Árbók Háskóla Íslands - 01.01.1953, Síða 116

114
áður fyrir framan Alþingishúsið, en af svölum þess flutti Davíð
skáld Stefánsson frá Fagraskógi stórbrotna og áhrifamikla ræðu,
sem hlaut prýðilegar undirtektir áheyrenda. Voru menn almennt
þeirrar skoðunar, að ræðumannsval af alþingissvölunum hefði tek-
izt með afbrigðum vel í þetta skipti og lýstu ánægju sinni yfir því,
að hið mikla þjóðskáld skyldi rjúfa langa þögn á vegum háskóla-
stúdenta. Kl. 15.30 hófst samkoma í hátíðasal Háskólans og töluðu
þar fyrrv. formaður stúdentaráðs, Bragi Sigurðsson, og sr. Þorsteinn
fríkirkjuprestur Bjömsson. Þar sungu þau og tvísöng Guðrún Á.
Símonar og Guðmundur Jónsson og Rögnvaldur Jónsson lék á píanó.
Um kvöldið var hóf að Hótel Borg. Þar flutti Theodór B. Líndal hrl.
ræðu, Egill Bjamason og Jón Kjartansson sungu glunta, og loks las
Brynjólfur Jóhannesson upp. Að lokum var stiginn dans fram eftir
nóttu. Fóru hátíðahöldin öll mjög vel og virðulega fram.
2) Áramótafagnaður var haldinn á vegum stúdentaráðs að Hótel
Borg. Var þar mikill fjöldi gesta saman kominn og skemmtu menn
sér lengi nætur. Gísli Jónsson cand. mag. flutti þar áramótaræðu og
skemmtiatriði voru. Fór fagnaður þessi fram með miklum sóma, og
var almenn ánægja ríkjandi með hann.
3) Kvöldvökur vom haldnar á starfsárinu, þar á meðal ein kvöld-
vaka ásamt Stúdentafélagi Reykjavíkur í Sjálfstæðishúsinu. Síðasta
vetrardag efndi stúdentaráð til hófs mikils að Hótel Borg, sem
tókst prýðilega í hvívetna. Það kvöld sá ráðið enn fremur um kvöld-
vöku í Útvarpinu. Önnuðust stúdentar hana að mestu leyti, meðal
annars komu þar fram 4 ungir háskólaborgarar, er lásu eftir sig
kvæði og sögur. Þótti það nýbreytni með ágætum.
Að hinu leytinu má geta þess, að erfitt var að fá húsnæði fyrir
dansleiki og kvöldvökur, eftir að vínbannið komst á. Var þá erfitt
um vik og nær illkleift að halda skemmtanir. Við það minnkaði stór-
um einn aðaltekjuliður ráðsins, en þó skilar fráfarandi ráð um 1300
króna hagnaði, eins og sjá má af reikningum gjaldkera.
Bókmenntakynning. Á fundi í stúdentaráði hinn 25. febr. 1953 bar
Bragi Sigurðsson fram eftirfarandi tillögu fyrir hönd fulltrúa Vöku-
manna í ráðinu:
Stúdentaráð samþykkir á fundi sínum 25. febr. 1953 að taka upp
sem fastan þátt í menningar- og félagslífi stúdenta sérstakar kvöld-
vökur í hátíðasal Háskólans. Á þeim fer fram sem höfuðþáttur kynn-
ing á verkum og lífi hinna mestu höfuðsnillinga og andans manna
íslenzkra. Verði að minnsta kosti hin fyrsta þessara kvöldvakna
haldin í vetur og verði hún helguð einu hinna mestu stórmenna and-
ans, Einari Benediktssyni. Verði eftir því sem henta þykir komið
við stuttum þáttum tónlistar milli hins talaða máls. Verði þegar