Þjóðmál - 01.06.2014, Síða 33

32 Þjóðmál SUmAR 2014
barst honum bréf frá Jóni Guðmundssyni
þar sem þessar línur er að finna:
Ættartalan þín — eður lángfeðgatal til
Lopts riddara ríka, læt eg fylgja hérmeð;
fáir sem aungir, og víst aungir, sem brúka
aðallega innsiglin,* geta hrósað því að
vera komnir frá vorum fornu riddurum
í kallalegg: — ergo: eg óska þér minn
eðalborni til lukku .4
Jón forseti fór alla tíð fínt með þessa dýr-
mætu vitneskju . En hún barst hratt og
örugg lega á milli Íslendinga í Kaup-
mannahöfn og hér heima og hefur
áreið anlega átt þátt í því að efla trú að-
dá endahópsins á forystu hlutverk hans í
stjórn málum . Þetta má glöggt lesa úr hyll-
ingarkvæði sem ungur vinur hans, Gísli
Bryn júlfsson, orti rétt fyrir þjóð fund inn
1851 . Það byrjar svona:
Jón! af öldnu kappa kyni
kominn beint af Guttormssyni,
þeim, sem ætthring æðstan hóf
Ísalands um fjalladali .
Fálkinn í innsiglinu, sem Jóni var fært að
gjöf með kvæðinu, var á þessum tíma talinn
hafa verið í skjaldarmerki Lopts riddara .
Um Jón forseta hefur meira verið skrifað
en um nokkurn annan Íslending fyrr og
síðar . En fræðimenn hafa ekki gefið þessum
þætti er snýr að sjálfsmynd hans gaum, þótt
fullt tilefni sé til þess .
4 Bréf til Jóns Sigurðssonar. Úrval . 2 . bindi, Reykjavík 1984,
bls . 100 .
* Hér mun vísað til séra Hannesar Stephensen, prófasts á Görðum á Akranesi og alþingismanns, eins nánasta
samherja Jónanna tveggja í stjórnfrelsisbaráttunni . Hann var á sinni tíð talinn ættgöfugastur manna á Íslandi,
sonur Stefáns Stephensens amtmanns og tengdasonur Magnúsar bróður hans Stephensens dómstjóra . Við lát
Magnúsar eignaðist Hannes innsigli hans . Á því var skjaldarmerki með riddarahjálmi og tveimur prjónandi
einhyrningum, nákvæm eftirmynd af ættarmerki forföður þeirra, aðalsmannsins Eggerts Hannessonar
hirðstjóra . En munurinn á Hannesi og Jóni Sigurðssyni var sá að Hannes var ekki kominn af eðalbornum
manni í beinan karllegg en það héldu menn um Jón .
Konunglegur páfagaukur sem setti svip á heimilislíf
Ingibjargar Einarsdóttur og Jóns Sigurðssonar í
Kaup mannahöfn . Teikning Sigga litla, bróðursonar
Jóns, sem þau Ingibjörg og Jón fóstruðu . Í hand-
rita safni Jóns er skrautrituð ættartala Sigga þar sem
m .a . er rakinn skyldleiki hans við Danakonunga
af Aldin borgar ætt . Er hún vafalaust frá þeim tíma
þegar hann bjó á heimilinu . Ættartalan sýnir að Jón
og Siggi hafa skrafað eitthvað um göfuga frændur
sína og forfeður .