Fréttablaðið - 22.06.2008, Blaðsíða 66

26 22. júní 2008 SUNNUDAGUR
É
g hitti Renzo Gracie í
húsakynnum Mjölnis.
Hann var þá nýkom-
inn úr Bláa lóninu og
lét vel af. Hann hélt
námskeið helgina
14.-15. júní fyrir iðkendur í
Mjölni þar sem færri komust að
en vildu. Renzo var boðið til
Íslands í gegnum Royal Group,
fyrirtækjasamstæðu þrjátíu
fyrir tækja í Abu Dhabi, næsts-
tærstu borg Sameinuðu arabísku
furstadæmanna (SAF) á eftir
Dubai. Stjórnendur Royal Group
hafa mikinn áhuga á Íslandi og
þreifa fyrir sér hér á landi upp á
samstarf.
Maðurinn á bak við Royal
Group er Sheikh Tahnoon Bin
Zayed Al Nahyan, krónprins Abu
Dhabi. Renzo hefur verið einka-
kennari frá árinu 1993. Bróðir
Tahoons er Sheikh Khalifa Zayed
Al Nahyan, forseti SAF. Þeir
bræður eru synir Zayeds bin
Sultan Al Nahyan sem er arki-
tektinn á bak við SAF; hann
stýrði landinu í tuttugu ár og er
enn þjóðhetja.
Fimm ára á æfingar hjá afa
En nóg um það. Renzo fæddist í
Rio de Janeiro í Brasilíu árið 1967.
Fjölskylda hans var engin venju-
leg fjölskylda. Hann er af þriðju
kynslóð bardagamanna en Gracie-
fjölskyldan er sú virtasta innan
bardagaheimsins. Afi hans, Carlos,
fann upp brasilískt jiu-jitsu ásamt
bróður sínum, Hélio.
„Ég reyndi að sýna einhverja
sambatakta í fótbolta en ég gat
ekki neitt,“ segir Renzo glaðbeittur
en afi hans og faðir byrjuðu að
kenna honum að berjast þegar
hann var fimm ára gamall. „Afi
minn lærði hina upprunalegu
íþrótt jiu-jitsu af Japönum og
útfærði hana á sinn hátt. Hann
skapaði því brasilískt jiu-jitsu sem
ég er mjög stoltur af.“
„Ég ólst ekki upp í hörðu hverfi
en fjölskyldan mín er stútfull af
bardagamönnum. Ég ákvað því
strax að halda heiðri fjölskyldu
minnar á lofti. Þetta er lífsstíllinn
minn,“ segir Renzo sem reyndar
gerðist atvinnumaður á brimbrett-
um í skamman tíma. Hann gerðist
síðan atvinnumaður í bardaga-
íþróttum og vann fjölda titla.
Helgar sig íþróttinni
„Ég ákvað að helga mig íþróttinni
algjörlega. Ég er ánægður með að
vinnan mín er nokkuð sem ég hef
unun af. Þetta er reyndar ekki eins
og vinna fyrir mér, þetta er bara
ánægja. Að fá að lifa inni í þessu,“
sagði Renzo, sem fór í háskóla en
hætti þá skólagöngunni.
Renzo hefur keppt í brasilísku
jiu-jitsu og í blönduðum bardaga-
íþróttum (MMA, Mixed Martial
Arts) og náð framúrskarandi
árangri í báðum greinum. Vin-
sældir MMA náðu nýjum hæðum
þegar UFC-samtökin (Ultimate
Fighting Championship) hófu
keppni til að skera úr um hvaða
bardagalist, þar sem vopn koma
ekki við sögu, væri best. Einn af
stofnendum UFC var Rorion
Gracie, náfrændi Renzos.
Áður fyrr voru reglur í keppn-
um á vegum UFC ekki strangar og
ljót meiðsli voru tíð. Í dag hafa
reglurnar verið hertar þrátt fyrir
að harkan sé enn gríðarleg. Renzo
er með sitt eigið lið sem keppir í
IFL-deildinni (International
Fighting League). Það er fyrsta
deildin í MMA-heiminum en hún
var stofnuð árið 2006. Lið Gracies
kallast nú The Gracie Academy en
hét áður New York Pitbulls. Lið
hans varð meistari á síðasta ári og
fór það í gegnum tímabilið án þess
að tapa bardaga.
Ört stækkandi skóli
Gracie býr nú í New York þar
sem hann starfrækir samnefnd-
an skóla, The Gracie Academy.
„Ég hef alltaf kunnað vel við
New York. Hún hefur þann eigin-
leika að fagna öllum, þarna er
fólk af nær öllu þjóðerni. Ég gat
fundið Brasilíumenn, brasilískan
mat og slíkt,“ segir Renzo, sem
stofnaði skólann fyrir tólf árum.
Skólinn fer ört stækkandi og
æfingaaðstaðan er glæsileg.
Í henni æfa 950 manns og eru
fjórtán tímar starfræktir á hverj-
um degi. Skólinn er í 3.000 fer-
metra húsnæði sem Renzo von-
ast til að stækka fljótlega til að
geta komið allt að 1.500 manns
fyrir. Hann stefnir jafnframt á
að opna fjóra nýja skóla í New
York og nágrenni á næstu árum.
„Skólinn hefur stækkað ótrúlega
hratt. Við byrjuðum með um
fjörutíu manns en höfum heldur
betur hækkað töluna. Hann
stækkar með hverjum deginum,“
segir Renzo.
Því eldri, því betri
MMA er líf hans og sál en grunnur
þess er brasilískt jiu-jitsu, að mati
Renzos. „Ef þú kannt ekki BJJ, þá
skaltu ekki keppa í MMA, þá
taparðu bara,“ segir hann eins og
hann sé að gefa blaðamanni föður-
leg ráð. „Íþróttin er gríðarvinsæl.
Þetta er í sjónvarpinu allan sólar-
hringinn í Bandaríkjunum og
iðkendum fjölgar stöðugt. Á
heimsmeistaramóti í Kaliforníu
um daginn kepptu yfir 1.500
manns,“ segir kappinn en yfir
milljón manna horfðu á fyrsta bar-
dagann í IFL-deildinni í sjónvarpi
á síðasta ári.
Renzo keppir enn, síðast
snemma árs 2007, en stefnir á bar-
daga á þessu ári. „Ég fer fljótlega
að æfa aftur. Þá æfi ég sex daga
vikunnar, tvisvar til þrisvar á dag,
og fer á sérstakt mataræði,“ segir
Renzo, sem orðinn er 41 árs gam-
all. Aldurinn er alls ekki farinn að
hafa slæm áhrif á kappann.
„Ég hef verið að bæta mig frá
því ég var fimm ára. Ólíkt
mörgum íþróttum, þar sem menn
vilja ekki eldast, þá er maður eins
og gott vín í þessari íþrótt. Þetta
er eins og skák, hugurinn skiptir
öllu máli. Eini munurinn er að í
skák eru menn ekki að kyrkja
hver annan,“ segir Renzo og hlær
dátt.
Ekkert án íþróttarinnar
Hann á konu og þrjú börn sem öll
hafa stundað bardagaíþróttir, mis-
mikið þó. „Elsta dóttir mín er ekki
mikið fyrir þetta. Hún stundaði
smá sparkbox en er meira fyrir
tísku og slíkt,“ segir hann og
brosir. „En yngri tvö börnin eru
stórhrifin af þessu og stunda
íþróttina af miklum móð. Bak-
grunnur í þessari íþrótt jafnast á
við hvaða háskólanám sem er,
heimspekilega séð. Ég myndi ekki
vilja að börnin mín misstu af því
að upplifa það að vera á gólfinu og
æfa sig.“
Ein besta upplifun Renzos á
ferlinum kemur úr þjálfunarhlið-
inni. „Að gera meistara úr nem-
endum mínum er ótrúleg reynsla,“
segir Renzo, sem lifir fyrir íþrótt-
ina. „Þessi íþrótt gefur mér allt
sem ég er. Ef þetta verður tekið
frá mér verð ég eins og tóm skel.
Allt sem ég geri og kann kemur
frá íþróttinni. Þetta hefur opnað
ýmsar dyr fyrir mér og gert líf
mitt afar skemmtilegt og við-
burðaríkt. Að vera í kringum fólk-
ið sem ég dáist að. Ef ég myndi
deyja núna og mætti ráða hvernig
líf mitt yrði, myndi ég hafa það
nákvæmlega eins og það hefur
verið,“ segir Renzo Gracie.
Með bardagana í blóðinu
ENN FLOTTUR Renzo er 41 árs gamall en formið er enn gott. Hann er reyndar ekki í sínu besta líkamlega ástandi um þessar
mundir en ætlar fljótlega að fara að æfa sig fyrir næstu keppni. Ljósmyndari bað hann reyndar um að hífa inn „bumbuna“ fyrir
myndatökuna. FRÉTTABLAÐIÐ/ARNÞÓR
Renzo Gracie er af þriðju kynslóð bardaga-
manna. Afi hans fann upp brasilískt jiu-jitsu og
heldur Renzo merki fjölskyldu sinnar á lofti. Í
viðtali við Hjalta Þór Hreinsson segir Renzo frá
uppruna sínum, hefðum og hvernig hann getur
líkt bardagaíþrótt sinni við skák.
Brasilískt jiu-jitsu
Í grófum dráttum gengur brasilískt jiu-jitsu (BJJ) út á að
ná yfirburðastöðu á móti andstæðingnum og fá hann
svo til að gefast upp með lás, svæfingu eða einhvers
konar taki. Dæmi um lás væri að snúa það mikið upp á
handlegg andstæðingsins að það valdi sársauka og hann
gefist upp, en slíkt er yfirleitt mannúðlegri leið til að
yfirbuga árásarmann en til dæmis að brjóta kjálka hans
með kýlingu eða sparki. Yfirburðastaða telst þá einhvers
konar stelling eða staða þar sem andstæðingurinn getur
ekki meitt þig, en þú getur meitt hann eða fengið hann á
einhvern hátt til að gefast upp. (Af Mjölnir.is)
SIGURSÆLL Renzo fagnar hér einum af lærisveinum sínum. Lið
Renzos varð meistari í IFL-deildinni á síðasta ári. FRÉTTABLAÐIÐ/
ÖFLUGUR Renzo sést hér berjast árið 2006. Hann hefur
unnið fjöldann allan af titlum á litríkri ævi.
Á HLIÐARLÍNUNNI Renzo starfrækir eigið lið úr skóla sínum
og er að mestu leyti nú á hliðarlínunni í stað þess að vera í
bardagahringnum.