Árbók Háskóla Íslands - 01.01.1963, Page 26

24
sjálfstæða, skapandi menn. Á Háskóla vorum hvílir sú mikla
ábyrgð að búa yður sem bezt undir lífið, þar sem yður er
ætlað það hlutverk að fást við ýmiss konar sérfræðileg verkefni.
Við þann undirbúning skiptir það miklu máli, að menn venj-
ist hollu félagslífi og taki eðlilegan þátt í því, og ég tel, að það
sé eitt brýnasta verkefni Háskólans nú að stuðla að miklu
átaki um bætta aðstöðu stúdenta til félagslegra iðkana. Há-
skólinn hlýtur einnig að telja það skyldu sína að orka á mót-
un persónuleika yðar, brýna fyrir yður háttvísi og siðfágun,
reglusemi og vandvirkni og sýna fram á, að
„sjálft hugvitið, þekkingin hjaðnar sem blekking,
sé hjartað ei með, sem undir slær“.
Það er „hjartans, andans og viljans menning", sem hér á að
ráða ríkjum og móta allt far vort.
Þér hafið síðustu vikurnar staðið andspænis einum mesta
vanda lífs yðar og örlagaríkustu ákvörðun — þeirri að velja
yður háskólagrein. Háskólinn hefir nú veitt yður viðtöku, og
í dag fáið þér í hendur hinn táknræna lykil að skólanum,
háskólaborgarabréfið. En hyggilegt er að skyggnast um, gera
sér sem fyrst grein fyrir heppilegri námstækni og temja sér
hagkvæm vinnubrögð, virða fyrir sér lögmál sérnámsins og
taka vel góðum ráðum og leiðbeiningum kennara og annarra,
sem reynslunni eru ríkari. Kennarar Háskólans eru fúsir á að
ráða yður námsráð, og það er á ýmsan hátt þroskasamlegt
að stunda háskólanám við lítinn háskóla, þar sem tengsl stúd-
enta og kennara eru jafnnáin og traust sem hér — þar sem
bölvun stærðarinnar eða stórleikans malar menn ekki, svo að
notuð séu orð Brandeis hæstaréttardómara. Ég el þá von, að
þér komið hingað með hugarfari fræðilegrar hnýsni og for-
vitni, þeirrar miklu sálrænu uppsprettu vizku og uppgötvana.
Neytið allra færa til að svala þeirri forvitni, haldið ótrauðir
á bratta háskólaáranna — og horfið fram, en ekki aftur á
göngu yðar á Helgafell Háskólans. Minnizt orða Þorsteins
Erlingssonar:
„því sá sem hræðist fjallið og einatt aftur snýr,
fær aldrei leyst þá gátu, hvað hinum megin býr“.