Menntamál - 01.12.1946, Blaðsíða 28

162
MENNTAMÁL
var reist á fögrum stað í miðju þorpi, þar sem álitið er
að víkingurinn Garðar Svavarsson hafi forðum byggt
sér skála.
Þegar fram liðu stundir og einkum eftir að alþýðuskól-
inn á Laugum tók til starfa, minnkaði aðsóknin úr sveit-
unum í skólann. Hins vegar fjölgaði að sama skapi nem-
endum úr Húsavík, og varð algengt, að börn, sem tóku
fullnaðarpróf, færu þegar næsta haust í unglingaskólann.
Af þessu leiddi, að breyta varð allmikið hinu fyrra kennslu-
sniði, er einkum var miðað við þroskaða nemendur. Þá
var einnig síðar tekin upp tveggja vetra kennsla í tungu-
málum og reikningi. Stóð svo um nokkra vetur. Árið 1940.
varð Benedikt að láta af stjórn beggja skólanna sökum
vanheilsu. Tók þá við Sigurður Gunnarsson frá Skógum
í Öxarfirði. Undir hans stjórn dafnaði skólinn vel. Lét
hann auka svo kennsluna í efri bekk, að skólinn varð
tveggja vetra alþýðuskóli. Tóku þá kennarar unglingaskól-
ans, — sem einkum voru kennarar barnaskólans og urðu
því að leggja hart að sér vegna kennslunnar við hinn skól-
ann, — að ræða það sín á meðal, hvort ekki væri tími til
kominn að skilja unglingaskólann frá barnaskólanum, afla
honum sérstakra kennara og breyta honum í gagnfræða-
skóla. Komu þeir hugmynd þessari á framfæri við þorps-
búa, og fékk hún þegar mjög góðan byr meðal þeirra.
Fyrir ötula framgöngu Sigurðar Gunnarssonar skóla-
stjóra tókst að haga kennslu þannig veturinn 1944—45,
að þeir af nemendum, sem vildu, gátu þreytt próf upp í
annan bekk væntanlegs gagnfræðaskóla. Vorið 1945 var
svo fenginn prófdómari frá Akureyri (séra Friðrik J.
Rafnar) til þess að leggja fyrir prófverkefni og dæma
úrlausnir. Stóðust allir þátttakendur prófið, og var próf-
dómari ánægður með árangurinn. Lagði hann til, að ungl-
ingaskólanum yrði breytt í gagnfræðaskóla, og starfaði
skólinn næsta vetur með nemendum þeim, sem þreytt höfðu