Skólavarðan - 01.06.2001, Qupperneq 2

Stjórn Kennarasambands Íslands ákvað á fundi sínum í lok apríl að
næsta þing sambandsins skyldi haldið dagana 8. til 9. mars árið 2002 í
Borgartúni 6. Þessi ákvörðun er í samræmi við þá samþykkt stofnþings að
annað þing Kennarasambandsins skuli haldið fyrri hluta árs 2002. Aðild-
arfélög sambandsins munu halda aðalfundi í tengslum við þingið eða fyrr
eftir atvikum. Gera má ráð fyrir að um 180 fulltrúar eigi rétt til setu á
þinginu. Þótt enn sé alllangt til þings er vinna við undirbúning þó að
komast í gang. Laganefnd mun hefja störf í júní en henni er ætlað að taka
lög sambandsins til skoðunar og leggja breytingatillögur fyrir þingið ef
ástæða þykir til. Uppstillinganefnd mun einnig funda í byrjun júní, aðal-
starf hennar hefst þó ekki fyrr en í haust en hún skal auglýsa eftir fram-
boðum í trúnaðarstöður innan Kennarasambands Íslands sex mánuðum
fyrir þing.
Stjórn Kennarasambandsins hélt tveggja daga vinnufund dagana 18. til
19. maí sl. þar sem m.a. var rætt um reynsluna af starfsemi sambandsins á
yfirstandandi kjörtímabili og væntanlegan undirbúning þings. Auk stjórn-
ar sátu fundinn meðal annarra formaður og varaformaður Félags íslenskra
leikskólakennara en eins og allir vita fær það félag aðild að Kennarasam-
bandinu um miðjan september nk. Nú standa fyrir dyrum fundir með
fulltrúum leikskólakennara til þess að ræða þær breytingar sem verða á
starfsemi og starfsmannahaldi Kennarasambandsins við inngöngu félags
þeirra. Einnig er fram undan endurskipulagning á nýtingu kjallarans í
Kennarahúsinu sem miðar að því að öll starfsemi Kennarasambandsins,
nema stærri fundir, rúmist í húsinu.
Eins og að framan greinir er í mörg horn að líta á næstu mánuðum og
mikilvægt að félagsmenn allir beiti sér fyrir lifandi umræðu um málefni
Kennarasambandsins og leggi þannig sitt af mörkum til þess að efla sam-
tökin. Þörfin fyrir öflug stéttarsamtök á borð við Kennarasamband Íslands
er brýn og styrkur þeirra felst fyrst og fremst í öflugum og áhugasömum
félagsmönnum sem eru tilbúnir til að leggja sig fram í áframhaldandi bar-
áttu fyrir bættu skólastarfi og enn betri kjörum kennara og skólastjóra.
Með þetta að markmiði skulum við horfa bjartsýn fram á veginn og
vona að annað þing Kennarasambands Íslands marki nýtt upphaf að sókn
til enn betri kjara.
Eiríkur Jónsson
Formannspist i l l
Þing og aðalfundir félaga
3