Goðasteinn - 01.09.2009, Page 26

Goðasteinn 2009
Þeir voru allir mjög þreyttir og flestir með einhvern höfuðverk. Einn hafði farið að
sýna einkenni um versnandi hæðarveiki og var hann drifinn niður á undan hinum.
Eftir matinn var pakkað saman og haldið aftur af stað því við áttum eftir um
þriggja stunda göngu í tjaldstað við Horombo-skála í 3700 metra hæð. Við fórum
niður af fjallinu um Marangu-leiðina. Þarna eru breiðir og fínir göngustígar og
fullt af fólki. Við vorum komin í tjaldstað um kl. 18. Á einum og hálfum
sólarhring höfðum við verið á göngu í um 17 tíma og sofið í 2-3 klst.
Við Horombo-skálann er fullt af húsum, svipuðum þeim sem eru á hálendinu
hér á landi. Þarna voru nokkur hundruð manns saman komin. Eftir kvöldmat
fórum við að sofa og tjaldið hristist til og frá í vindinum.
29. ágúst
Við vorum vöknuð eftir um 8 tíma svefn og Tyrfingur orðinn frískur. Allt var
rykugt í tjaldinu eftir vindinn um nóttina og þykkt ryklag var yfir klósettinu.
Við gengum af stað um kl. 8 og þegar líða tók á daginn mættum við hverjum
gönguhópnum á eftir öðrum. Það voru mikil viðbrigði frá Rongai-leiðinni þar sem
við vorum nánast ein í heiminum. Við borðuðum hádegisnestið við Marangu-
skálann en hann er neðsti skálinn á Marangu-leiðinni. Nú vorum við komin niður í
laufskóg og sáum nokkra bláapa að leik í trjánum og litskrúðugan fugl, líkan
páfagauki. Gangan endaði við Marangu-hliðið sem er aðalhliðið inn og út úr
Kilimanjaro-þjóðgarðinum. Burðarmennirnir voru komnir niður löngu á undan
okkur, búnir að fara heim í bað og skipta um föt. Þeir kvöddu okkur með
Kilimanjaro-söngnum, þeim sama og leiðsögumennirnir sungu um nóttina þegar
við gengum á toppinn. Stuttur akstur var á hótelið þar sem við fórum beint í sturtu
- og hvað við vorum rykug! Síðan settumst við öll með langþráðan og verðskuld-
aðan bjór við sundlaugarbakkann og horfðum á fjallið í lauginni. Að sjálfsögðu
varð Kilimanjaro-bjórinn fyrir valinu.
Leiðsögumennirnir komu á hótelið til okkar um kvöldið og afhentu okkur
viðurkenningarskjöl. Við gáfum hverjum þeirra litla flösku af íslensku brennivíni,
spurning hvernig þeim hefur líkað bragðið.
24