Bændablaðið - 31.08.2004, Blaðsíða 29

Þriðjudagur 31. ágúst 2004 29
Nýtt kennslu- og rannsóknarfjós var tekið í notkun á Hvanneyri í byrjun ágúst.
Bygging þessa mannvirkis hefur verið lengi í umræðu og langþráður áfangi fyrir
nautgriparæktarkennslu og rannsóknir á sviði nautgriparæktar. Með tilkomu þessa
fjóss verður aflagt eitt elsta fjós sem enn er notað hér á landi til mjólkurframleiðslu,
byggt á árunum 1928-1929 og hefur þjónað sem kennsluaðstaða fyrir meginþorra
þeirra bænda sem nú stunda mjólkurframleiðslu í landinu. Með nýja fjósinu verður
mikil breyting á kennslu- og rannsóknaraðstöðu í nautgriparækt í landinu. Boðið
verður upp á nútímalega aðstöðu fyrir gripi og fólk; kýr og uppeldi verður á
legubásum en kálfar í hálmstíum með sjálfvirkri mjólkurfóðrun. Kýrnar verða
mjólkaðar í 2x6 mjaltabás, sem um leið verður nýttur til kennslu fyrir bændaefni og
til endurmenntunar fyrir starfandi bændur. Fjósið verður rúmgott og bjart og
sérstaklega hefur verið hugað að móttöku hópa. Loftræsting verður náttúruleg þannig
að hvinur frá viftum mun ekki trufla kennslu eða leiðsögn.
Í ræðu Magnúsar B. Jónssonar, rektors LBH, kom fram að Landssamband kúabænda og
bændur í landinu hafa á undanförnum árum margsinnis sent frá sér samþykktir og ályktanir
að hér þyrfti að efla kennlu og rannsóknir í nautgriparækt og jafnframt að hér ætti að rísa
miðstöð nautgripafræða í landinu. "Undir þessi sjónarmið var tekið af mörgum en þrátt fyrir
það varð ekki af því að hafist yrði handa um framkvæmdir fyrr en fyrir um fimm árum. Áður
hafði verið rætt um breytingar á fjósinu sem fyrir var og voru settar fram hugmyndir um
hvernig það mætti verða. Það varð þó ljóst að það væri ekki unnt að skapa viðunandi
framtíðaraðstöðu í þeirri byggingu nema með ærnum kostnaði. Mun heppilegra væri að
byggja nýtt fjós til þess að fullnægja þeim kröfum sem nútíminn gerði til slíkrar aðstöðu,"
sagði Magnús.
Hönnunin var samstarfsverkefni margra aðila en rektor sagði að þar hefði
Byggingaþjónuststa landbúnaðarins haft megin ábyrgð. "Þá er ánægjulegt hversu vel hefur
tekist um samstarf að fjármagna þetta verkefni. Þar var samstaða milli ríkisins undir forystu
landbúnaðarráðherra, atvinnuvegarins og Framleiðnisjóðs landbúnaðarins um að tryggja það
fjármagn sem þurfti til þess að hér risi kennslu- og rannsóknaraðstaða sem hæfði
nautgriparæktarverkefnum framtíðarinnar.
Á árunum 1928- 1929 var byggt hér fjós sem nú er að ljúka hlutverki sínu. Það var
sennilega mun glæsilega séð með augum samtímans en það fjós sem hér er risið. Það var
byggt í árdaga mikilla breytinga sem urðu á starfsumhverfi mjólkurframleiðslunnar m.a.
með tilkomu mjólkursölulaganna," sagði rektor í ræðu sinni.
Nýtt kennslu- og rann-
sóknarfjós á Hvanneyri
Hér ræða þeir saman Magnús
Stefánsson alþingismaður og
Sveinn Hallgrímsson, bóndi á
Vatnshömrum. Til hliðar eru
feðgarnir Gísli Örn Matthíasson og
Jökull Gíslason en á myndinni
fyrir neðan eru aðrir feðgar - þeir
Sigsteinn Pálsson fyrrverandi
bóndi á Blikastöðum og Magnús
Sigsteinsson, yfirmaður bygginga-
þjónustu Bændasamtakanna.
Stella Dögg Eiríksdóttir Blöndal
brosti blítt til ljósmyndara
Bændablaðsins. Efsta myndin
sýnir lítinn hluta gesta sem komu
til að fagna nýja fjósinu. Þar fyrir
neðan er Guðlaugur Antonsson,
starfsmaður Búnaðarsamtaka
Vesturlands og hjónin Stefán
Freyr Guðmundsson,
fjósameistari á Hvanneyri og
Þóreyju Bjarnadóttur. Til hægri
eru hjónin Finnur Guðmundsson
og Margrét Þóroddsdóttir á
Bekansstöðum.