Heimir - 01.03.1911, Blaðsíða 6
H E I M I R
150
málafærslumaður og kona hans Katrín, fædd Textor. Afi
Goethes í föSurætt Friðrik George Goethe haföi komið til
Frankfurt sem bláfátækur skraddarasveinn á yngri árum sínum;
þar gerðist hann veitingamaöur og græddist fé, svo að hann gat
látið son sinn verða góðrar mentunar aðnjótandi. Foreldrar
Goethes tilheyrðu heldra fólkinu í Frankfurt, og þess vegna var
sjálfsagt að hann fengi alla þá mentun, sem var fáanleg. Bæði
foreldri hans voru vel gefin. Faðirinn var alvörumaður og
strangur, en móðirin léttlynd og gædd óvenjulega miklu íinynd-
unarafli. Goethe segir sjálfur, að hann hafi erft hið ytra útlit
sitt og alvöruna frá föður sínum, en lífsgleði Og löngun til að
yrkja frá móöur sinni.
Goethe var ekki látinn ganga í latínuskóla til undirbúnings
undir háskólann; faðir hans bjó hann að nokkru leyti sjálfur
undir háskólanám; að nokkru leyti var það gert af kennurum,
sem voru fengnir til þess. Þetta hefir efalaust haft nokkra
þýðingu fyrir andlegan þroska hans, því æska hans var miklu
frjálslegri en annara unglinga, sem mentaveginn gengu, og sem
urðu að eyða níu árum, því nær eingöngu í fornmálanám undir
mjög ströngum aga. Goethe var ekki námfús á fornmálin,
latínu lærði hann allvel, að sagt er, en grísku lítilsháttar. Aftur
á móti lærði hann hebresku. sem kom til af því, að þegar hann
heyrði Gyðinga tala þýzkublending sinn rak fiann sig á orð, sem
hann ekki skildi; hann vildi því læra hebreskuna, og faðir hans
fékk rektor latínuskólans í Frankfurt til að kenna honum hana.
Með nýju málin gekk honum vel. Foreldrar hans kunnu bæði
ítölsku og lærði hann hana til hlýtar af þeim. Frakknesku lærði
hann af umgengni við Frakka, er áttu heima í Frankfurt. Þar
var frakkneskt leikhús; þangað fór hann oft og lærði langar
klausur úr leikritunum, sem hann síðan gat mælt af munni fram
með hárréttum framburði án þess að skilja þær. Til að kenna
honum ensku var sérstakur kennari fenginn. Auk þessara
tungumála var honum kend sönglist og dráttlist. Hann var
mjög hneigður til dráttlistar, og ásetti sér með tímanum að
verða málari; en þó ekkert yrði af því iðkaði hann dráttlistina
alla æfi og nokkrar landslagsmyndir eru til eftir hann.