Fréttablaðið - 12.05.2010, Blaðsíða 8

8 12. maí 2010 MIÐVIKUDAGUR
HEILBRIGÐISMÁL Björgunarskip
Björgunarfélags Vestmannaeyja
flutti konu í barnsnauð frá Vest-
mannaeyjum aðfaranótt þriðjudags
þar sem öskufall hamlaði flugi. Í
Landeyjahöfn beið sjúkrabíll með
ljósmóður frá Selfossi og flutti kon-
una á fæðingardeild Landspítalans
í Reykjavík.
„Þetta gekk vonum framar,“
segir Birgir Nielsen, sem varð
konu sinni samferða til Reykjavík-
ur. Hann segir barnið ekki væntan-
legt alveg strax en þau séu í góðum
höndum á Landspítalanum.
„Það var rjómablíða í nótt og
björgunarsveitin leysti þetta vel
úr hendi,“ segir hann, en kveður þó
að óneitanlega hafi verið sérstakt
að koma inn í Bakkafjöru í fyrri-
nótt. „Við fengum þær fregnir að
þyrlan myndi ekki koma og vorum
svo komin í bæinn tveimur tímum
seinna.“
Gunnar Kristinn Gunnarsson,
framkvæmdastjóri Heilbrigðis-
stofnunar Vestmannaeyja, segir
að öskufall vegna eldgossins í Eyja-
fjallajökli hamli þar flugi núna,
Eyjarnar séu inni á flugbannssvæði
og völlurinn lokaður. „Við höfðum
samband við Landhelgisgæsluna
en þeir treystu sér ekki til að koma
með þyrluna nema um líf og dauða
væri að tefla og það var ekki í þessu
tilviki,“ segir hann. - óká
BJÖRGUNARBÁTURINN ÞÓR Kona í
barnsnauð var flutt í land með björgun-
arbátnum Þór.
Kona í barnsnauð var flutt yfir sjó og land á Landspítalann:
Öskufall hamlaði flugi í Eyjum
500 bæklingar með nýju sniði.
UMHVERFISVOTTUÐ
PRENTSMIÐJA
50 kassar utan um augnakonfekt.
Oddi – umhverfisvottuð prentsmiðja. Höfðabakka 7, 110 Reykjavík, sími 515 5000, www.oddi.is
DÓMSMÁL Mál níu mótmælenda
sem ákærðir eru fyrir árás á
Alþingi í desember 2008 verður
tekið fyrir í Héraðsdómi Reykja-
víkur í dag. Þeir eiga yfir höfði sér
að minnsta kosti eins árs fangelsi
verði þeir fundnir sekir.
Sólveig Anna Jónsdóttir leik-
skólastarfsmaður er meðal sak-
borninga. Hún segir það hafa
komið sér á óvart að vera ákærð
fyrir árás á Alþingi, samkvæmt
100. grein hegningarlaga.
„Mig grunaði að það yrði gefin
út ákæra, eins og menn létu á
sínum tíma. Ég var yfirheyrð
tvisvar, í seinna skiptið sótti lög-
reglan mig í vinnuna, og það var
greinilegt að það átti að taka
okkur föstum tökum. En mér datt
ekki í hug að viðbrögðin yrðu
svona hysterísk. Það er svívirði-
legt að krefjast refsingar sam-
kvæmt 100. grein hegningarlaga
og liggur við að maður tali um pól-
itískar ofsóknir.“
Sólveig Anna segir það óþægi-
lega tilhugsun að eiga á hættu að
verða dæmd. „Eins og staðan er
núna þá hef ég á tilfinningunni að
ég verði sakfelld. Ég vona auðvit-
að að svo fari ekki. Ef fólk fer yfir
gögnin sést að þar stendur ekki
steinn yfir steini, en satt best að
segja býst ég við því að fá dóm.“
Spurð hvort hún óttist að fara í
fangelsi segist hún ekki hafa leitt
hugann að því. „Ég leyfi mér ekki
að hugsa svo langt en það yrði
ábyggilega ömurleg lífsreynsla.“
Sólveig Anna telur að með því
að ákæra mótmælendur fyrir
árás á Alþingi séu yfirvöld að
senda skilaboð um að hart verði
tekið á mótmælum á borð við þau
sem urðu í búsáhaldabyltingunni.
„Það er í raun verið að hræða fólk
frá því að taka þátt í mótmælaað-
gerðum á tímum þegar það hefur
sjaldan eða aldrei verið jafnmikil
ástæða til að mótmæla.“
Sólveig Anna segist vona að
ekki komi til átaka í dag, eins og
gerðist við fyrirtöku málsins 30.
apríl síðastliðinn. Ekki var nægur
sætafjöldi fyrir áhorfendur og var
þeim sem ekki höfðu sæti gert að
víkja þaðan. Þegar sumir við-
staddra neituðu að hlíta fyrir-
mælunum voru þeir fjarlægðir
með valdi. Bón um að fyrirtakan í
dag færi fram í stærri dómsal var
synjað. „Réttarhaldið er eftir sem
áður opið,“ segir hún. „Ég vona að
lögreglan virði það og hemji sig.“
bergsteinn@frettabladid.is
Hef á tilfinningunni
að ég verði sakfelld
Sólveig Anna Jónsdóttir leikskólastarfsmaður er ásamt átta öðrum ákærð fyrir
árás á Alþingi í búsáhaldabyltingunni. Hún segir sakargiftirnar svívirðilegar.
SÓLVEIG ANNA JÓNSDÓTTIR Segir til-
gang ákærunnar vera að hræða fólk frá
því að taka þátt í mótmælaaðgerðum.
FRÉTTABLAÐIÐ/ANTON
Skrifstofustjóri Alþingis kærði mótmælendurna níu til lög-
reglu á sínum tíma. Þetta kom fram í svari Ástu Ragnheið-
ar Jóhannesdóttur, forseta Alþingis, við fyrirspurn Birgittu
Jónsdóttur, þingmanns Hreyfingarinnar, á Alþingi í gær.
Birgitta spurði með hvaða hætti ákvörðun um aðkomu
Alþingis að ákærum gegn mótmælendunum níu var
tekin, hver óskaði eftir rannsókn lögreglu og í umboði
hvers.
Í svari Ástu Ragnheiðar kemur fram að það sé skrif-
stofustjóra Alþingis að tryggja öryggi þingsins. Mynd-
bandsupptaka sýni að mannsöfnuðurinn hafi yfirbugað
þingvörð við innganginn og mátti ætla að hann væri ekki
kominn í friðsamlegum tilgangi. „Af samtölunum við
þingverði og lögreglumanninn varð enn fremur ráðið að
hópurinn skirrðist ekki við að beita líkamlegu valdi til að
komast í tæri við þingmenn.“
Enn fremur segir Ásta að starfsmenn skrifstofu Alþingis
hafi orðið fyrir meiðslum og skrifstofustjóri beri ábyrgð
gagnvart þeim. „Forseti Alþingis lítur svo á að á skrifstofu-
stjóra Alþingis hvíli sjálfstæð skylda til að standa vörð um
öryggi starfsmanna Alþingis sem og alþingismanna,“ segir
í svari Ástu Ragnheiðar. „Að mati forseta er augljóst að
skrifstofustjórinn var bær til að taka sjálfstæða ákvörðun
um hvort óskað yrði eftir rannsókn á atvikinu. Til þess
þurfti hann hvorki atbeina forseta né annarra eins og ýjað
er að í spurningunni.“
„Skirrðist ekki við að beita líkamlegu valdi“