Tímarit Máls og menningar - 01.06.1993, Page 42
Eftirmáli þýðanda
Julio Cortázar fæddist í Brussel 1914. Foreldrar hans voru frá Argentínu
og fjölskyldan fluttist til heimalandsins 1919. Hann lærði til kennara og
las bókmenntir í Buenos Aires, en kenndi síðan úti á landi, fyrst í
ófrægum kaupstöðum sléttunnar og síðar í Mendoza, við rætur Andes-
fjalla. Hann sagði upp stöðu sinni þar eftir að fasistar höfðu lagt undir
sig háskólann og hélt til starfa við bókaútgáfu í Buenos Aires. Árið 1951
sigldi hann til Frakklands, hafði fengið styrk til skammrar dvalar. En mál
æxluðust á þann veg að hann settist að í París og bjó þar uns hann lést
árið 1984.
Eitt þekktasta verk hans er skáldsagan (andsagan) Rayuela, sem kom
út í Buenos Aires árið 1963 (hér er þýtt eftir útgáfu Edhasa/Sudamericana
frá 1977). í þeirri bók er djassfólk víða nefnt til sögunnar og þar er líka
að finna þessa skáldlegu hugleiðingu um eðli djassins sem ég freistaðist
til að íslenska. Julio Cortázar var á heimavelli í djassmúsík, lengsta
smásaga hans, E1 perseguidor, byggir á ævi saxófónleikarans Charlie
Parkers og sjálfur blés hann í trompet í frístundum.
Ský sem hunsar öll landamæri — kallar hann djassinn, og var sjálfur
Argentínumaður fæddur í Belgíu, sem bjó lengst af í París.
40
TMM 1993:2