Goðasteinn - 01.09.2009, Qupperneq 63

Goðasteinn 2009
einhverjum tíma, jafnvel eftir að jörð Jörundar goða fór í eyði, verið haft um land
goðans, þ.e. Jörundar goða eða sonar hans Ulfs aurgoða en ekki goðanna í
merkingu guðanna sem tignaðir voru í heiðni? Og svæði það sem þeir fóru um og
nefna Goðaland hafi verið þar sem nú heitir Kanastaðir, „fagurt, grasgefið
landsvæði sem byggt var til forna“?
Sagan, örnefnin og staðhættirnir hreyfa við hugarfluginu. En vissar mótsagnir
og ónákvæmni í tiltækum heimildum koma í veg fyrir ákveðin svör. Samt sem
áður ætti áhugafólk um sagnaarfinn og ferðafólk sem á leið um þessar slóðir að
geta haft nokkra ánægju af að velta þessum hlutum fyrir sér.
Fleiri spurningum mætti varpa fram um forna byggð og ferðaleiðir á þessu
svæði. Svo sem þeirri hvort byggð hafi ennþá verið í Bólstað undir Einhyrningi er
Njáluhetjur riðu um héruð og Kári þurft að forðast þá er þar kunna að hafa búið.
Eða hvort Flosi og fjölmennur flokkur hans hafi getað dulist öðrum ferðamönnum
sem leið kunna að hafa átt um Fjallabak á sama tíma. Slíkt hefði krafist seinfar-
inna krókaleiða og mjög tafið för brennumanna sem sagan lætur bera mjög hratt
yfir miðað við vegalengdir.
Þannig mætti áfram spyrja og spá. En þá fer gjarnan sem fyrr að sagnfræðin og
skáldskapurinn vilja renna saman. Kannski er það meira og minna óhjákvæmilegt
í allri túlkun fornra heimilda. Ósjálfrátt förum við að lesa á milli línanna hvert
með sínurn hætti eftir því sem áhugi og ímyndunarafl endist til. Þá spillir ekki að
reyna að lesa í landið, örnefnin og umbreytingar náttúrunnar, kynna sér
sögusviðið eftir því sem kostur er og máta við hinar rituðu heimildir.
61