Morgunblaðið - 03.07.2007, Blaðsíða 4

Ósammála um samstarfsaðila
í Hitaveitu Suðurnesja
Ljósmynd/VíkurfréttirNýta forkaupsrétt Atkvæði greidd á fundi bæjarstjórnar Reykjanesbæjar í gærkvöldi.
Eigendastaða í
hitaveitunni
tekur sífelldum
breytingum
Eftir Gunnar Pál Baldvinsson
gunnarpall@mbl.is
EKKI verður af sölu ríkisins á hlut
þess í Hitaveitu Suðurnesja til Geysis
Green Energy. Þrjú sveitarfélaganna
sem hlut eiga í hitaveitunni, Reykja-
nesbær, Hafnarfjörður og Grindavík,
lýstu því yfir í gær að þau hygðust
nota forkaupsrétt sinn til hlutarins.
Upphaflega var samið um sölu á
eignarhlut ríkisins í byrjun maímán-
aðar. Samkvæmt tilboði Geysis
Green Energy átti ríkið að fá 7,6
milljarða króna fyrir hlutinn. Sam-
kvæmt samþykkt Hitaveitu Suður-
nesja hafa sveitarfélögin á Suðvest-
urhorni landsins, hluthafarnir, 60
daga frest til að nota forkaupsrétt að
þeim eignarhlutum sem seldir eru.
Þessi frestur vegna sölu ríkisins
rennur út í dag.
Á fundi bæjarstjórnar Reykjanes-
bæjar sem haldinn var í gærkveldi
rifjaði Árni Sigfússon bæjarstjóri
upp að stjórn Hitaveitu Suðurnesja
hefði komið saman og ákveðið að nota
ekki þann forkaupsrétt sem fyrirtæk-
ið á sjálft en jafnframt hefðu fulltrúar
sveitarfélaganna sjálfra komið saman
hinn 12. júní og rætt þann möguleika
að þau notuðu forkaupsrétt sinn. „Þá
kom ekkert fram sem gaf ástæðu til
að sveitarfélögin ætluðu að nota for-
kaupsréttinn,“ sagði Árni á bæjar-
stjórnarfundinum í gærkvöldi.
Ákváðu öll að beita
forkaupsrétti
Nú fyrir helgi dró síðan til tíðinda
þegar fram kom að nokkur sveitarfé-
laganna hefðu óskað eftir því við
Orkuveitu Reykjavíkur að hún keypti
þeirra hlut í Hitaveitu Suðurnesja.
Stjórnendur Geysis brugðust fljótt
við og keyptu rúmlega 28% hlut sem
sjö sveitarfélög áttu hvert um sig í
hitaveitunni. Eftir stóðu því Reykja-
nesbær með tæplega 40% hlut og
Hafnarfjarðarbær með rúmlega 15%
hlut auk 1,25% hlutar sem sveitar-
félög á Suðurnesjum héldu eftir.
Hefðu allar þessar sölur náð fram að
ganga hefði Geysir Green Energy átt
um 44% hlut í Hitaveitu Suðurnesja.
Í gær ákváðu hins vegar Hafnar-
fjarðarbær og Grindavíkurkaupstað-
ur að nota forkaupsrétt sinn í hlut rík-
isins sem seldur var til Geysis í
upphafi maí. Ganga sveitarstjórnirn-
ar því inn í tilboð Geysis og bæta við
sig sama hlutfalli af eignarhlut rík-
isins og sveitarfélögin eiga í Hitaveitu
Suðurnesja. Í gær var síðan jafn-
framt tilkynnt að Orkuveita Reykja-
víkur hefði samið við sveitarfélögin
bæði um að þau seldu Orkuveitunni
þá eignarhluti sem þau keyptu með
forkaupsréttinum. Jafnframt að
Grindavíkurkaupstaður seldi Orku-
veitunni 8% af þeim 8,51% sem kaup-
staðurinn á í Hitaveitu Suðurnesja.
Á bæjarstjórnarfundi Reykjanes-
bæjar í gærkvöldi kom fram að
fulltrúar bæði D-lista og A-lista eru
ósáttir við þá þróun sem orðið hefur í
eigendahópi Hitaveitu Suðurnesja.
Þeir sem til máls tóku voru almennt á
því að atburðarásin hefði skaðað sam-
skipti sveitarfélaganna í eigenda-
hópnum, þótt ekki væru bæjarfull-
trúarnir sammála um við hvaða
sveitarfélög væri þar að sakast. Sam-
þykkt var að sveitarfélagið beitti for-
kaupsrétti sínum á hluta ríkisins sem
seldur hefði verið til Geysis Green
Energy í samræmi við sinn eignar-
hlut.
Árni Sigfússon og samflokksmaður
hans Böðvar Jónsson bentu á að
markmið ríkisins með sölu síns hlutar
hefði verið að koma í veg fyrir að
Orkuveita Reykjavíkur og Lands-
virkjun eignuðust hlutinn vegna sam-
keppnissjónarmiða. Töldu þeir ýmis-
legt mæla gegn því að Orkuveitan
eignaðist hlut í fyrirtækinu. Benti
Árni m.a. á að erfitt yrði fyrir Hita-
veituna að vera í samkeppni við Orku-
veituna ef maður frá síðarnefnda fyr-
irtækinu sæti í stjórn þess
fyrrnefnda. Gagnrýndu bæjarfulltrú-
ar Sjálfstæðisflokksins að Orkuveitan
hefði ekkert samráð haft við Reykja-
nesbæ, sem stærsta eiganda Hita-
veitu Suðurnesja, um framtíð fyrir-
tækisins. Hitaveitan væri afar
mikilvæg fyrir Reykjanesbæ og því
eðlilegt að sveitarfélagið leitaði eftir
samstarfsaðila um rekstur hitaveit-
unnar sem hefði svipaða framtíðar-
sýn. „Þar er enginn útilokaður. Orku-
veita Reykjavíkur hefur í engu leitað
til viðræðna vði Reykjanesbæ og það
boðar ekki jákvætt samstarf,“ sagði
Árni í bæjarstjórn í gær. Sagði hann
að Reykjanesbær gæti um leið og
slíkir kaupsamningar kæmu upp á
borð stjórnar Hitaveitu Suðurnesja
tekið afstöðu til þess hvort forkaups-
rétti yrði beitt eða ekki. „Slík kaup
verða þá ekki til þess að eiga þá hluti,
enda er slíkt ekki á færi neins sveitar-
félags. Ætlun okkur hlyti þá að vera
að finna góðan samstarfsaðila.“
Í ræðu Árna kom fram að gott
samráð hefði verið á milli Reykjanes-
bæjar og Geysis Green Energy og
samstarf þessara aðila í stjórn hita-
veitunnar byði upp á mörg framtíð-
artækifæri.
Reykjanesbær myndi annars
missa stjórn á atburðarásinni
Aðspurður um það eftir fundinn
hvers vegna Reykjanesbær sæi sig
nú knúinn til að beita forkaupsrétti
sínum sagði Árni að ef bærinn nýtti
ekki réttinn þá myndu aðrir eigendur
Hitaveitu Suðurnesja nota sinn for-
kaupsrétt. „Þá stjórnum við ekki
lengur atburðarásinni og aðrir aðilar
geta komist inn sem við vitum ekki
hvað vilja gera með framtíð fyrirtæk-
isins.“
Guðbrandur Einarsson, fulltrúi
A-lista í bæjarstjórn Reykjanesbæj-
ar, gagnrýndi hins vegar þau sveit-
arfélög sem seldu eignarhlut sinn til
Geysis nú fyrir helgi. Það að svo stór
hluti Hitaveitu Suðurnesja væri nú
kominn í hendur einkaaðila væri
veruleiki sem ekki þóknaðist honum.
Sagðist hann skilja sjónarmið Hafn-
firðinga sem óttuðust að standa eftir
með óvirkan eignarhlut í hitaveitunni
en gagnrýndi einnig hversu fráhverf-
ir sjálfstæðismenn væru samstarfi
við Orkuveitu Reykjavíkur. „Er
Orkuveita Reykjavíkur ekki sam-
boðin okkur í samstarfi? Orkuveitan
er fyrirtæki eins og Hitaveita Suð-
urnesja og að minni hyggju fyrirtæki
sem hentar vel til samstarfs,“ sagði
Guðbrandur.
4 ÞRIÐJUDAGUR 3. JÚLÍ 2007 MORGUNBLAÐIÐ
FRÉTTIR
GUNNAR Svavarsson, bæjarfulltrúi í Hafnarfirði, seg-
ir út í bláinn þá útreikninga Geysis Greens að Hafnar-
fjörður muni tapa á annað hundrað milljónum króna ef
bærinn selji OR hlut sinn í Hitaveitu Suðurnesja á
genginu 7,0 sem Geysir Green hafði áður boðið í á
genginu 7,1. Gunnar minnir á þær yfirlýsingar Hafn-
arfjarðarbæjar að svo gæti farið að bærinn þyrfti að
selja ef hann lokaðist inni með hluti sína. „En menn
geta ekki verið að búa til mismunaverð á einhverju sem
var ekki til sölu,“ segir hann.
„Hafnarfjarðarbær er nú að fara að kaupa hluti í HS
á genginu 6,72 og mismunur þess og á umræddu sölu-
virði og markaðsvirði er um 400 milljónir króna. Það
verður að koma í ljós hvað Hafnarfjarðarbær getur
keypt mikið af því. Það er alveg eins hægt að reikna
það til baka. Það er því ekki hægt að reikna tap af ein-
hverju sem ekki er til sölu.“
Gunnar segir að koma verði í ljós í dag, þriðjudag,
hverjir beiti forkaupsrétti. „Það sem við höfum einfald-
lega verið að gera er að reyna að ná samkomulagi við
stærsta hluthafann [Reykjanesbæ]
og það náðist ekki. Þess vegna var
farið í þær varnaraðgerðir sem við
töldum að þyrfti að fara í. En ég
horfi björtum augum til þess að eftir
þennan áfanga geti menn sest niður
og rætt málið út frá nýjum for-
sendum.
Það er mjög sérstakt að vera næst-
stærsti hluthafinn í HS og hafa ekki
verið gefinn kostur á því á sínum
tíma að geta náð þriðjungshlut líkt og stærsti hluthaf-
inn ætlaði að gefa Geysi Green tækifæri á.
Það vilja allir fyrirtækinu vel, bæði þeir sem eiga í
því og þeir sem eru að reyna að kaupa í því, ekki hvað
síst neytendur sem vilja að fyrirtækið vaxi og dafni
þannig að það geti þjónað neytendum á hagkvæman
hátt.“
Ekki náðist í forsvarsmenn Grindavíkurbæjar í gær-
kvöldi til að bera undir þá yfirlýsingu Geysis Green.
Segir tapútreikninga út í bláinn
Gunnar Svavarsson
MORGUNBLAÐINU barst í gær eftirfarandi yfirlýsing
frá fyrirtækinu Geysi Green Energy:
„Sl. föstudag undirritaði Geysir Green Energy sam-
komulag við sjö sveitarfélög um kaup á hlutum þeirra í
Hitaveitu Suðurnesja (HS): Vestmannaeyjabæ, Árborg,
Kópavog, Voga, Sandgerði, Grindavík og Garð. Um var
að ræða allan hlut þessara sveitarfélaga í HS nema hvað
sveitarfélögin á Suðurnesjum héldu eftir um 1,25% hlut.
Formaður bæjarráðs Grindavíkur undirritaði sam-
komulagið við Geysi Green Energy föstudaginn 29. júní
fyrir hönd Grindavíkurbæjar.
Geysir Green Energy lítur að sjálfsögðu svo á að í gildi
sé samningur milli Grindvíkur og Geysis og mun leita
réttar síns um að staðið verði við þann samning. Formað-
ur bæjarráðs Grindavíkur samþykkti skriflega tilboð
Geysis Green Energy en í þeirri samþykkt felst bæði að
Grindavíkurbær fellur frá forkaupsrétti sínum að hlut-
um í HS, og að hann selji Geysi Green Energy hlut sinn
án nokkurra kvaða eða skuldbindinga.
Í þeim samningi sem gerður var við Grindavík á föstu-
daginn var verð á hlut 7,1 króna. Samkvæmt fréttum í
dag af meintum samningi sem Grindavík telur sig hafa
gert við annan aðila um sölu á sama hlut er gengið 7,0 og
væri tap íbúa Grindavíkur ef selt væri við þessu lægra
verði, um 62 milljónir króna. Þá er rétt að halda því til
haga að Hafnarfjarðarbæ stóð til boða að selja Geysi
Green Energy bréf sín í HS á genginu 7,1 en hefur
ákveðið að selja öðrum á genginu 7,0 ef af sölu verður.
Geysir mun áfram vinna af fullum heilindum að við-
skiptum sínum. Hitaveita Suðurnesja er mikilvægt og
gott fyrirtæki sem ber að efla með hagsmuni hluthafa og
viðskiptavina í fyrirrúmi.“
Segjast hafa samið við Grindavíkurbæ
RAMMT kvað að gróðureldum á höfuð-
borgarsvæðinu í gær og þurfti Slökkvilið
höfuðborgarsvæðisins að sinna fimm út-
köllum vegna þeirra. Er varað við hættu á
gróðureldum vegna þurrka og er því
beint til fólks að fara varlega með eld á
víðavangi. Í gær voru slökkviliðsmenn
kallaðir út vegna mosabruna í nágrenni
við skíðaskálann í Bláfjöllum en þar log-
aði í skraufþurrum mosa á 30-40 fermetra
svæði. Slökkvistarf tók klukkustund en
vandinn sem við er að etja þegar eldar af
þessu tagi kvikna er að ekki er hægt að
nota svonefndar klöppur til að berja eld-
inn niður, eins og tíðkast við sinuelda,
heldur þarf að nota vatn á mosann. Tank-
bíll var sendur á eftir dælubílum slökkvi-
liðsins og var nóg vatn til ráðstöfunar.
Varðstjóri slökkviliðsins segir mosann í
brunahættu þegar aðrir eins þurrkar
ríkja og nú er. Í gær var slökkviliðið einn-
ig kallað út vegna sinubruna við Keldna-
holt í gærkvöldi þótt komið sé vel fram á
sumar. Loks var slökkviliðið kallað út
seint í gærkvöldi vegna elda í gróðri við
Rauðavatn.
Slökkviliðið sem annast einnig sjúkra-
flutninga á höfuðborgarsvæðinu þurfti þá
að sinna óvenjumörgum flutningum í gær,
eða 80, en vanalega eru sjúkraflutningar
á milli 40 og 60 á hverjum degi. Um er að
ræða sjúkrabílaflutninga milli sjúkra-
stofnana, af heimilum á sjúkrahús eða af
slysavettvangi.
Gróður í eldhættu í borginni
Morgunblaðið/Sverrir
Eldhætta Slökkviliðsmenn slökkva í skraufþurru spreki við Rauðavatn seint í gærkvöldi. Fólk
er varað við hættu á gróðureldum í þurrkunum.