Morgunblaðið - 10.08.2002, Side 27

ÚR VESTURHEIMI
MORGUNBLAÐIÐ LAUGARDAGUR 10. ÁGÚST 2002 27
,,HÁTÍÐIN tókst mjög vel og við er-
um mjög ánægð með framgang
mála,“ sagði Tim Arnason, forseti Ís-
lendingadagsnefndar, þegar þessari
mestu hátíð Manitoba lauk. Hann
sagði að lykillinn að velgengni hátíð-
arinnar fælist fyrst og fremst í stöð-
ugleikanum, þar sem fjölskyldan
væri í fyrirrúmi. Hátíðin væri líka
haldin til að minnast þeirra sem
hefðu rutt brautina og lagt grunninn
að lífi afkomendanna auk þess sem
tengslin við Ísland væru áréttuð með
þessum hætti. ,,Íslendingadagurinn
tengir okkur við ræturnar.“
Einn af hornsteinunum
William Barlow, bæjarstjóri í
Gimli, tekur í sama streng. Hann
segir að hátíðin hafi margvíslega
þýðingu og skipti Gimli miklu máli.
Hún haldi merki Íslendinga á lofti og
ekki síst þeirra sem hafi fórnað svo
miklu til að byggja upp nýtt sam-
félag sem allir kunni nú svo vel að
meta. ,,Þetta er hluti kanadísku sög-
unnar, menningararfleifðarinnar, og
Íslendingadagurinn er einn af horn-
steinum samfélagsins.“
Um 1.700 manns búa í Gimli og um
3.200 á svæðinu í kring en frá og með
næstu áramótum verður um eitt
sveitarfélag að ræða. Allajafna er
mjög rólegt í bænum en annað er
uppi á teningnum um þessa árlegu
hátíðarhelgi. Kvikmyndahátíð við
,,haf sléttunnar“ setur skemmtileg-
an svip á viðburðinn og segir Janis
Guðrún Johnson, formaður kvik-
myndahátíðarnefndar og öldunga-
deildarþingmaður, að vonir standi til
að hún veki athygli víða um heim í
náinni framtíð. Golfmót til styrktar
vikublaðinu Lögbergi-Heimskringlu
fellur vel inn í umgjörðina og allir
finna eitthvað við sitt hæfi í dagskrá
Íslendingadagsnefndar. Á hverju ári
er bryddað upp á einhverju nýju og
undanfarin ár hafa íslenskir lista-
menn sett svip sinn á hátíðina. Söng-
leikurinn Gunnar á Hlíðarenda vakti
mikla athygli og er ekki ofmælt að
segja að Sunnlendingarnir hafi sleg-
ið í gegn.
Barlow segir að umhverfið hafi
mikið að segja. Gimli sé við Winni-
pegvatn, sem sé gjarnan nefnt haf
sléttunnar, og nánasta svæði sé mjög
heillandi. Sagan sé auk þess áhrifa-
mikil og veki athygli víða um heim.
Bærinn hafi lagt mikið af mörkum til
að efla ímyndina og miklum fjármun-
um hafi verið varið í uppbyggingu. Í
því sambandi nefnir hann að þegar
Vigdís Finnbogadóttir, fyrrverandi
forseti Íslands, hafi heimsótt Gimli
1989 hafi verið um 15 hótelherbergi í
bænum en nú séu þau 130 til 140 og
mikill hluti þeirra í háum gæða-
flokki. Þrír veitingastaðir hafi verið í
Gimli fyrir 13 árum en nú geti marg-
ir staðir tekið á móti samtals um
1.100 gestum samtímis. Verslunum
hafi líka fjölgað til muna og allt þetta
og meira til geri það að verkum að
Gimli sé áhugaverður bær til að
heimsækja. ,,Við köllum Gimli höf-
uðborg Nýja-Íslands og tengjum
bæinn þannig sérstaklega við Ísland,
en Íslendingadagurinn tryggir með-
al annars að sagan heldur áfram.“
Fjallkonan í hávegum höfð
Fjallkonan skipar veglegasta sess
á þessari hátíð og sagði Constance
Carol Magnusson, fjallkonan í ár, að
sér væri mikill heiður sýndur. Hún
sagði að ræturnar skiptu mjög miklu
máli og mikilvægt væri að kenna
börnunum mikið meira en afi, amma
og elskan á íslensku. Kenna þyrfti
þeim að syngja Bí,bí og blaka og
Gimli valsinn og Íslendingasögurnar
væru kjörinn vettvangur til að kynna
þeim landið og fornbókmenntirnar.
Connie sagði að Snorraverkefnin á
Íslandi og í Manitoba væru mjög
mikilvæg og hún hvatti forráðamenn
unga fólksins til að gera því kleift að
taka þátt í þessum verkefnum því
þannig væri tengslunum best við
haldið. Timothy Samson flutti minni
Íslands og tók í sama streng en
Hjálmar Waag Hannesson, sendi-
herra Íslands í Ottawa, og Eiður
Guðnason sendiherra, aðalræðis-
maður í Winnipeg, voru á meðal
þeirra sem fluttu ávörp.
Mikilvæg hátíð
Jón Kristjánsson heilbrigðisráð-
herra var heiðursgestur og flutti
minni Kanada. Eftir að hátíðinni
hafði verið slitið formlega sagði hann
að hún hefði komið sér á óvart. ,,Ég
hef oft komið til Kanada en þetta er í
fyrsta sinn sem ég kem til Manitoba
og það sem kom mér mest á óvart
var hvað þessi hátíð er tengd Ís-
landi,“ sagði hann og bætti við að
gaman væri að taka þátt í svona við-
burði þar sem fólk kæmi víða að til
að hitta ættingja og vini. Í því sam-
bandi nefndi hann að til sín hefðu
komið hjón frá Saskatchewan, sem
hefðu búið þar í 30 ár og í ljós hefði
komið að hann væri náskyldur þeim,
þau væru þremenningar. Tvær kon-
ur hefðu líka komið til sín með
kveðju frá aldraðri konu á elliheimili
í Norður-Dakóta. Þær hefðu fært sér
handskrifað bréf frá konunni og það
hefði byrjað með orðunum „kæri
frændi“.
,,Það er mikil upplifun og sterk að
vera staddur í miðri Norður-Amer-
íku og fá slíkar kveðjur,“ sagði Jón.
Íslendingadagurinn er mjög mik-
ilvægur fyrir fólk af íslenskum ætt-
um og Jón Kristjánsson segir að
hann hafi líka mikla þýðingu fyrir Ís-
land og samskiptin milli Íslands og
Kanada hafi aukist mikið undanfarin
misseri eftir að ræðismannsskrif-
stofa hefði verið opnuð í Winnipeg og
sendiráð í Ottawa. ,,Það er afskap-
lega mikilvægt að rækta þessi sam-
skipti,“ segir hann og bendir á að
miklir möguleikar séu fyrir hendi í
þessum samskiptum á ýmsum svið-
um. ,,Þessi hátíð er því gífurlega
mikilvæg.“
steg@mbl.is
Íslendingadagurinn er
tenging við ræturnar
Íslendingadagurinn er elsta menningar-
hátíðin í Kanada, en þessi árlega fjögurra
daga skemmtun fór fram í Gimli um liðna
helgi. Hún hefur nú verið haldin 113 sinnum
og í Gimli síðan 1932. Steinþór Guð-
bjartsson var á meðal um 50.000 gesta
og ræddi við mann og annan.
Á meðal um 50.000 gesta á menningarhátíðinni var um 50
manna ánægður hópur frá Rotaryfélagi Hafnarfjarðar.
Söngleikurinn Gunnar á Hlíðarenda vakti mikla lukku á há-
tíðinni og listamönnunum var tekið fagnandi.
Bill Barlow, bæjarstjóri í Gimli, segir Íslendingadaginn
vera einn af hornsteinum samfélagsins.
Morgunblaðið/Steinþór Guðbjartsson
Hátíðinni var slitið við klettinn á Willow-eyju þar sem fyrstu Íslend-
ingarnir komu að landi 1875. Frá vinstri: Harley Jonasson, fyrrver-
andi forseti Íslendinganefndar, Tim Arnason, forseti Íslendinga-
nefndar, Vanessa Bryce Gendron, Constance Carol Magnusson
fjallkona, Dayna Gudrun Gendron, Margrét Einarsdóttir, Kristín
Bragadóttir, forstöðumaður þjóðdeildar Landsbókasafnsins, Jón
Kristjánsson heilbrigðisráðherra og Sveinn Magnússon, skrifstofu-
stjóri í heilbrigðisráðuneytinu.