Morgunblaðið - 19.05.1982, Blaðsíða 8
48
MORGUNBLAÐIÐ, MIÐVIKUDAGUR 19. MAÍ 1982
Sýning stóðhestastöðvar BI:
Margir kallaðir
en fáir útvaldir
ÁRLEG sýning stódhestastödvar
Búnaðarfélags Islands var haldin sl.
laugardag á hestakosti stöðvarinnar.
Að þessu sinni var sýningin haldin
að Gunnarsholti, en eins og kunnugt
er flutti stöðin starfsemi sína þangað
austur síðastliðið haust. Alls voru
sýndir tuttugu og einn hestur í reið,
en einnig voru yngstu folarnir
teymdir ÚL Þrátt fyrir óhagstætt veð-
ur til sýningar létu áhorfendur sig
ekki vanta.
Af þessum rúmlega tuttugu fol-
um voru átta fjögurra vetra, átta
fimm vetra, fjórir sex vetra og
einn átta vetra. Eins og gefur að
skilja voru folarnir misjafnir að
gæðum og getu og sýndist sitt
hverjum um kynbótagildi folanna.
En áður en menn fella dóm er rétt
að gera sér Ijóst við hvaða aðstæð-
ur þeir voru sýndir. Eins og áður
segir var veður leiðinlegt, hvass-
viðri og gekk á með éljum. í öðru
lagi var völlurinn, sem var sléttur
túnskiki meðfram girðingu, mjög
blautur og þungur yfirferðar. Að
sögn sýnenda hafði folunum aldrei
verið riðið þarna áður og þegar
ungir og óharðnaðir folar koma á
ókunnar slóðir með bílaraðir á
báða vegu er ekki við því að búast
að þeir sýni allt það besta sem í
þeim býr. Þessi atriði er rétt að
hafa í huga þá felldur er dómur.
Misjafn sauður
í mörgu fé
Að dómi undirritaðs er ekki
ósenniegt að tæpur helmingur fol-
anna verði nothæfir og fjórir til
fimm nái e.t.v. fyrstu verðlaunum.
Einkum voru það tveir hestar sem
skáru sig úr að gæðum. Báðir eru
þeir fjögurra vetra og jarpir. Ann-
ar þeirra Torfi frá Torfastöðum,
er undan Sörla 653 frá Sauðár-
króki og Tíbrá 4259 frá Ólafsvöll-
um.
Hinn folinn er Hörður frá Hvoli
undan Náttfara 776 frá Ytra-
Dalsgerði og móðir er Puma 4255
frá Arbæ. Eigandi er Bjarni Sig-
urðsson, Hvoli. Það sem einkenndi
þessa fola báða var fyrst og
fremst gott geðslag og góðir hæfi-
leikar. Torfi virtist hafa betri
byggingu og betri klárgang en
Hörður hefur betra skeið og senni-
lega meiri vilja. Ekki er ósennilegt
að hér séu á ferðinni topphestar
framtíðarinnar.
Aðrir hestar sem vert er að
minnast á eru Ýmir frá Ysta-Bæli.
Faðir er Blesi 577 frá Núpakoti og
móðir Grána frá Ysta-Bæli, u.
Grána 452. Ýmir var sýndur á
fjórðungsmótinu á Hellu sl. sumar
og stóð hann efstur í flokki fimm
vetra stóðhesta. Hann er jafnvíg-
ur á allan gang þó ekki sýni hann
sérstök tilþrif á skeiði að þessu
sinni. Það sem helst má að honum
finna er stuttur háls. Neró frá
Bjarnarhöfn olli nokkrum von-
brigðum, en hann var sá foli sem
leit hvað best út á sýningunni í
fyrra og bjóst maður kannski við
of miklu núna. Það er e.t.v. rétt að
taka það fram að allan tímann
meðan Neró var sýndur gengu
hvöss haglél yfir og hefur það
sjálfsagt haft sitt að segja. En
þrátt fyrir þetta sýndi hann góða
takta og framtíð hans er vafalaust
björt. Síðan má nefna hesta eins
og Flugar, fimm vetra hest frá
Flugumýri, undan Gusti 680 frá
Hólum og Hrefnu 4576 frá Flugu-
mýri. Fer fallega í reið en full
smár. Hólmi frá Stykkishólmi
fjögurra vetra undan Hlyni 910
frá Báreksstöðum og Þotu 3210 frá
Innra-Leiti. Kraftmikill og rúmur
en lítið taminn og ósettur. Hóla-
Blesi, fimm vetra undan Rauð 618
frá Stokkhólma og Kolbrúnu 3440
frá Hólum. Fallegur töltari en
frekar smár. Mósi frá Flugumýri
fimm vetra undan Gusti 680 frá
Hólum og Kengálu frá Flugumýri.
Fallega byggður klárhestur með
tölti. Verðandi frá Gullberastöð-
um, fimm vetra undan Hlyni 910
frá Báreksstöðum og Hélu frá
Gullberastöðum. Vel rúmur á öll-
um gangi en full þunglamaleg
bygging. Prati frá Hlöðutúni fjög-
urra vetra undan Hrannari frá
Hlöðum og Nótt frá Hlöðum.
Þokkalega byggður, hæfileikamik-
ill og væntanlega flugvakur. Sval-
ur frá Svignaskarði átta vetra
undan Kul 746 frá Eyrarbakka og
Ljónslöpp 2958 frá Svignaskarði.
Myndarlegur klárhestur með tölti,
vel viljugur. Ekki er ástæða til að
nefna fleiri fola að sinni en fróð-
legt verður að fylgjast með þess-
um folum á grýttum vegi kynbót-
anna í náinni framtíð.
Aukinn áhugi almennings
á starfi stöðvarinnar
Ef marka má þann mikla fjölda
sem fylgdist með sýningunni á
laugardag er áhugi almennings
fyrir því sem er að gerast í stöð-
inni stöðugt að aukast. Stöðin hef-
ur nú verið starfrækt í tæpan ára-
tug og var starfsemin töluvert
gagnrýnd á fyrstu árunum en nú á
seinni árum hafa óánægju raddir
farið lækkandi. Ekki er ósennilegt
að ástæðan fyrir þessari óánægju
hafi m.a. verið sú, að mönnum hafi
sárnað að fá folana sína senda
heim án eistna og með reikning
fyrir fóður. Síðan hefur runnið
upp ljós fyrir mönnum að sá
kostnaður sem þeir þurfa að
greiða fyrir folana til fimm vetra
aldurs er aðeins brot af því sem
það kostaði þá sjálfa að ala folana
upp og temja. Svo ekki sé nú talað
um þá fyrirhöfn sem fylgir stóð-
hestahaldi einstaklinga. Einnig er
almennur áhugi fyrir hrossarækt
að aukast og eru þéttbýlismenn
farnir að fylgjast með og jafnvel
taka þátt í því í töluverðum mæli.
Ekki verður svo við skilið að
ekki sé minnst á hina nýju og
stórbættu aðstöðu stöðvarinnar.
En eins og áður sagði var starf-
semin flutt frá Litla-Hrauni síð-
astliðið haust. Að vísu er ekki um
að ræða neina sérhönnun hvorki á
hesthúsinu né annarri aðstöðu en
eigi að síður er þetta allt annað og
betra líf að sögn starfsmanna
stöðvarinnar. Að sögn Þorkels
Bjarnasonar er samið um fimm
ára leigu á hesthúsinu og til
fimmtíu ára um aðstöðu á staðn-
um þ.e. í Gunnarsholti. í ráði mun
að byggja hesthús undir stöðina
innan fimm ára en einnig kvað
hann að tryggja þyrfti starfsfólki
stöðvarinnar húsnæði.
Að lokinni sýningu reiðfæru fol-
anna voru ungfolarnir teknir út og
skoðaðir og vöktu sérstaklega at-
hygli folar undan Hrafni 802 frá
Holtsmúla en ekki skal farið nán-
ar útí þá sálma hér, þeir fá vænt-
anlega sín tækifæri til að sanna
sitt ágæti.
Veitingasala var í mötuneyti
Landgræðslunnar og er það í
fyrsta skipti sem boðið er upp á
siíka þjónustu á sýningum stöðv-
arinnar.
Ekki var annað að heyra en að
menn gerðu góðan róm að þessum
nýju heimkynnum stöðvarinnar
og er það e.t.v. sannmæli sem ein-
um varð á orði: „Nú er stöðin loks-
ins komin heim.“
VK
Það er hátt til lofts og vítt til veggja í húsi því er hýsir hestakost stöðvarinnar. Kemur sér vel að hafa breiðan
fóðurgang þegar fjölmennt er á sýningardegi.
Höður frá Hvoli vakti athygli fyrir góð skeiðtilþrif og Ijúfa hind. Minnti hann
óneitanlega á föður sinn, Náttfara 776 fri Ytra-Dalsgerði. Knapi er Páll B.
Pálsson.
Torfi frá Torfastöðum gaf fraenda sínum frá Hvoli ekkert eftir í reiðhesta-
kostum. Virtist hesturinn búa yfir afbragðsgóðu brokki og tölti og þegar því
fylgir góð lund, þá er von á góðu. Torfi er undan beiðursverðlaunahestinum
Sörla 653 frá Sauðárkróki.
Það vakti bæði vonir og kæti að sjá ungfolana fara á svifmiklu brokki undir
sjálfum sér. Hér er á ferðinni einn af sonum Hrafns 802 frá Holtsmúla. Á
hlið hans má sjá frostmerkingu, en tilraunir með slíkt hafa verið gerðar á
stöðinnL
Einn best byggði hestur stöðvarinnar að sögn Þorkels Bjarnasonar hrossa-
ræktarráðunauts mun vera Mósi frá Flugumýri.