja nema í tannlæknisfræði. Við þennan
hóp íslendinga bætast börn og makar. Nú þegar hafa 18
manns lokið héðan námi.
Borgin Debrecen er næst stærsta og fjölmennasta borg Ung-
verjalands á eftir höfuðborginni Búdapest. Hér búa rúmlega
200 þúsund manns en í Ungverjalandi búa alls um það bil
10 milljónir manna. Debrecen er vinaleg og hæglát borg í
um þriggja stunda fjarlægð austan af Búdapest, skammt frá
landamærum Rúmeníu. I borginni mætast gamli tíminn og sá
nýi en borgin var nánast lögð í rúst í síðari heimsstyrjöldinni
og merki kommúnismans blasa víða við hvort sem það í formi
bygginga eða þeirra sem hér búa. Á móti kemur að Debrecen
ber þess augljós merki að vera háskólaborg þar sem fjölskrúðugt
og fjölþjóðlegur hópur nemenda setur svip sinn á borgina og
efnahaginn. Borgin á sér mikla sögu og hefðir, bæði gamlar og
nýjar, sem gaman er að vera hluti af.
Háskólinn í Debrecen er einn sá stærsti í Ungverjalandi
og telur í heildina yfir 20 þúsund nemendur. Skólinn rekur
upphaf sitt til ársins 1912 en læknadeildin var aðskilin öðrum
deildum árið 1950. Skólinn hefur alið af sér marga merka
fræðimenn sem Ungverjar stæra sig af við flest tækifæri en
þess má til gamans geta að Ungverjar státa af næst flestum
Nóbelsverðlaunahöfum í heimi miðað við höfðatölu... á eftir
Islendingum auðvitað.
Læknadeildin er í raun tvískipt. Hún skiptist í ungverska
nemendur annars vegar og erlenda hins vegar. Deildin fyrir
erlenda nema er alþjóðleg og hana skipa nemendur frá hinum
ýmsu löndum; Taiwan, Vietnam, ísrael, Bandaríkjunum,
Svíþjóð, Noregi, Nígeríu, íran, írak, Bretlandi, Tyrklandi og
svona mætti áfram telja. Árlega hefja um það bil 300 erlendir
nemendur nám við deildina en brottfall er umtalsvert, sér í lagi
á fyrstu þremur árum námsins.
Námsfyrirkomulagið er í reynd ekki ólíkt því sem gengur
og gerist á íslandi þó sumpart sé það öðruvísi og hafi sína kosti
og galla. Haustönn hefst í byrjun september en vorönn i byrjun
febrúar. Á fyrstu þremur árunum er önnin 15 vikna löng með
áherslu bæði á bóklegt nám og verklega kennslu í líffærafræði á
fyrsta og öðru ári og meinafræði á þriðja ári þar sem krufningar
eru stór hluti námsefnisins. Nýlega var tekið upp nýtt kerfi fyrir
4. og 5. ár sem ætti að vera íslenskum læknanemum nokkuð
kunnugt, eins konar blokkakerfi. Tvær fimm vikna blokkir
með blönduðu bóklegu og verklegu námi og svo fjórar vikur í
verklegu námi, að þeim loknum, auk próftímabils. Sjötta árið
er síðan að öllu leyti verklegt, ekki ósvipað kandidats árinu á
íslandi, sem lýkur síðan með embættisprófi og leyfisveitingu.
Læknaleyfið gildir á Evrópska efnahagssvæðinu og er því
fullgilt á íslandi sem og annars staðar innan ESB svæðisins.
Allur gangur er á þvi hvað læknar héðan hafa kosið að gera að
lokinni útskrift. Flestir hafa haldið heim á klakann en þó hafa
nokkrir kosið að halda annað til frekara náms eða vinnu.
Próftímabilið og prófafyrirkomulagið er töluvert öðruvísi
en á íslandi. Flest lokapróf (með nokkrum undantekningum
á fyrstu árunum) eru munnleg að öllu leyti eða skiptast í
skriflegan, verklegan og munnlegan hluta. Próftímabilið sjálft
er sex vikna langt og nemendur geta stjórnað því nokkurn
veginn sjálfir hvenær þeir skrá sig í hvert próf eftir því hvað
þeim hentar best. Þannig geta þeir sem standa sig vel yfir
önnina átt þann kost að ljúka sínum lokaprófum á styttri tíma
en aðrir sem kjósa að nýta sex vikna rammann til hins ýtrasta.
Flestir erlendir nemendur við skólann fara fljótlega út á hinn
almenna leigumarkað eftir að þeir koma til Debrecen. Sumir
kjósa að nýta sér heimavist sem stendur nemendum til boða.
Skólagjöldin eru sambærileg við aðra háskóla í Evrópu en eru
þó töluvert hærri en við eigum að venjast heima en íslenskir
nemendur geta sótt um bæði skólagjaldalán og framfærslulán
hjá LÍN - Lánasjóði íslenskra námsmanna. Þau lán duga
flestum vel þrátt fyrir að kreppan hafi sett ansi stórt strik í
reikninginn hjá mörgum líkt og hún hefur gert heima á Islandi
og víðar.
Við vonumst til að hafa svarað því helsta sem varðar námið
og veruna hér í Ungverjalandi og segjum fyrir okkar leyti að
við erum afskaplega ánægð með þá ákvörðun að hafa lagt
upp í þetta ævintýri og teljum okkur hafa hér tækifæri til að
byggja störf okkar í framtíðinni á viðamiklum og traustum
þekkingargrunni í læknisfræði.
Allar helstu upplýsingar varðandi inntökupróf og annað
sem við kemur skólanum má finna á eftirfarandi vefsíðum:
Ungverjaland.net
Edu.dote.hu
Fmsa.hu
Hafsteinn Daníel
Katrín Björg