Læknablaðið - 15.03.1987, Qupperneq 42

98
LÆKNABLAÐIÐ
nefna framlag norðlenskra kvenna til
fjársöfnunar fyrir sjúkrahúsið. Þá voru 70
kvenfélagadeildir starfandi á Norðurlandi og mun
sérhver þeirra hafa lagt fram sinn skerf og vel
það.
Það er umhugsunarefni hvernig ástatt væri í
heilbrigðismálum Iandsmanna hefðu konur ekki
sífellt knúið á um framkvæmdir og lagt fram fé til
þeirra. Sú saga verður þó ekki rakin hér og nú.
Nýja sjúkrahúsið var frá byrjun nefnt
Fjórðungssjúkrahúsið á Akureyri og viðurkennt
þannig í verki þótt formleg viðurkenning hafi
ekki hlotist fyrr en 1971. Þá var ákveðið að
sjúkrahúsið skyldi vera almennt sjúkrahús fyrir
Akureyri og nærsveitir, sérfræðisjúkrahús fyrir
Norðurland og hluta Austurlands og
aðalvarasjúkrahús landsins utan
höfuðborgarsvæðisins með tilliti til
almannavarna. Einnig var ákveðið að sjúkrahúsið
skyldi stækkað þannig að það rúmaði alls 250
sjúklinga og yrði það fullgert árið 1980.
Fyrsta skóflustunga nýja áfangans var þó ekki
tekin fyrr en í nóvember 1973 og enn er ólokið því
sem átti að ljúka fyrir árslok 1980.
Framan af voru tvær aðaldeildir á
Fjórðungssjúkrahúsinu, handlækningadeild með
tilheyrandi fæðingar- og kvensjúkdómadeild og
lyflækningadeild með áhangandi geðdeild og
seinna barnadeild. Nú eru 13 deildir á
sjúkrahúsinu, hver með sérstökum yfirlækni, auk
hjúkrunardeildar í Systraseli sem rúmar 20
sjúklinga. Alls eru á sjúkrahúsinu núna 161 rúm
og eru þá meðtaldar langlegudeildir fyrir 44
sjúklinga. Nýjasta deildin er geðdeild og var hún
formlega tekin í notkun 23. maí 1986. Á
geðdeildinni er móttökudeild fyrir tíu sjúklinga í
sólarhringsvist og einn dagsjúkling.
Fjórðungssjúkrahúsið á Akureyri hefur verið
happastofnun frá upphafi eins og glögglega
kemur fram hjá viðmælendum okkar hér á eftir.
Þar hafa mörg merk spor verið stigin, nefna má
að fyrstu sjúkraliðar landsins voru útskrifaðir frá
Fjórðungssjúkrahúsinu árið 1966 og þar var fyrst
hafin kennsla á þeirri námsbraut.
Sjúkrahúsið er þó ekki fætt með silfurskeið i
munni og hefur fjármagnsskortur hamlað
uppbyggingu nokkuð.
Það velkist hins vegar ekki fyrir læknum
Fjórðungssjúkrahússins hver væri æskileg þróun
þess. Eftirfarandi kafli úr erindi Ólafs
Sigurðssonar yfirlæknis til heilbrigðisþings árið
1980 lýsir í hnotskurn afstöðu þeirra
norðanmanna:
»Hins vegar gæti þróun sjúkrahússins á Akureyri
úr deildasjúkrahúsi í svæðissjúkrahús bætt stöðu
og hag annarra sjúkrahúsa í þessum landshluta.
Innbyrðis samskipti og gagnkvæm miðlun á
gögnum og fræðslu gætu aukist milli sjúkrahúsa
og heilsugæslustöðva á Norðurlandi öllum
aðilum í heilbrigðisþjónustu þar til framdráttar
og bóta. Styttra og auðveldara yrði að senda
sjúklinga til sérfræðinga innan og utan
sjúkrahúss og betri sérfræðingaþjónusta myndi
fást. Styttra og auðveldara yrði fyrir sérfræðinga
svo sem augnlækna, háls-, nef- og eyrnalækna,
húðsjúkdómalækna og hjartalækna að fara sem
ráðgefandi læknar til annarra sjúkrahúsa og
heilsugæslustöðva í fjórðungnum. Ekki virðist
efamál, að svæðissjúkrahús á Akureyri myndi
bæta mjög heilbrigðisþjónustu á Norðurlandi,
þegar á heildina er litið. Og eins og áður var sagt,
yrði sjúkrahús á Akureyri með því móti
aðalvarasjúkrahús landsins í almannavörnum
þess.
Hvað svo sem líður almannavörnum landsins, má
skoða það ekki einungis sem sanngirnis og
réttlætismál, heldur líka að nokkru leyti sem
þjóðhagslegt mál, að eitt svæðissjúkrahús verði
staðsett úti á landsbyggðinni henni til styrktar,
þar sem nægilegur fólksfjöldi er fyrir tilvist þess
eins og er á Norður- og Norð-Austurlandi. Ekki
er efamál, að það myndi stuðla að auknu
jafnvægi í heilbrigðismálum og styrkja
landsbyggðina.»
Við hefjum umræðuna með því að heyra álit
annarra norðanlækna á þörfinni fyrir
Fjórðungssjúkrahús á Akureyri.
Á Akureyri er elsta sjúkrahús landsins og það
hefur verið vaxandi alla þessa öld. Sjúkrahús sem
ekki er í vexti er dauðvona og ber að leggja niður.
Það gildir svipað um sjúkrahús og sjúklinga,
þegar þeim hættir að fara fram þá er þeim farið
að fara aftur.
Byggð á þjónustusvæði sjúkrahússins er einnig í
vexti og nauðsynlegt er að hafa bestu þjónustu
sem hægt er að veita. Fjórðungssjúkrahúsið er
sérstætt að mörgu leyti og starfsemi þess langtum
fjölþættari en sumra sjúkrahúsa erlendis, sem eru
miklum mun stærri og þjóna fleirum.
ÞJÓNUSTUSVÆÐI FSA
Aðal þjónustusvæðið nær frá Blönduósi að
vestan austur á Vopnafjörð. Til sjúkrahússins
leita einnig sjúklingar frá Austfjörðum,