Goðasteinn - 01.09.2009, Side 101

Goðasteinn 2009
Rangárvallaprófastsdæmi
Messufjöldi og aðrar tölur
I Rangárvallaprófastsdæmi eru fjögur prestaköll með 16 sóknum og jafnmörgum
sóknarkirkjum. Að auki eru þrjú guðshús sem skilgreinast sem kapellur eða bæn-
hús.
Árið 2007 voru almennar guðsþjónustur í prófastsdæminu 138 talsins og aðrar
guðsþjónustur s.s. helgi- og bænastundir 56 talsins. Barnaguðsþjónustur, kirkju-
skóli og samverustundir með börnum voru 133. Alls eru þetta 327 athafnir. Fermd
voru 50 ungmenni, 64 börn borin til skírnar, hjónavígslur voru 28 og greftranir 22.
Erfitt er að tíunda þau miklu störf sem unnin eru á vegum kirkjunnar í hverju
prestakalli. Mjög stór hluti af starfi sóknarprestsins er þess eðlis að ekki verður
um það fjallað á almennum vettvangi. Starf sóknarprestsins er í mörgu bundið
algjörum trúnaði við þann sem til prestsins leitar. Er trúnaðurinn grundvöllur þess
að sóknarbörnin geti af einlægni leitað til prestsins með sín innstu og erfiðustu
mál. Sálusorgun er og á að vera mikilvægur þáttur í starfi hvers sóknarprests.
Allar tölur um starf sóknarprestanna eru því einungis vísbendingar um það sem
borið er á borð fyrir almenning en segir lítið um heildarstarf sóknarprestsins.
Sóknarprestar, kórfólk og organistar prófastsdæmisins hafa leitað leiða til að
auka fjölbreytni í messuflutningi og hafa verið áhugasamir um að leggja sitt af
mörkum í þessum efnum. Auk hefðbundins helgihalds hafa barna- og fjölskyldu-
messur verið í heiðri hafðar þar sem leitast hefur verið við að hafa létta og
skemmtilega sálma til flutnings. Blásið hefur verið til „hestamessa“ en þá hefur
fólk tekið sig saman og komið ríðandi til kirkju, Passíusálmar eru lesnir á föst-
unni, helgistundir eru í dymbilviku, fjölbreytileg aðventukvöld í flestum kirkjum
o.s. frv.
Af öllu ofangreindu má ljóst vera að mikill er sá fjöldi sem leggur fram krafta
sína og tíma í kirkjustarf í prestaköllunum sem sýnir að verulegur áhugi er í
söfnuðunum á að glæða safnaðarstarfið meira lífi og gera það sem fjölbreytilegast.
99