Ársrit Torfhildar - 01.11.1990, Page 3

Frá ritnefnd:
Viss rök má færa fyrir því að fjórði árgangur Ársrits Torfhildar
sé nokkrum mánuðum á eftir áætlun. Haustið er liðið, veturinn
hefur lagt garðinn undir sig og bráðum koma jólin. Gert er ráð
fyrir því að ritið komi út í lok hvers vetrar, en heimurinn er
óútreiknanlegur, vorið leið án þess að það liti dagsins ljós. Síðan
kom ofbirta sumarsins og öll vitræn starfsemi lagðist niður. Svo
tóku döpur haustlauf að fjúka eins og í ljóðum Lesbókarinnar,
ritnefndin snéri heim frá sólarlöndum og tók til starfa.
Ársrit Torfhildar er metnaðarfullt rit sem birtir skáldskap og
greinar um bókmenntir. Höfundar efnisins eru misreyndir
pennar, nemendur í almennri bókmenntafræði við Háskóla
Islands, og sumir þeirra hafa þegar getið sér orð fyrir skrif sín.
Það er trú okkar og vissa að efni ritsins sé þarft og gott innlegg í
bókmennta-og skáldskaparumræðu samtímans.
l