Morgunblaðið - 24.05.2006, Page 4

4 MIÐVIKUDAGUR 24. MAÍ 2006 MORGUNBLAÐIÐ
FRÉTTIR
MIKIÐ snjóaði í norðan hvassviðri
norðanlands í gær og var víða að
finna tuttugu og fimm til þrjátíu
sentimetra jafnfallinn snjó. Líklega
þarf að fara rúmlega aldarfjórðung
aftur í tímann eða allt aftur til ársins
1979 til þess að finna dæmi um jafn-
langvarandi kuldakast og nú í maí-
mánuði, en vorið og sumarið 1979 er
mörgum í fersku minni fyrir kulda
og snjókomu langt fram á sumar.
Veðurstofan spáir því að það gangi á
með éljum eftir hádegið í dag og að
það hlýni nokkuð um helgina, en
ekki er útlit fyrir veruleg hlýindi
fyrr en í fyrsta lagi um miðja næstu
viku.
Kristín Hermannsdóttir, veð-
urfræðingur á Veðurstofu Íslands,
sagði að það væri velþekkt að það
kæmi hret fyrir norðan dag og dag á
vorin og snemma sumars, en líklega
þyrfti að fara allt aftur til ársins
1979 til að finna dæmi um jafn-
langvinna norðanátt og kulda og nú.
Kristín sagði að fyrir rúmri viku
eða 17. maí hefði snúist í norðanátt
og daginn eftir, 18. maí, hefði kólnað.
Síðan þá hefði verið kalt í veðri og
því væri spáð áfram fram eftir vik-
unni og að ekki færi að hlýna fyrr en
á föstudag eða laugardag. Þá ætti að
draga úr norðanáttinni, en áfram
yrði tiltölulega kalt loft yfir landinu,
þannig að ekki yrði um mikil hlýindi
að ræða.
Kristín sagði að ekki væri útlit
fyrir að það snerist í suðlægar áttir
fyrr en í fyrsta lagi á miðvikudag eða
fimmtudag í næstu viku.
Hún sagði að mikið hefði snjóað
fyrir norðan í gær. Úrkoma hefði
verið talsverð víða um Norðurland.
Þannig hefði verið talað um 25 senti-
metra jafnfallinn snjó á Ólafsfirði og
svipað eða 27 sentimetra í Aðaldal í
gærmorgun klukkan 9 og bætt hefði
í snjóinn í gærdag, því 21 millimetra
úrkoma hefði verið á Staðarhóli í
gærdag og 17 millimetrar á Skjald-
þingsstöðum.. Þá hefði snjóað í
Skagafirðinum og verið éljagangur á
Skaga og á Vestfjörðum. Áfram yrði
hvasst um vestanvert landið í dag,
með snjókomu til að byrja með um
Norðurland sem síðan myndi breyt-
ast í él er liði á daginn.
Ekki kaldara miðað
við árstíma í hundrað ár
Meðalhiti það sem af er maí-
mánuði er 6,4 gráður og er það 0,7
gráðum yfir meðallagi, þrátt fyrir
kuldakastið sem nú ríður yfir landið.
„Miðað við skrá, sem ég hef yfir veð-
urmælingar undanfarin 60 ár, hafa
bæði verið slegin hita- og kuldamet í
mánuðinum og þetta er svona frekar
óvenjulegt,“ sagði Trausti Jónsson,
veðurfræðingur.
„Þetta eru einnig einhverjir þeir
köldustu dagar eftir 20. maí sem við
vitum um,“ sagði Trausti, og var
hann þá að miða við stærsta hluta
landsins, en helst ætti þetta við um
sunnanvert landið.
Frostið fór niður í 2,6 stig í
Reykjavík í fyrrinótt og segir
Trausti að það þurfi að fara hátt í
hundrað ár aftur í tímann til að finna
álíka kulda eftir 20. maí.
Langvarandi kuldakast og snjókoma á Norðurlandi
Bæði hita- og kuldamet
hafa fallið í maímánuði
Morgunblaðið/Skapti Hallgrímsson
Hross híma í norðaustan hvassvirði og snjókomu fyrir utan Akureyri í gær.
LÖGREGLAN á Blönduósi leit varla
upp úr aðkallandi verkefnum og út-
köllum vegna umferðaróhappa í sýsl-
unni í gær. Hríðarveður og hálka á
vegum gerði sitt til að halda lögregl-
unni við efnið allt frá morgni til
kvölds. Frá því snemma í gærmorgun
og fram yfir hádegið fóru sjö bílar út
af á Þjóðvegi 1 og var „allt á hvolfi“
um tíma vegna erils hjá lögreglunni,
að hennar sögn, við að aðstoða öku-
mennina.
Undir kvöldið, þegar verið var að
ryðja veginn um Langadal, fór ekki
betur en svo að ruðningstækið sjálft
lenti útaf og rann niður brekku þegar
snjótönnin stakkst niður í jörð. Tækið
skemmdist töluvert og varð að loka
þjóðveginum á meðan verið var að
sinna vettvanginum.
Hríð og ófærð á vegum
Í gærkvöldi varð síðan útafakstur
með slysum á fólki þegar bíll fór út af
veginum í Vatnsdal í krapa. Í leiðinni
ók hann á umferðarskilti og lenti á
malarbing með þeim afleiðingum að
ökumaðurinn skarst í andliti og hlaut
meiðsli á handlegg. Var hann fluttur
til Reykjavíkur með sjúkrabíl. Far-
þegar sem með honum voru lemstr-
uðust einnig að sögn lögreglu.
Ekki þarf að koma neinum á óvart
lengur eftir þrálát óveður og hríð
norðanlands, að færð á vegum er af-
leit víða. Hálka og skafrenningur
voru á Holtavörðuheiði en hálkublett-
ir á Bröttubrekku og Fróðárheiði.
Vonskuveður var á Klettshálsi í gær
og lentu ökumenn í nokkrum vand-
ræðum þar. Var vegurinn ruddur í
gærmorgun en svo ákaflega snjóaði
að vegurinn var orðinn ófær í gær-
kvöldi. Á Steingrímsfjarðarheiði var
hálka og skafrenningur, hálkublettir
á Ströndunum og ófært norðan
Bjarnarfjarðar. Í Húnavatnssýslum
var víðast snjóþekja eða krapi en
þæfingsfærð fyrir Vatnsnes. Einnig
var þæfingsfærð á Þverárfjalli, snjó-
þekja á Siglufjarðarvegi en þungfært
í Fljótunum og Lágheiðin ófær. Þá
snjóaði mikið á leiðinni milli Akureyr-
ar og Dalvíkur og ekki hafðist undan
með mokstur. Vetrarfærð var austur
úr Þingeyjarsýslum yfir öræfin en yf-
irleitt ekki fyrirstaða fyrir vetrar-
búna bíla. Þó var stórhríð á Hóla-
sandi og vegurinn þar ófær.
Á Austurlandi var færð að komast í
eðlilegt horf í gærkvöldi. Hellisheiði
eystri var þó ófær en verið var að
moka Mjóafjarðarheiði. Þá voru
hálkublettir á Öxi.
„Allt á
hvolfi“
Óveður og ófærð í Húnavatnssýslum skapaði erfitt ástand
á vegum með mörgum umferðaróhöppum í gær
Vonskuveður var í Langadal í gær og lenti mokstursbifreið út af veginum.
SEX manna hópur nemenda úr
Menntaskólanum við Hamrahlíð
situr nú veðurtepptur í Hrísey og
sér ekki fram á að komast til
Reykjavíkur fyrr en veður og færð
leyfa, jafnvel ekki fyrr en á
fimmtudag. Komu þau til Hríseyj-
ar á laugardag og ætluðu heim á
mánudag en óveðrið á Norðurland-
inu ætlaði þeim öllu lengri dvöl.
MH-ingarnir eru í nýkjörinni
stjórn nemendafélags skólans og
voru í hópeflisferð sem nú dróst
svona á langinn. En það væsir ekki
um mannskapinn því bústaðurinn
er hús Ingólfs Margeirssonar rit-
höfundar og fjölskyldu og er far-
arstjórinn sjálfur forseti nemenda-
félagsins og gestgjafi, Jónas
Margeir Ingólfsson Margeirsson-
ar.
Að sögn eins strandaglópsins,
Úlfs Hanssonar, datt hópnum ekki
í hug að þessi forlög biðu þeirra
þegar haldið var af stað í helg-
arferðina. „Við bjuggumst ekki við
að sitja föst hér í marga daga,
fram yfir nokkur atvinnunámskeið,
einkunnaafhendingar og samn-
ingaviðræður,“ sagði hann í sam-
tali frá Hrísey í gærkvöldi. En
hópurinn hefur samt nóg að bíta
og brenna á meðan úti geisar hríð-
in. Og það var ekki nóg með að
þeim væri bönnuð förin suður um
heiðar því í þokkabót slitnaði sæ-
strengur með þeim afleiðingum að
rafmagnið fór af Hrísey. „Við þurf-
um því að reiða okkur á rafmagn
frá dísilvél sem heldur uppi raf-
magninu í eyjunni núna. Við erum
hvorki með útvarp né sjónvarp en
höfum síma. Við höfum aldrei lent
í öðru eins.“
Sex nemendur úr MH hafa verið veður-
tepptir í Hrísey svo dögum skiptir
„Höfum aldrei
lent í öðru eins“
STANSLAUS bræla í þrálátum
norðanáttum hefur orðið til þess að
trillusjómenn á Húsavík hafa ekki
getað sótt sjóinn í allt að 10 daga
og er ekki útlit fyrir að hægt verði
að komast á sjó fyrr en á föstudag í
fyrsta lagi. Júlíus Bessason smá-
bátaeigandi á Húsavík segir allt að
20 báta hafa verið í höfn svo dögum
skipti og aldrei verði hægt að vinna
upp þann tekjumissi sem af þessu
hlýst. Ekki er þó hægt að segja til
um það af hversu miklum tekjum
smábátaeigendur hafa orðið vegna
brælunnar.
„Það setur óhjákvæmilega strik í
reikninginn þegar enginn kemst á
sjó í viku, tíu daga,“ segir Júlíus.
„Það er drullubræla og allt á kafi í
snjó. Það er einn bátur á grá-
sleppuveiðum og hann er stopp.
Hann náði einhverju af netunum
upp en eitthvað á hann í sjó sem er
í sjálfu sér ekki sérstaklega gott
mál.“
Grásleppuvertíðinni er að ljúka
um þessar mundir og eru sumir að
skipta yfir í ýsu á net. „En það er
ekki byrjað. Flestir eru á þorski en
þrír bátar eru byrjaðir á kola með
snurvoð. Annars eru flestir á línu
og flestir ættu að vera byrjaðir á
handfæraveiðum. En það hefur
bara ekkert orðið vart ennþá.
Norðvestanátt er versta áttin hér
en það hefur verið norðan- og norð-
austan undanfarið. Það hefur
kannski ekki orðið mjög vart við
kvikuna nákvæmlega hér við Húsa-
vík en hún er hérna utan við.“
Þrálát bræla og
enginn kemst á sjó
Trillusjómenn á Húsavík lengi í landi