Fréttablaðið - 21.06.2008, Blaðsíða 2
2 21. júní 2008 LAUGARDAGUR
„Ólafur, er miðborgin orðin
óttalegur gæsluvöllur?“
„Já, við þurfum að passa miðborgar-
börnin okkar.“
Reykjavíkurborg hefur samið við Öryggis-
miðstöðina um að sinna gæslu í mið-
borginni að nóttu til um helgar. Það mun
kosta borgina 300 þúsund krónur hverja
helgi. Ólafur F. Magnússon er borgarstjóri
í Reykjavík.
FÓLK Árlegt Akureyrarhlaup er í dag. Meðal þeirra
sem taka þátt er Rannveig Oddsdóttir kennari, sem
er komin átta mánuði á leið en lætur það ekki aftra
sér frá því að leggja í tíu kílómetra hlaupið.
„Þetta er þriðja barnið mitt og ég hef alltaf stundað
hlaup á meðgöngunum en þó dregið úr því á síðasta
mánuði,“ segir Rannveig. Hún kveðst hafa heyrt
ýmsar sögur um skaðsemi hlaups þegar svona standi
á; að fæðingin gæti orðið erfið og barnið óvært af of
miklu adrenalíni. Engar hrakspár hafi þó staðist.
Rannveig hefur síðustu tólf ár tekið þátt í almenn-
ingshlaupum, aðallega hér á landi en einnig í Rúanda
2005. „Ég hef þörf fyrir að hreyfa mig og finnst fátt
koma í staðinn fyrir hlaupið. Útiveran er svo
mikilvæg. Ég hleyp samt ekki á hverjum degi núna,
heldur svona þrisvar í viku og hjóla og syndi hina
dagana. Margir dást að því að ég skuli hlaupa alla
meðgönguna en mér finnst eiginlega erfiðara að
sleppa því.“ - gun
Stefnir að tíu kílómetra hlaupi í Akureyrarhlaupinu sem er í dag:
Hleypur á steypirnum
HLAUPADROTTNING Rannveig er létt á sér þó aðeins
mánuður sé eftir af meðgöngunni.
FRÉTTABLAÐIÐ/HEIÐA.IS
HEILBRIGÐISMÁL Bandarískum
vísindamönnum hefur tekist að
lækna sortuæxli manns með
klónuðum frumum úr hans eigin
líkama. Þeir
tóku hvít
blóðkorn úr
blóði mannsins,
ræktuðu þau í
miklu magni og
komu þeim
aftur fyrir í
líkama manns-
ins. Að tveimur
mánuðum liðnum höfðu blóðkorn-
in ráðið niðurlögum æxlisins.
Fréttastofa BBC greinir frá
þessu.
„Þetta er spennandi, en hafa
þarf í huga að aðeins er um einn
sjúkling að ræða,“ segir Magnús
Karl Magnússon, sérfræðingur í
blóðmeinafræði. Ár eða áratugir
geti verið í að meðferð af þessu
tagi verði almenn. - gh
Bandarísk rannsókn:
Klónfrumur
lækna æxli
SORTUÆXLI
ALÞINGI Almannavarna- og
öryggismálaráð undir formennsku
forsætisráðherra verður sett á fót
samkvæmt nýjum lögum um
almannavarnir sem tóku gildi í
gær. Umsýsla og undirbúningur
funda ráðsins verður í höndum
dómsmálaráðherra.
Lögin voru samþykkt á síðasta
degi Alþingis í vor og er markmið
þeirra að styrkja forvarnir gegn
vá og bæta viðbrögð allra aðila á
hættustundu.
Ríkislögreglustjóri mun hafa
yfirumsjón með almannavarna- og
öryggismálum á landinu öllu og er
honum veitt heimild til stofnunar
tímabundinnar þjónustu-
miðstöðvar vegna hættu. Þá er ríki
og sveitarfélögum skylt að gera
viðbragðsáætlanir. - ges
Almannavarnalög taka gildi:
Öryggismálaráð
sett á fót
NÁTTÚRA Draumur Sævars Einars-
sonar, bónda á Hamri í Hegra-
nesi, virtist ætla að verða að veru-
leika á fimmtudag þegar grunur
vaknaði um að þriðji ísbjörninn í
mánuðinum væri staddur hér-
lendis. Sævar dreymdi fyrir
þremur ísbjörnum í upphafi mán-
aðarins. Meintur björn reyndist
hins vegar vera hross.
Það voru tveir pólskir ferða-
menn sem tilkynntu lögreglu að
þeir hefðu séð spor eftir björn á
Hveravöllum, sem eru uppi á
miðju hálendi. Þeir sögðust
þekkja sporin þar sem bjarndýr
væru algeng í Póllandi. Tugir
leitar manna könnuðu svæðið í
gær, og þegar sporin loks fundust
var kveðið upp úr með það að þau
væru eftir hestshófa.
Sævar dreymdi fyrir þremur
bjarndýrum tveimur nóttum áður
en fyrsti björninn fannst á Skaga
3. júní. „Þeir voru bara á vappi
hérna á hlaðinu hjá mér,“ segir
Sævar, og bætir við að þeir hafi
rifið í sig eina af kindum hans.
Sævar er almennt ekki sérlega
berdreyminn og því kom það
honum á óvart þegar fyrsti björn-
inn fannst, tveimur dögum eftir
drauminn. Honum var svo öllum
lokið þegar annar björninn fannst.
„Þá var þetta nú orðin dálítið
mikil tilviljun, fannst mér,“ segir
hann.
Sævar segist ekki hafa trúað
því að þriðji björninn væri á rölti
við Hveravelli. En á hann enn von
á þeim þriðja? „Ég veit það satt
að segja ekki. Það er ómögulegt
að segja.“ - sh
Draumur Sævars Einarssonar bónda um þrjá ísbirni rættist ekki í gær:
Þriðji ísbjörnin breyttist í hest
EKKI ÍSBJÖRN Hesturinn skildi eftir sig
stór spor í blautri jörðinni. MYND/ÍSHESTAR
UMHVERFISMÁL Ónæði af skemmti-
stöðum í miðborg Reykjavíkur
hefur aukist eftir að reykingabann
á stöðunum tók gildi síðastliðið
sumar að sögn Rósu Magnúsdóttur,
sviðsstjóra hjá Umhverfiseftirliti
Reykjavíkurborgar.
Mest er kvartað undan skemmti-
stöðum nærri íbúðarbyggð og er
svæðið við Laugaveg, Vegamóta-
stíg, Klapparstíg og Bergstaða-
stræti sérstaklega viðkvæmt vegna
fjölda skemmtistaða á litlu svæði
nærri íbúabyggð.
Jafngildishljóðstig mældist yfir
sextíu desibel utandyra við Kaffi-
barinn í byrjun júní. Hávaðinn var
mældur við húsvegg nærliggjandi
húss og er sambland af tónlist innan-
dyra á barnum og skvaldri í fólki
utandyra við staðinn.
Mælingar á Vegamótastíg, þar
sem skemmtistaðirnir Vegamót og
Ölstofa Kormáks og Skjaldar eru til
húsa, hafa gefið svipaðar niður-
stöður og var jafngildishljóðstig
mælt nærri sjötíu desibel þar í
febrúar.
Til viðmiðunar er að hávaði við
húsvegg utandyra fari ekki yfir
fjörutíu desibel. Hækkun um hvert
stig á kvarðanum er umtalsverð
hávaðaaukning og því meiri eftir
því sem hærra dregur á kvarðan-
um. „Hávaði yfir sextíu desibelum
er miklu meiri hávaði en
viðmiðunar gildið,“ segir Rósa.
Hávaði innandyra á Kaffibarnum
mældist einnig mikið yfir viðmið-
unarmörkum. Háværasta hljóðbil
var 125 desibel en miðað er við að
það fari ekki yfir 110 desibel á stöð-
um þar sem fólk dvelur skamman
tíma.
Þetta er sambærilegur hávaði við
rokktónleika og nóg til þess að valda
heyrnarskemmdum samkvæmt
Alþjóðaheilbrigðisstofnuninni, sem
miðar jafnframt við að svefnró sé
raskað við 45 desibela jafngildis-
hljóðstyrk fyrir utan svefnherbergis-
glugga.
Óljóst er hver ber ábyrgð á hávaða
í skemmtistaðagestum utan við stað-
inn, að sögn Óskars Sigurpálssonar,
varðstjóra hjá lögreglunni í Reykja-
vík. Ef kvartanir um hávaða berist
ítrekað og ekki sé brugðist við geti
skemmtistaðir misst leyfi sín.
Þorsteinn Stephensen, eigandi
Kaffibarsins, segir að þegar hafi
verið gripið til aðgerða og verið sé
að vinna að lausn í góðu samstarfi
við nágranna. Til að mynda hafi
verið keyptur styrkleikamælir á
barinn auk þess sem hátalarar hafi
verið færðir úr stað í því skyni að
minnka hávaða sem berist frá
staðnum. helgat@frettabladid.is
Hávaði keyrir um
þverbak eftir bann
Hávaði mælist langt yfir mörkum við skemmtistaði í Reykjavík. Hávaði innan-
dyra eins og á rokktónleikum. Ónæði jókst eftir að reykingabann tók gildi.
SKEMMTANALÍF Á VEGAMÓTASTÍG Hávaði hefur mælst langt yfir mörkum við
skemmtistaði við Bergstaðastræti og Vegamótastíg. Ónæði hefur aukist eftir að
reykingabann tók gildi.
ÚTIVIST Ólafur F. Magnússon
borgarstjóri veiddi fyrsta laxinn
úr Elliðaánum í gær. Borgarstjóri
hóf veiðina venju samkvæmt
klukkan sjö og landaði innan
stundar sex punda hrygnu. Ólafur
var glaðbeittur að verkinu loknu
og sagðist reikna með því að þetta
hvetti hann til meiri útivistar.
Ingólfur Örn Þorbjörnsson,
formaður Landssambands
stangveiðifélaga, er bjartsýnn á
veiðisumarið. Hann sagði í gær
að það liti út fyrir að fiskurinn
kæmi betur haldinn og stærri en
sést hefði undanfarin ár.
Allt að sextíu þúsund manns
stunda stangveiði hérlendis á
einn eða annan hátt og geta því
margir glaðst yfir þessum góðu
fréttum. - ges
Útlit fyrir gott veiðisumar:
Ólafur náði
fyrsta laxinum
ÓLAFUR F. MAGNÚSSON Með hrygnuna
góðu. FRÉTTABLAÐIÐ/GVA
SVEITARSTJÓRNIR Hveragerðisbær
verður að greiða ríkissjóði bætur
eins og öðrum veiðiréttarhöfum
eftir að klór frá sundlaug bæjarins
drap stóran hluta af fiskistofnun
Varmár í fyrrahaust. Bréf þessa
efnis barst frá fjármálaráðuneyt-
inu til bæjaryfirvalda sem báðu
ríkið að falla frá kröfum. Ríkið á
lönd sem liggja að Varmá.
Ekki er ljóst hversu háar bætur
muni þurfi að greiða. Bæjarráð
Hveragerðis fól á fimmtudag
Aldísi Hafsteinsdóttur að halda
áfram að vinna að samkomulagi
um málið milli Veiðifélags Varmár
og Þorleifslækjar og Hveragerðis-
bæjar. - gar
Klórslysið í Varmá:
Ríkið neitar að
gefa eftir bætur
MENNTUN Kristín Ingólfsdóttir,
rektor Háskóla Íslands, veitti í
gær í fyrsta sinn styrki úr
Afreks- og hvatningarsjóði
háskólans á Háskólatorgi.
25 nemendur hlutu styrkinn
sem nemur þrjú hundruð þúsund
krónum auk þess sem skráningar-
gjöld við háskólann eru felld
niður. Við val á styrkþegum var
litið til árangurs á stúdentsprófi
en einnig til virkni í félagsstörf-
um, listum og íþróttum. - gh
Afreks- og hvatningarsjóður:
Stúdentar í HÍ
verðlaunaðir
„Ástandið er algjörlega óviðun-
andi,“ segir Árni Einarsson, íbúi á
Laugavegi við Vegamótastíg.
„Umgengni viðskiptavina
skemmtistaða og tillitssemi hefur
versnað mikið ár frá ári og keyrði
um þverbak þegar reykingabann á
skemmtistöðum tók gildi.“
Árni segir mesta ónæðið
hljótast af opnun skemmtistaða
fram eftir nóttu. „Við erum ekkert
að biðja um neina kyrrðardaga í
miðborginni, bara að eftir klukkan
þrjú að nóttu sé sjálfsagður réttur
okkar virtur.“
ÓVIÐUNANDI ÁSTAND
SPURNING DAGSINS