Fréttablaðið - 31.05.2014, Blaðsíða 30

31. maí 2014 LAUGARDAGUR| HELGIN | 30
Sólveig Káradóttir er stödd hér á landi í tilefni afmæl-is tengdamóður sinnar, Olivia Harrison. Eigin-maður hennar til tveggja ára, tónlistarmaðurinn
Dhani Harrison, er nýfarinn af
landi brott en Sólveig varð eftir til
að eyða nokkrum dögum með fjöl-
skyldu og vinum.
„Við eigum eiginlega tvö heim-
ili, í London þar sem við búum á
fallegu æskuheimili Dhani í Friar
Park ásamt tengdamóður minni, og
svo í Los Angeles þar sem Dhani
vinnur. Það er því mikið flakk á
okkur á milli landa og svo gott að
Ísland er akkúrat þarna í miðj-
unni og ég nýti stundum tækifærið
og kem við hér í nokkra daga. Það
tekur á að flakka svona á milli en
það vill svo skemmtilega til að syst-
ir mín og fjölskylda hennar eru nú
flutt til LA svo að ég get eytt meiri
tíma með henni og litlu frændsystk-
inum mínum,“ segir Sólveig en
Dhani vinnur við að semja tónlist
fyrir bíómyndir og sjónvarpsefni.
Veðjuðu á réttan hest
Það eru tvö ár síðan hugmyndin
að fatamerkinu Galvan London
kviknaði en það var að frumkvæði
vinkonu Sólveigar sem var boðið í
tíu brúðkaup það sumarið sem öll
gerðu kröfu um svokallaðan „black
tie“-klæðaburð.
„Það er mikið um svoleiðis fata-
reglur úti þar sem ætlast er til þess
að gestir klæðist síðkjól og smók-
ing. Fallegur síðkjóll úr góðu efni
getur kostað allt að 4 þúsund pund
og er ekki á færi allra að kaupa,“
segir Sólveig en í kjölfarið sáu þær
stöllur glufu á markaðnum fyrir
fatamerki sem byði upp á síðkjóla
og fínni fatnað á minni pening en
gengur og gerist en samt úr góðum
efnum.
Og þær veðjuðu á réttan hest.
Galvan hefur á stuttum tíma tek-
ist að ná ótrúlegum árangri innan
tískuheimsins. Sólveig er titluð
listrænn stjórnandi og hennar hlut-
verk er að flakka á milli stóru sýn-
inganna og fá innblástur fyrir lín-
una sem hún vinnur svo náið með
Önnu-Christine Haas sem er hönn-
uður Galvan. Katherine Holmgren
er stjórnarformaður og Carolyn
Hodler sölustjóri. Sólveig er ánægð
með þetta teymi og segir þær vinna
vel saman.
„Síðustu tvö ár höfum
við verið mjög sniðug-
ar í að koma merkinu
á framfæri sem skilar
sér. Við vorum á tísku-
vikunni í París og Lond-
on í byrjun árs þar sem
merkinu var vel tekið.
Anna- Christine er
búsett í Düsseldorf, en
margar þýskar versl-
anir hafa keypt línuna.“
Þrátt fyrir að fyrsta
línan sé á leiðinni í
búðir á næstu dögum
hafa stórar og virtar
verslanir á borð við
Harvey Nichols, Brown, Bergdorf
Goodman og Neiman Marcus þegar
keypt línuna. Einnig hefur Vogue
fjallað um merkið en meiri meðbyr
er varla hægt að hugsa sér í þess-
um geira.
Tískuáhuginn frá afa
Leikkonurnar Gwyneth Paltrow
og Gemma Arterton hafa sést á
rauða dreglinum í fatnaði frá Gal-
van sem Sólveig segir vera góða
auglýsingu.
„Við þekkjum stílista Gwyneth
sem kom og fékk föt frá okkur. Það
er heiður fyrir okkur að stjörnur á
borð við þær vilji klæðast fatnaði
frá okkur en við viljum líka velja
og hafna hverja við klæðum. Við
höfum alveg neitað fólki sem vill
fá lánað hjá okkur enda skiptir það
gríðarlegu máli upp á ímyndina.”
Sólveig segir velgengnina vera
mörgu að þakka, allar eru þær nokk-
uð vel tengdar inn í þennan heim, en
ljóst er miðað við viðtökurnar, að
svona merki vantaði í flóruna.
„Við vorum að stíla inn á ákveð-
ið gap á markaðnum. Fína kjóla úr
gæðaefnum sem eru nútímalegir
en kosta ekki handlegg. Það var
greinilega eitthvað sem vantaði
og þess vegna er okkur vel tekið.
Við erum líka ekki að fara framúr
okkur, við gerum lítið í einu, ein-
beitum okkur að kjólum fyrst en í
framtíðinni sé ég fyrir mér að bæta
frekar við línuna.“
Þrátt fyrir að hún sé sálfræði-
menntuð kemur það engum á óvart
að hún láti til sín taka í tískuheim-
inum.
„Ég hef alltaf haft gaman af tísku
og haft áhuga á fötum.
Það er eitthvað sem
liggur vel fyrir mér og
ég vissi alltaf að mig
langaði að vinna við
eitthvað tengt þessum
heimi. Ég held ég hafi
þetta frá afa mínum,
Kristjáni Davíðssyni
listmálara, sem var
með næmt auga og
fatahönnuðir keppt-
ust um að fá að klæða
hann í nýjustu tísku
þegar hann var ungur
og upprennandi mynd-
listarmaður. Næsta
lína verður einmitt innblásin af list
honum til heiðurs.“
Hefði viljað hitta tengdapabba
Það eru tvö ár síðan Sólveig gekk að
eiga Dhani við hátíðlega og fallega
athöfn á æskuheimili hans í Friar
Park í Henley. Dhani er einkasonur
Bítilsins George Harrison, sem lést
árið 2001, og er Sólveig því gift inn
í eina frægustu tónlistarfjölskyldu
í heimi. Brúðkaupið vakti athygli og
birtust fréttir af því í öllum helstu
miðlum, meðal annars í bandaríska
Vogue sem birti fagra brúðarmynd
af hjónakornunum sem ljósmyndar-
inn Saga Sig tók.
Sólveig er ekki mikið fyrir að
flagga einkalífi sínu og gerir lítið
úr því að vera tengd inn í fræga
fjölskyldu. Í raun er stutt síðan þau
tvö létu sjá sig saman opinberlega
eins og rauða dreglinum. Núna sér
Sólveig hins vegar tækifæri í því
að koma fatamerki sínu á framfæri
á viðburðunum en viðurkennir að
þetta sé ekki það skemmtilegasta
sem hún gerir.
„Við skipuleggjum það vel þegar
við ákveðum að fara saman eitt-
hvert opinberlega þar sem eru ljós-
myndarar. Ég veit að þetta er leið-
inlegt svar en fyrir mér er þessi
fjölskylda ekkert öðruvísi en hver
önnur. Mest hefði ég bara viljað
hitta karlinn, sem er faðir manns-
ins sem ég elska mest.”
Þegar Sólveig gifti sig var það
fatahönnuðurinn frægi Stella
McCartney sem hannaði brúðar-
kjólinn. Fatahönnuðurinn er fjöl-
skylduvinur sem einnig var gestur
í brúðkaupinu ásamt föður sínum,
tónlistarmanninum Paul McCart-
ney. Sólveig segir Stellu vera
mikla fyrirmynd, sem fatahönn-
uð og einnig sem móður sem tekst
að blanda saman fjölskyldulífi og
frama. „Við höfum ekki náð að tala
saman um Galvan London en það
er klárlega eitthvað sem ég ætla að
gera enda þekkir hún þetta ferli út
og inn. Hún er líka mjög upptek-
in en tekst á aðdáunarverðan hátt
að blanda saman fjölskyldunni og
vinnunni. Alveg til fyrirmynd-
ar,“ segir Sólveig sem dreymir
um stóra fjölskyldu. „Ég hef alltaf
sagt að ég ætli að eiga fimm börn
en stóra systir mín, sem á tvö börn,
sagði mér að byrja fyrst á einu og
sjá svo til,“ segir Sólveig hlæjandi.
Háleit markmið fyrir framtíðina
Sólveig hélt nýverið upp á þrítugs-
afmælið sitt með stórri veislu í
London þar sem þemað var Sound
of Music sem er uppáhaldsbíó-
mynd Sólveigar. Hún tekur hækk-
andi aldri fagnandi. „Ég finn helst
fyrir aldrinum þegar ég kem hing-
að heim því hér er meiri pressa á
mann að stofna fjölskyldu og hefja
barneignir. Það þekkist ekki úti
enda byrjar fólk seinna að eignast
börn, allavega í kringum okkur.
Dhani er einkabarn og langar í
stóra fjölskyldu svo ef við ætlum
í fimm börn þurfum við samt
kannski að fara að spýta í lófana,
þá erum við að tala um að ég verð
meira og minna ólétt næstu tíu
árin,“ segir Sólveig skellihlæjandi
og heldur áfram: „Í augnablikinu
erum við sátt í því sem við erum
að gera núna. Hann í tónlistinni í
LA og ég á fullu með Galvan Lond-
on sem ég get unnið í hvar sem er
í heiminum. Merkið á hug minn
allan þessa stundina enda er ég
með háleit markmið og drauma
fyrir framtíðina. Á maður ekki
alltaf að vera með það?“
Ég veit að
þetta er leiðinlegt
svar en fyrir mér
er þessi fjölskylda
ekkert öðruvísi
en hver önnur.
Mest hefði ég
bara viljað hitta
karlinn, sem er
faðir mannsins
sem ég elska
mest.
Álfrún
Pálsdóttir
alfrun@frettabladid.is
Alltaf viljað vinna við tísku
Sólveig Káradóttir er kunnuglegt andlit þrátt fyrir að hafa ekki verið búsett á Íslandi í ein fimmtán ár. Hún hóf heims-
horna flakk sitt sem fyrirsæta, er gift inn í eina frægustu tónlistarfjölskyldu heims og á tvö heimili, eitt í London og annað
í Los Angeles. Sólveig, sem er menntuð í sálfræði frá háskólanum í Boston, stofnaði nýverið fatamerkið Galvan London.
HÁLEIT MARKMIÐ Sólveig Káradóttir fyllti nýverið 30 ár og segist bara finna fyrir pressunni um barneignir þegar hún kemur hingað heim en núna fær fatamerkið alla hennar athygli.
MYND/SAGA SIG FÖRÐUN/FRÍÐA MARÍA MEÐ MAC OG BLUE LAGOON SKINCARE HÁR/ FRÍÐA MARÍA MEÐ LABEL.M
Síðkjólar
Sólveigar