Sveitarstjórnarmál - 01.04.2002, Blaðsíða 5

Forystugrein
Tímamót
Tímaritið Sveitarstjórnarmál kemur nú
út í nýjum búningi. A síðasta ári voru
liðin 60 ár frá því Jónas Guðmunds-
son, formaður sambandsins og frum-
kvöðull að stofnun þess, hóf útgáfu
tímaritsins Sveitarstjórnarmála.
Stjórn sambandsins samþykkti í
upphafi árs 2002 að gera breytingar á
útgáfu tímaritsins í þeim tilgangi að
efla það enn frekar sem ferskan miðil
og málgagn sambandsins. í samræmi
við þá samþykkt hefur nú verið gerð-
ur samningur við Fremri - kynningar-
þjónustu ehf. á Akureyri um að fyrir-
tækið taki að sér umsjón með útgáfu
tímaritsins í samvinnu við sambandið,
en eftir sem áður verður sambandið
eigandi og útgefandi tímaritsins.
Markmiðið er að efla útgáfuna,
fjölga tölublöðum í hverjum árgangi,
koma festu á útgáfutíma þess og að
nýta það betur sem vettvang fyrir
miðlun upplýsinga um málefni sveit-
arfélaganna. Stefnt er að aukinni
dreifingu tímaritsins og með því móti
er þess vænst að tímaritið verði í
framtíðinni enn mikilvægari hlekkur
en áður í þeirri hagsmunagæslu sem
sambandið sinnir fyrir sveitarfélögin í
landinu.
Sextugasti og fyrsti árgangur tíma-
ritsins Sveitarstjórnarmála, það er ár-
gangur síðasta árs, er því síðasti ár-
gangur tímaritsins sem Unnar Stefáns-
son ritstýrir. Unnar hefur verið ritstjóri
tímaritsins f 35 ár og undir hans stjórn
hefur tímaritið eflst og gegnt afar þýð-
ingarmiklu hlutverki í starfi og sögu
sveitarfélaganna. Á þessum tímamót-
um er Unnari Stefánssyni þakkað fyrir
störf hans að útgáfumálum sambands-
ins, sem hann hefur unnið af mikilli
vandvirkni og alúð.
Sveitarstjórnarmenn eru hvattir til
þess að nýta sér Sveitarstjórnarmál til
skoðanaskipta um þau mál sem efst
eru á baugi á vettvangi sveitarfélag-
anna á hverjum tíma.
Á fundi fulltrúaráðs Sambands ís-
lenskra sveitarfélaga, sem haldinn var
dagana 22. og 23. mars 2002 í
Hveragerði, var samþykkt samhljóða
stefnumörkun sambandsins í byggða-
málum. Áður hafði byggðanefnd sam-
bandsins lagt fram heildstæðar tillög-
ur, sem kynntar voru öllum sveitar-
stjórnum og fleiri aðilum, auk þess
sem þær voru ræddar á fundi fulltrúa-
ráðsins í nóvember sl.
Það er afar mikilvægt að sveitar-
stjórnarmenn hafi ákveðnar skoðanir
á framvindu þeirra málefna sem með
einum eða öðrum hætti munu hafa
áhrif á þróun byggðamála og sveitar-
stjórnarstigins í landinu. Það er því
þýðingarmikið að sveitarstjórnarmenn
náðu góðri sátt í Hveragerði um þær
tillögur sem fyrir lágu.
Sveitarfélögin þurfa á öllum sínum
samtakamætti að halda til að standast
þær kröfur sem til þeirra eru gerðar.
Um leið og sveitarstjórnarmenn verða
að standa traustan vörð um velferð og
hagsmuni síns sveitarfélags verða þeir
einnig að líta til heildarinnar og taka
afstöðu til þess á hvern hátt framtíð
og hagsmunir sveitarstjórnarstigsins í
landinu verði best tryggðir og hlutverk
og ábyrgð þess efld. Það gerðu fulltrú-
ar sveitarfélaganna á fundinum í
Hveragerði.
Vilhjálmur Þ. Vilhjálmsson,
formaður
SVEITAR STJ ÓRN AR MÁL
Útgefandi: Samband íslenskra sveitarfélaga
Háaleitisbraut 11-13 108 Reykjavík.
Sími: 581 3711.
Netfang samband@samband.is • Veffang www.samband.is
Ritstjórar: Magnús Karel Hannesson (ábm.)
magnus@samband.is
Bragi V. Bergmann
bragi@fremri.is
Ritstjórn: Fremri kynningarþjónusta
Furuvöllum 13 600 Akureyri
Sími 461 3666 ■ Bréfasími: 461 3667
Netfang: fremri@fremri.is
Auglýsingar: Páll Júlíusson
Símar: 566 8262 & 861 8262
Netfang: pallij@islandia.is
Umbrot og prentun:
Alprent, Glerárgötu 24, 600 Akureyri, s. 462 2844.
Dreifing: Islandspóstur
Forsíðumyndin: Myndin á forsíðu blaðsins er frá Akureyri, af því
tilefni að útgáfa Sveitarstjórnarmála hefur nú að hluta til verið flutt
norður yfir heiðar. (Ljósmynd: Myndrún)
Tímaritið Sveitarstjórmál kemur út mánaðarlega, að undanskildum
júlí- og ágústmánuði, í 3.500 eintökum.
Áskriftarsíminn er 461 3666.