Morgunblaðið - 18.03.2005, Blaðsíða 2
2 FÖSTUDAGUR 18. MARS 2005 MORGUNBLAÐIÐ
FRÉTTIR
KRISTÍN NÆSTI REKTOR
Kristín Ingólfsdóttir sigraði í
seinni umferð rektorskjörs Háskóla
Íslands sem fram fór í gærkvöldi.
Hún hlaut 53,1% gildra atkvæða
þegar tekið hafði verið tillit til vægis
kjósendahópa. Þetta er í fyrsta
skipti sem kona er kjörin rektor HÍ.
Lækka skatta á fyrirtæki
Gerhard Schröder, kanslari
Þýskalands, kynnti í gær tillögur til
umbóta í efnahagsmálum og er þar
m.a. kveðið á um að lækka skatta á
fyrirtæki úr 25% í 19%. Vill stjórn
jafnaðarmanna og græningja þannig
hleypa nýju lífi í atvinnulífið en þar
ríkir stöðnun og atvinnuleysið er hið
mesta í 60 ár.
Gjaldfrjáls leikskólavist
Reykjavíkurborg ætlar að bjóða
öllum börnum á leikskólaaldri allt að
sjö klukkustunda vist á dag á leik-
skólum borgarinnar án endurgjalds,
í áföngum á næstu árum. Næsta
skrefið verður tekið haustið 2006
þegar öll börn fá tvær stundir á dag
ókeypis.
Offita dregur úr ævilíkum
Offita er orðin svo mikið heil-
brigðisvandamál í Bandaríkjunum
að þarlendir vísindamenn óttast að
hún muni draga úr meðalævilíkum
um nokkur ár. Yrði það í fyrsta sinn
í tvær aldir sem dregur úr ævilíkum.
Fáar nauðgunarákærur
Mannréttindanefnd SÞ lýsir
áhyggjum sínum af stöðu mála hér á
landi hvað varðar ofbeldi gegn kon-
um, sérstaklega kynferðisofbeldi, og
hefur hvatt yfirvöld til að gefa þess-
um málaflokki meiri gaum. Áhyggj-
ur nefndarinnar lúta ekki síst að því
hversu ákært er í fáum nauðgunar-
málum.
Y f i r l i t
Morgunblaðið Kringlunni 1, 103 Reykjavík. Sími 5691100 Innlendar fréttir frett@mbl.is Ágúst Ingi Jónsson, aðstoðarfréttaritstjóri, aij@mbl.is Sigtryggur Sigtryggsson, aðstoðarfréttaritstjóri, sisi@mbl.is Erlendar fréttir Ásgeir Sverrisson, fréttastjóri,
asv@mbl.is Viðskipti vidsk@mbl.is Agnes Bragadóttir, fréttastjóri, agnes@mbl.is Úr verinu Hjörtur Gíslason, fréttastjóri, hjgi@mbl.is Daglegt líf Guðbjörg Guðmundsdóttir, gudbjorg@mbl.is Menning menning@mbl.is Orri Páll Ormarsson, ritstjórnarfulltrúi,
orri@mbl.is Skarphéðinn Guðmundsson, skarpi@mbl.is Umræðan|Bréf til blaðsins Magnús Finnsson, fulltrúi ritstjóra, magnus@mbl.is Guðlaug Sigurðardóttir, gudlaug@mbl.is Minningar minning@mbl.is Hilmar P. Þormóðsson, Stefán Ólafsson Dagbók|Kirkju-
starf Ellý H. Gunnarsdóttir, elly@mbl.is Íþróttir sport@mbl.is Sigmundur Ó. Steinarsson, fréttastjóri, sos@mbl.is Útvarp|Sjónvarp Auður Jónsdóttir, dagskra@mbl.is mbl.is netfrett@mbl.is Guðmundur Sv. Hermannsson fréttastjóri gummi@mbl.is
!
"
#
$
%&' (
)***
SIGURJÓN Sæ-
mundsson, fyrrverandi
bæjarstjóri á Siglufirði
og prentsmiðjustjóri,
lést á Siglufirði í gær á
nítugasta og þriðja ald-
ursári. Sigurjón var
fæddur 5. maí 1912 í
Lambanesi í Fljótum,
sonur Sæmundar Jóns
Kristjánssonar, út-
vegsbónda í Lamba-
nesi, og Herdísar Jón-
asdóttur, húsfreyju og
verkakonu.
Tvítugur að aldri
flutti Sigurjón frá
Siglufirði til Akureyrar þar sem
hann hóf prentnám hjá Oddi Björns-
syni, bókaútgefanda. Sigurjón starf-
aði í sjö ár í Prentverki Odds Björns-
sonar eða þar til hann keypti
Siglufjarðarprentsmiðju 1. júní
1935, sem hann starfrækti allt til
dánardags, ásamt viðamikilli bóka-
og tímaritaútgáfu.
Sigurjón tók alla tíð virkan þátt í
félagsmálum Siglufjarðar. Hann var
bæjarfulltrúi fyrir Alþýðuflokkinn í
20 ár og var bæjarstjóri á Siglufirði í
9 ár. Sigurjón var formaður Iðnaðar-
mannafélags Siglufjarðar í 15 ár, en
það félag rak Iðnskóla Siglufjarðar
allan þennan tíma.
Sigurjón var mikil-
virkur í söng- og tón-
listarstarfi. Hann hóf
söngferil sinn 1929 með
Karlakór Akureyrar,
en síðan söng hann
með Karlakórnum
Geysi þar sem hann
söng fyrst einsöng og
svo með Kantötukór
Akureyrar. Sigurjón
söng með Karlakórn-
um Vísi á Siglufirði í
yfir 50 ár og var for-
maður kórsins í 30 ár.
Hann var frumkvöðull
að stofnun Tónlistarskóla Vísis, sem
var undanfari Tónlistarskóla Siglu-
fjarðar.
Sigurjón var um langt skeið félagi
í Rotary- og Frímúrarahreyfing-
unni. Um árabil var hann ræðismað-
ur Svía á Siglufirði og var við starfs-
lok sæmdur orðu af sænska
konunginum fyrir störf sín á þeim
vettvangi. Sigurjón var gerður að
heiðursborgara Siglufjarðar árið
1992.
Sigurjón var kvæntur Ragnheiði
Sæmundsson, en hún lést árið 1999.
Börn þeirra eru Stella Margrét og
Jón Sæmundur.
Andlát
SIGURJÓN
SÆMUNDSSONJÓNAS Kristjánsson
hefur verið ráðinn rit-
stjóri DV og tekur til
starfa um miðjan apríl.
Jónas sagði í samtali
við Morgunblaðið að
starfið legðist vel í sig.
„Þetta er öðruvísi blað
en áður hefur verið
gefið út hér á landi og
það er gaman að taka
þátt í nýbreytni,“ sagði
Jónas.
Sem kunnugt er
stofnaði Jónas DV á
sínum tíma ásamt fleir-
um. Hann sagði að í þá
daga hefðu vandamálin
fyrst og fremst verið flokkspólitísk.
Nú væru verkefnin önnur. Jónas
kvaðst mundu leggja sitt af mörkum
við mótun stefnu blaðsins, en sagðist
ekki gera ráð fyrir að ritstjórnar-
stefna DV myndi breytast.
Siðareglur DV í smíðum
Jónas sagði stefnt að því að skrá
siðareglur fyrir DV og er búið að
gera uppkast að þeim. Hann vonast
til að reglurnar gangi í gildi með
vorinu. Með siðareglunum sagði
Jónas starfsmenn blaðsins hafa
sterkari grundvöll að standa á.
Einnig geti lesendur áttað sig á því
hvort fjölmiðillinn standi við siða-
reglur sínar. Jónas
sagði að siðareglur DV
yrðu ítarlegri en siða-
reglur Blaðamanna-
félags Íslands. Hann
samdi á sínum tíma
siðareglur Frétta-
blaðsins og sagði þær
draga dám af siða-
reglum The Guardian í
Bretlandi. Siðareglur
DV, sem einnig eru
verklagsreglur, séu að
nokkru leyti smíðaðar
upp úr siðareglum
Fréttablaðsins, en frá-
brugðnar í sumum at-
riðum.
„Þær taka á kranablaðamennsku,
þar sem fjölmiðill talar bara við einn
málsaðila af tveimur eða fleiri og
birtir hans sjónarmið, en segir ekki
frá hinum sjónarmiðunum í sama
texta. Það er ekki nóg að það komi
annað sjónarmið daginn eftir. Það
eru svona verklagsreglur af ýmsu
tagi, sem ekki er fjallað um í siða-
reglum Blaðmannafélagsins,“ sagði
Jónas.
Um leið og Jónas tekur við starfi
ritstjóra DV lætur hann af starfi út-
gáfustjóra Eiðfaxa hf. Mikael Torfa-
son verður áfram ritstjóri DV, við
hlið Jónasar, að því er fram kom á
vefmiðlinum Vísir.is í gær.
Jónas Kristjánsson
ráðinn ritstjóri DV
Jónas Kristjánsson
HRINA árekstra varð í mikilli hálku
sem gerði á höfuðborgarsvæðinu í
éljum sem þar gengu yfir upp úr há-
degi í gær. Síðdegis hafði lögreglan í
Reykjavík verið kölluð út vegna um
20 árekstra og talsvert annríki var
einnig hjá lögreglunni í Hafnarfirði
af þessum sökum. Í fæstum tilvikum
urðu meiðsl á fólki en eignatjón er
töluvert.
Einna alvarlegasta atvikið var við
gjána í Kópavogi þar sem jeppi valt
eftir að hann hafði rekist utan í
steinsteyptan vegg. Við Rauðavatn
fauk sendiferðabíll yfir á rangan
vegarhelming og skall á fólksbíl sem
kom úr gagnstæðri átt. Bílarnir eru
báðir stórskemmdir en ökumenn
sluppu ómeiddir, að sögn lögregl-
unnar í Reykjavík.
Tveir harðir árekstrar urðu á Ak-
ureyri í gær, en engin meiðsl urðu á
fólki. Að sögn lögreglu er mikil
hálka á götum bæjarins og ofan-
koma.
Á misstórum dekkjum
Á Vesturlandsvegi missti ökumað-
ur stjórn á Suzuki-jeppa með þeim
afleiðingum að hann valt utan vegar.
Að sögn vitna var jeppinn ekki á
mikilli ferð áður en hann valt en lög-
regla telur líklegt að það að jeppinn
var á misstórum dekkjum hafi valdið
veltunni. Jeppinn var á 29 tomma
dekkjum að framan en 35 tomma
dekkjum að aftan. Ökumaðurinn
sagði lögreglu að hann hefði sett
minni dekkin undir eftir að dekk
sprakk á jeppanum og hann hefði
aðeins ætlað að aka honum stuttan
spöl.
Morgunblaðið/Júlíus
Afturdekkin á jeppanum sem valt á Vesturlandsvegi voru sex tommum stærri og það talið hafa átt þátt í óhappinu.
Um 20 árekstrar og
óhöpp í mikilli hálku
Bíll á 29" dekkjum að framan en 35"
að aftan valt á Vesturlandsvegi
TÍU bílar lentu í árekstri í Hvera-
dalabrekku, vestan Hellisheiðar,
um kl. 16 í gær. Samkvæmt upplýs-
ingum lögreglunnar á Selfossi slas-
aðist einn karlmaður og var hann
fluttur á slysadeild LSH í Fossvogi í
Reykjavík. Talsverðar skemmdir
urðu á bílunum. Auk lögreglu voru
kallaðir sjúkrabílar úr Hveragerði
og Reykjavík á vettvang.
Mikil hálka, hvassviðri og skaf-
renningur var á þessum slóðum
þegar áreksturinn varð. Bílarnir
voru af ýmsum stærðum og gerð-
um, stór dráttarbíll með tengivagn,
stórir jeppar og fólksbílar.
Leiðinni um Hellisheiði var lokað
við Þrengsli að vestan og Hvera-
gerði að austan vegna óhappsins.
Vegurinn var opnaður á ný rétt eft-
ir kl. 19 í gærkvöldi.
Tíu bíla árekstur
við Hveradali
TILLAGA um að skákmeistarinn
Bobby Fischer fái íslenskan ríkis-
borgararétt var lögð fram á fundi
allsherjarnefndar Alþingis í gær-
morgun. Bjarni Benediktsson, for-
maður nefndarinnar, sagði eftir
fundinn að nú yrði farið yfir gögn
sem stuðningsmenn Fischers lögðu
fram á fundinum, og aukafundur í
nefndinni yrði að líkindum haldinn á
næstu dögum vegna málsins. „Þessi
fundur var fyrst og fremst hugs-
aður til upplýsingar fyrir nefndina.
Hann var haldinn að ósk stuðnings-
manna Bobbys Fischers,“ segir
Bjarni.
Stuðningsmenn Fischers lögðu
fram gögn frá viðræðum yfirmanns
japanska útlendingaeftirlitsins við
formann japanska Jafnaðarmanna-
flokksins. „Þar kemur fram að hann
lýsi því formlega yfir að væri Fisch-
er íslenskur ríkisborgari yrði hann
tafarlaust leystur úr haldi,“ sagði
Einar S. Einarsson, einn stuðnings-
manna Fischers, eftir fundinn.
Bjarni sagði að samstaða væri um
það í nefndinni að hún tæki sér
nauðsynlegan tíma til að meta mál-
ið, m.a. í ljósi hinna nýju upplýs-
inga.
Bjarni sagði að þær aðgerðir sem
stjórnvöld hefðu gripið til hefðu
reynst gagnlausar þegar á reyndi.
Forsenda þess að Fischer fékk
dvalarleyfi og ferðaskilríki hefði
verið sú að það myndi leysa úr mál-
um hans. „Þegar á hólminn var
komið reyndist það ekki vera rétt.“
Málið þverpólitískt
Guðrún Ögmundsdóttir, þing-
maður Vinstri grænna og fulltrúi í
allsherjarnefnd, sagði að boðað yrði
til aukafundar um málið í nefndinni
í dag eða á mánudag þar sem tillaga
um ríkisborgararétt yrði tekin fyrir.
„Við viljum bíða eftir staðfestum
gögnum varðandi þennan fund í Út-
lendingastofnuninni og á grundvelli
þeirra munum við taka ákvörðun,“
segir Guðrún. Tillagan um að veita
Fischer ríkisborgararétt sé frá
fulltrúum stjórnarandstöðu í nefnd-
inni, en málið sé þverpólitískt.
Ræddu
ríkisfang
fyrir Fischer
Í dag
Sigmund 8 Forystugrein 26
Fréttaskýring 8 Viðhorf 32
Úr verinu 12 Umræðan 34/37
Viðskipti 16/17 Bréf 36
Erlent 20/22 Minningar 38/45
Minn staður 24 Dagbók 50
Austurland 25 Víkverji 50
Höfuðborgin 26 Staður og stund 52
Akureyri 26 Velvakandi 53
Suðurnes 27 Menning 54/61
Landið 27 Ljósvakamiðlar 62
Daglegt líf 28/30 Veður 63
Menning 31 Staksteinar 63
* * *