Fréttablaðið - 22.06.2008, Blaðsíða 61

SUNNUDAGUR 22. júní 2008 21
Listnám hérlendis hefur tekið stórstígum
framförum síðastliðin ár, þökk sé miklu
uppbyggingarstarfi á vegum Listaháskóla
Íslands. Skólinn er þó hvergi nærri hættur
uppfinningasemi sinni; í haust verður í
fyrsta skipti boðið upp á meistaranám
innan veggja hans.
Um er að ræða meistaranám í tónsmíðum; námið er
svokallað rannsóknarnám og er áætlað að taki tvö ár
til útskriftar. Kjartan Ólafsson, prófessor í tónsmíðum,
segir þessa nýju námsleið byggja á stöðluðu evrópsku
námskerfi. „Þetta nám verður alveg í samræmi við
Bologna-kerfið sem er afar útbreitt í háskólum víða í
Evrópu. Af þeim sökum verður uppbygging námsins
sambærileg við það sem gerist erlendis hvað varðar
ýmis kjarnafög, en við stefnum þó að því að hafa
námið einstaklingsmiðaðra en víða annars staðar.
Þannig hyggjumst við byggja á þeirri sérhæfingu sem
nú þegar er til staðar í grunnnáminu í tónsmíðum.“
Grunnámið í tónsmíðum við Listaháskólann skiptist
upp í fimm brautir. Hægt er að sérhæfa sig í hefð-
bundnum tónsmíðum, kvikmyndatónsmíðum, sviðslis-
tatónsmíðum, tónsmíðum fyrir nýja miðla og upptöku-
stjórn. Þessa miklu námsbreidd má að nokkru leyti
þakka góðu samstarfi á milli deilda innan skólans.
Þannig vinna tónsmíðabrautirnar fyrir kvikmyndir og
sviðslistir mikið með leiklistardeild skólans og nemar í
tónsmíðum fyrir nýmiðla starfa með nemum úr
myndlistardeild. „Samstarfið á milli deilda hefur
skapað tónsmíðanáminu hér á Íslandi vissa sérstöðu
enda ekki sérlega algengt að svona mikill samruni á
milli listgreina eigi sér stað í grunnnámi. En þetta
gerir nemendum okkar kleift að sérhæfa sig sem
listamenn sem veitir þeim visst forskot á alþjóðlegum
vettvangi,“ útskýrir Kjartan.
Meistaranámið kemur til með að gera nemendum
mögulegt að vinna áfram með sérhæfingu grunnnáms-
ins og þannig þróa sig áfram sem listamenn. „Það
mætti segja að smæð samfélagsins vinni að vissu leyti
með okkur hér á Íslandi hvað varðar samstarfið á milli
námsbrauta. Nemendur Listaháskólans græða mikið á
því að vera í skóla þar sem margar listgreinar eru
kenndar samhliða og að auki er gott aðgengi hér á
landi að samstarfi við atvinnulífið. Þetta gerir það að
verkum að nemendur okkar fá að kynnast fleiri hliðum
tónlistarsköpunar en stendur til boða í mörgum
sérhæfðum tónlistarháskólum,“ segir Kjartan.
Þeim sem hafa áhuga á að kynna sér meistaranámið
betur er bent á heimasíðu Listaháskólans, www.lhi.is,
en þar má finna upplýsingar um námið og umsóknar-
ferlið.
vigdis@frettabladid.is
Listnám til meistaragráðu í
fyrsta sinn á Íslandi
Myndlistarmaðurinn Sæþór Örn
Ásmundsson sýnir um þessar
mundir í sýningarrýminu Gall-
erí Verðandi að Laugavegi 51, en
þetta er þriðja einkasýning
Sæþórs. Hann er útskrifaður í
videógrafík frá Istituto Europeo
di Design á Ítalíu og hefur hann
meðal annars sýnt videóverk og
innsetningar í Guggenheim í
Feneyjum. Verkum Sæþórs á
sýningunni í Gallerí Verðandi
má lýsa sem strangflatarmynd-
um eða geómetrískri abstraks-
jón.
Hið nýja og spennandi Gallerí
Verðandi er í bókabúðinni Skuld
að Laugavegi 51, á neðri hæð.
Sæþór er fyrsti listamaðurinn
sem sýnir í Gallerí Verðandi og
stendur sýningin út júní en svo
taka nýjar sýningar við í gallerí-
inu á mánaðarfresti.
- vþ
Sæþór í Verðandi
LITAGLEÐI Verk eftir Sæþór Örn
Ásmundsson.
Tónleikaröðinni Þriðjudagskvöld í
Þingvallakirkju verður hleypt af
stokkunun, annað árið í röð, næst-
komandi þriðjudagskvöld kl. 20. Þá
koma fram þau Guðmundur Vil-
hjálmsson, organisti Þingvalla-
kirkju, Margrét Bóasdóttir sópran-
söngkona og Einar Jóhannesson
klarínettuleikari. Þrennir tónleikar
til viðbótar verða í röðinni og fara
þeir fram næstu þrjú þriðjudags-
kvöld. Á þeim munu koma fram
miðaldasönghópurinn Voces Thules,
flautuleikarinn Hafdís Vigfúsdóttir
og söng- og hljóðfærahópurinn Spil-
menn Rikkinis.
Kveikjan að tónleikaröðinni er
sjóður sem stofnaður var til minn-
ingar um Guðbjörgu Einarsdóttur
frá Kárastöðum í Þingvallasveit, en
hún var organisti við kirkjuna á
yngri árum. Sjóðnum er ætlað að
styrkja tónlistarstarf við Þingvalla-
kirkju. Enginn aðgangseyrir er að
tónleikunum en tekið er við frjáls-
um framlögum í tónleikalok. - vþ
Spilað á Þingvöllum
ÞINGVALLAKIRKJA Hýsir tónleikaröð
næstu fjögur þriðjudagskvöld.
KJARTAN ÓLAFSSON
Fer fyrir nýju meistara-
námi í tónsmíðum við
Listaháskóla Íslands.
FR
ÉT
TA
B
LA
Ð
IÐ
/G
VA