Fréttablaðið - 13.05.2011, Síða 2

13. maí 2011 FÖSTUDAGUR2
Hjálmar, er ekki verið að bera
í bakkafullan lækinn að flytja
enn eina styttu niður í miðbæ?
„Nei, hún mun bera af í sinni
síðbúnu fegurð.“
Hjálmar Sveinsson á sæti í skipulagsráði
Reykjavíkur sem hefur ákveðið að flytja
Vatnsberann, styttu Ásmundar Sveins-
sonar, frá Öskjuhlið niður í Austurstræti.
FÓLK „Þetta eru mjög góð tíðindi.
Það er þungu fargi af okkur öllum
létt,“ segir Óskar P. Friðriksson, afi
hins átta ára gamla Leifs Magnús-
ar Grétarssonar Thisland. Norskur
dómstóll hefur samþykkt að veita
Grétari, föður Leifs, fullt forræði
yfir honum og er von á Leif til
Íslands í byrjun júní þegar skóla-
haldi lýkur í bænum Mandal í Nor-
egi. Þar hefur hann búið hjá norsk-
um ættingjum frá því að móðir
hans, Heidi Thisland Jensen, var
myrt á hrottafengin hátt af kærasta
sínum í mars síðastliðnum.
„Ég talaði við Leif í gær og þá
lá bara vel á honum, hann hlakkar
mikið til að koma til okkar,“ segir
Óskar og bætir við: „Við höfum
auðvitað verið í miklu sambandi
við hann en við pössum okkur þó
að hringja ekki í hann allt of oft
heldur. Hann er hjá mjög góðu
fólki.“
Óskar á ekki von á því að það
reynist Leif erfitt að aðlagast lífi
á Íslandi. Hann hefur haft annan
fótinn hér á landi undanfarin ár og
bjó meðal annars hér frá júní 2008
til ágúst 2010. Íslensk fjölskylda
Leifs býr í Vestmannaeyjum og
þar gekk hann um tíma í skóla.
„Það er hins vegar skylda okkar
núna að sjá til þess að hann fái
áfram að umgangast og vera með
sínum ættingjum í Noregi. Amma
hans talar til dæmis enga íslensku
og þess vegna höfum við ráðið
manneskju til að kenna honum og
halda við norskunni,“ segir Óskar
og bætir við: „Núna horfum við
bara björtum augum á framtíð-
ina og vonandi gróa sárin með
tímanum. Þetta var náttúrlega
gríðarleg áfall. Fyrir utan það að
missa Heidi stóðum við allt í einu
frammi fyrir því að þurfa að sanna
okkur fyrir ættingjum hennar
úti. En með góðra manna hjálp og
mörgum bænum hefur þetta farið
svona.“
Grétar, sonur Óskars, kynntist
Heidi þegar hún dvaldist á
sveitabæ hér á landi árið 2002.
Þau felldu hugi saman og eign-
uðust Leif Magnús í janúar 2003.
Heidi fluttist aftur til Noregs með
drenginn en þau komu reglulega í
langar heimsóknir til Íslands.
Heidi fannst látin af völdum
stungusára fyrir utan heimili sitt
í Mandal hinn 20. mars síðastlið-
inn. Nokkrum klukkustundum
síðar var kærasti hennar hand-
tekinn en hann hefur síðan játað á
sig morðið. - mþl
Leif Magnús flytur
til Íslands í sumar
Grétar Óskarsson hefur fengið úrskurðað fullt forræði yfir Leif Magnúsi syni
sínum. Leif kemur til Íslands í júní þegar skólahaldi í Noregi lýkur. Leif hefur
búið hjá ættingjum þar í landi frá því að norsk móðir hans var myrt í mars.
LEIF MAGNÚS Leif ásamt Grétari föður sínum, Hildi Helgadóttur ömmu sinni og Valgerði Erlu Óskarsdóttur föðursystur sinni.
MYND/ÓSKAR P. FRIÐRIKSSON
BANDARÍKIN, AP Í dagbókum og
öðrum skrifum Osama bin Laden,
sem fundust á felustað hans í
Pakistan, er að finna leiðbeining-
ar til hryðjuverkamanna þar sem
þeir eru hvattir til að gera fleiri
árásir á Bandaríkjamenn.
Meðal annars segir hann þeim
að ráðast á Los Angeles ekki
síður en New York, beina vopn-
um sínum að járnbrautum ekki
síður en flugvélum, og velja
helst mikilvægar dagsetningar
til árása.
Þá hvetur hann mennina til
að drepa sem
flesta Banda-
r íkjamenn í
einu, í von um
að það dugi til
að hrekja þá frá
arabaheimin-
um. Hann segir
að einungis ef
mannfallið sé
talið í þúsund-
um, eins og haustið 2001, geti það
kallað fram raunverulega stefnu-
breytingu í Bandaríkjunum.
Bandarískir embættismenn
segja þessi skrif og fleiri gögn
sem fundust sýna að hann hafi
áfram gegnt mikilvægu hlutverki
í neti hryðjuverkamanna.
Samskipti hans við leiðtoga
þeirra hryðjuverkasamtaka sem
enn eru talin tengjast Al Kaída,
til dæmis í Jemen, Alsír, Írak og
Sómalíu, virðast einkum hafa
farið fram með því móti að minn-
islyklar, sem hægt er að stinga í
samband við tölvur, eru fluttir á
milli með sendlum. Þessi aðferð
er seinleg en hefur þann kost að
erfitt er að rekja boðin. - gb
Bandaríkjamenn skýra frá innihaldi dagbóka bin Ladens frá dvölinni í Pakistan:
Gaf leiðbeiningar um árásir
OSAMA BIN LADEN
SLYS Þyrla Landhelgisgæslunnar
flutti mann og konu á bráðamót-
töku Landspítalans eftir harð-
an árekstur á þjóðveginum við
Skriðuland, nærri Búðardal, á
fimmta tímanum í gær.
Ástand fólksins var stöðugt í
gærkvöldi og það ekki talið í bráðri
lífshættu, samkvæmt upplýsingum
frá Landspítalanum.
Slysið virðist hafa orðið með
þeim hætti að fólksbíl með hjól-
hýsi í eftirdragi hafi verið ekið í
veg fyrir jeppa sem ók eftir þjóð-
veginum, samkvæmt upplýsingum
frá vegfarendum sem komu á vett-
vang eftir slysið. Erfiðlega gekk að
klippa karlmann sem slasaðist út
úr bílnum, sem er gerónýtur eftir
áreksturinn.
Samkvæmt upplýsingum frá
lögreglunni í Borgarnesi tafðist
umferð mikið í nokkra klukkutíma
vegna slyssins. - bj
Þyrla Landhelgisgæslunnar sótti karlmann og konu sem slösuðust í bílslysi:
Fólkið er ekki talið í lífshættu
SÓTT Óttast var að maður og kona væru alvarlega slösuð eftir bílslys við Skriðuland
og var þyrla Landhelgisgæslunnar kölluð til. FRÉTTABLAÐIÐ/GAR
BANDARÍKIN Lawrence Wilkerson,
fyrrverandi starfsmannastjóri
Colins Powell, sem þá var utan-
ríkisráðherra í stjórn George W.
Bush, segist
telja að Bush
og ríkisstjórn
hans hafi ekki
viljað hafa
hendur í hári
bin Ladens.
„Maður gæti
verið mjög
kaldranaleg-
ur og sagt að
hann hefði ekki
viljað ná honum vegna þess að
þegar hann væri kominn í þeirra
hendur væri stríðinu lokið og
allt pólitíska forskotið þar með
farið,“ sagði hann í sjónvarps-
viðtali. „Eða maður gæti sagt að
þeir hafi gert sér grein fyrir því
að það væri nánast ómögulegt að
ná honum vegna þess sem þeir
höfðu gert bæði leyniþjónustunni
og öðrum þeim stofnunum sem
þurfti til að ná honum. Þeir voru
nánast búnir að leggja það allt í
rúst.“ - gb
Starfsmannastjóri Powells:
Bush vildi ekki
ná bin Laden
LAWRENCE
WILKERSON
DANMÖRK Mikil ásókn er meðal
Dana í að gerast tilraunadýr
fyrir hinar ýmsu rannsóknir.
Þetta kemur fram í þarlendum
fjölmiðlum og eru leiddar líkur
að því að peningaþóknun hvetji
fólk til þátttöku.
Alls eru 3.500 manns nú skráð-
ir inn á heimasíðu þar sem bjóð-
ast allt að tíu þúsund danskar
krónur, rúmlega 200 þúsund
íslenskar, fyrir þátttöku.
Það þykir sumum skjóta
skökku við þar sem lög kveða á
um að peningar megi ekki vera
ástæða þátttöku. Hefur siðanefnd
vísindaráðs þar í landi ákveðið að
skoða málið frekar. - þj
Rannsóknir í Danmörku:
Drýgja tekjur
sem tilraunadýr
EUROVISION Svíar og Danir voru
meðal þeirra landa sem komust í
úrslit Eurovision-söngvakeppn-
innar í gærkvöldi, þegar seinni
undanúrslitakeppnin fór fram.
Ásamt þeim komust Bosnía og
Hersegóvína, Austurríki, Úkr-
aína, Moldóva, Slóvenía, Rúm-
enía, Eistland og Írland áfram í
úrslitin. Þau bætast því í hópinn
með Íslandi, Serbíu, Rússlandi,
Sviss, Georgíu, Finnlandi, Ung-
verjalandi, Litháen, Aserbaíd-
sjan og Grikklandi, sem komust
áfram síðastliðinn þriðjudag.
Úrslitakeppnin fer fram á
morgun og verða Íslendingar
númer 21 í röðinni á svið. - þeb
Seinna úrslitakvöldið:
Danir og Svíar í
úrslitakeppnina
DÓMSMÁL Lögreglustjórinn á
höfuðborgarsvæðinu hefur ákært
karlmann á fertugsaldri fyrir
landabrugg. Manninum er gefið
að sök að hafa á heimili sínu í
Skólagerði í Kópavogi framleitt í
söluskyni 850 lítra af gambra.
Gambrinn reyndist vera með 9
til 13 prósenta áfengisstyrkleika.
Jafnframt er manninum gefið að
sök að hafa framleitt 330 lítra af
landa, með 34 prósenta og 58 pró-
senta styrkleika. Áfengið fannst
við húsleit lögreglu á heimili
mannsins í nóvember í fyrra. - jss
Ötull bruggari ákærður:
Var með 1.100
lítra af bruggi
Í ÚRSLIT Dönsku keppendurnir voru
að vonum lukkulegir með að komast í
úrslit. FRÉTTABLAÐIÐ/AP
LÖGREGLUMÁL Sjúkraflutninga-
menn endurlífguðu mann í hjarta-
stoppi á Sæbrautinni um miðjan
dag í gær. Maðurinn hafði líklega
misst stjórn á bílnum við hjarta-
stoppið, með þeim afleiðingum að
bíllinn fór yfir umferðareyju, á
öfugan vegarhelming og valt.
Þegar sjúkraflutningamenn
komu að honum var hann í hjarta-
stoppi en ekki með alvarlega
áverka af völdum bílveltunnar.
Hann var endurlífgaður og færð-
ur til eftirlits á Landspítalanum.
- þeb
Ökumaður velti bíl sínum:
Endurlífguðu
mann á Sæbraut
SPURNING DAGSINS