Fréttatíminn - 10.04.2015, Blaðsíða 32

Þannig týnist tíminn
V
Veðrið var heldur leiðinlegt um páskana
en það kom ekki á óvart. Orðið páskahret
er inngróið í veðurbarðar sálir okkar og
segir okkur að illviðrasamt geti verið á
þessum árstíma, þótt páskar rokki talsvert
á dagatalinu milli ára. Það sem fremur
kemur á óvart er að hret geti staðið frá því
í nóvember og fram á vor, eins og raunin
hefur verið liðna mánuði – og eins langt
og séð verður í veðurkortum fram undan.
Deila má um það hvort vor sé komið á
landinu bláa í byrjun apríl en sá mánuður
telst þó formlega til vors. Enn ein storm-
viðvörunin var í veðurfrétt í Mogga í
vikubyrjun þar sem jafnframt var frá því
greint að veðrið yrði einkar óyndislegt í
vikunni og rifi sig upp með norðanroki og
snjókomu um helgina.
Það voru þessi ósköp sem minn betri
helmingur þoldi ekki lengur þegar hún
dreif bónda sinn með sér til Tenerife á
dögunum. Þar ku vera gott veður árið um
kring enda eyjarnar skammt undan Afr-
íkuströndum. Við hugsuðum samt okkar
gang fyrstu dagana því veðrið var ekki
eins og lofað hafði verið. Það var að vísu
gott á íslenskan mælikvarða, 17-19 stiga
hiti, en hálf- eða alskýjað – og rigndi meira
að segja svolítið í tvo daga. Fararstjóri
hafði þó látið drýgindalega og sagt að ekki
hefði komið deigur dropi úr lofti á þessum
slóðum það sem af er ári. Úr þessu rættist
þó, sem betur fer, sólin lét sjá sig og lék
við okkur það sem eftir lifði frídaganna.
Hitinn fór í 25-27 gráður og frúin náði að
sólbaka sig í sundlaugargarðinum þótt
ég héldi mig í skugga enda síður gerður
til sólböðunar frá náttúrunnar hendi.
Þess á milli fórum við í langa göngutúra
um stræti og gylltar strendur. Vistin var
dásamleg og veðrið, þegar það var orðið
eins og það átti að sér, ólíkt því sem boðið
hefur verið upp á hérlendis frá haustmán-
uðum. Þó náðum við einum degi sem
minnti okkur veðurfarslega á landið okkar
í norðri. Þá sigldum við til La Gomera,
næst minnstu sjö Kanaríeyja. La Gomera
er fjallaeyja, um 22 ferkílómetrar að stærð
en nær upp í 1487 metra hæð. Fjöllin laða
að sér þokuloft af Atlantshafinu þótt sól-
bakað sé niður við strönd. Loftslag og
gróðurfar er því næsta einstakt þar sem
skiptist á kaktustar og eyðimerkurgróður
þar sem lítt rignir en gróskumikill og
þéttur regnskógur ofar þar sem skýin
þéttast af hafi, mynda þoku og færa með
sér hina lífsnauðsynlegu vökvun og jafnvel
úrhellisrigningu. Það var einmitt úrhelli
sem heilsaði okkur – og of kunnuglegur
vindbelgingur. Um veðrið þýðir ekki að
fást, sagði þarlendur fararstjóri sem leiddi
för okkar eftir snarbröttum fjallveginum.
Þið eruð aðeins hér í dag. Annað er ekki
í boði. Við tókum veðrinu möglunarlaust
enda hafði okkur verið ráðlagt að klæða
okkur vel áður en í siglinguna var lagt.
Enginn er þó svikinn af heimsókn til La
Gomera, hvernig sem viðrar. Náttúran
er stórkostleg og gróðurfar einstakt. Því
verður hins vegar ekki neitað að okkur
hlýnaði talsvert þegar við komum til aftur
til Tenerife þar sem sólin bakaði okkur
er við röltum meðfram ströndinni heim á
hótel.
Þannig týnist tíminn, segir í nýlegu
verðlaunalagi og ljóði Bjartmars Guð-
laugssonar og þarna vorum engum háð,
bárum enga ábyrgð nema á sjálfum
okkur. Það eina sem við þurftum að passa
okkur á var að mæta í morgunverð, en
eins seint og við mögulega gátum. Við
leyfðum okkur þann munað að fara að sofa
þegar okkur sýndist og sofa síðan út. Vel
útilátnum morgunmatnum vildi ég hins
vegar ná, þótt seint væri, en hann var í
boði til klukkan 10. Fyrstu dagana vorum
við alltaf á síðustu metrunum en náðum
samt. Þar gat ég úðað í mig beikoni og
látið steikja fyrir mig egg eftir óskum, eða
fá þau hrærð, auk annarra lystisemda sem
í boði voru og skola niður með ávaxtasafa
sem þjónn kreisti jafnharðan. Frúin var
í aðeins meiri hollustu en laumaðist þó
stöku sinnum í stökkar beikonsneiðar.
Þegar á vistina leið kom að því að við
urðum svo slök og tímalaus að við náðum
hvorki í morgunverð, hádegisverð né
annað slíkt sem fylgdi föstum tímasetn-
ingum. Það kom ekki stórkostlega að sök
enda var hótelið fínt og hægt að ganga
að mat og drykk á sundlaugarbarnum og
víðar hvenær sem var. Það væsti því ekki
um okkur þrátt fyrir letina – og fríið var
farið að hafa sín áhrif á langþreytta kroppa
fyrst við vorum orðin algerlega tímalaus.
Verra var samt þegar við fórum að missa
af ýmsum viðburðum sem upp á var boðið
á hótelinu að kvöldi til, ef við nenntum
ekki út í bæjarlífið, hvort heldur voru
söngvarar, grínarar eða flamengódansar-
ar. Þegar við höfðum enn og aftur misst af
slíku húllumhæi síðasta kvöldið settumst
við á barinn og pöntuðum okkur drykki.
Í rælni spurði ég þjóninn hvað klukkan
væri. Hann svaraði því snöfurmannlega
en hans klukka var þá komin klukkutíma
lengra en mín. Kátir karlar og kerlingar á
Tenerife höfðu greinilega tekið sig til og
flýtt klukkunni – og það aldeilis án þess að
láta okkur vita.
Það var því að vonum að við værum yfir-
leitt heldur á seinni skipunum. Við áttum
bókað flug daginn eftir að þjónninn kom
okkur aftur inn í tímatalið og náðum flug-
vélinni. Ella hefðum við orðið stranda-
glópar ytra, sem hefði svo sem verið allt
í lagi, að minnsta kosti ef mið er tekið af
veðrinu sem verið hefur hér heima síðan
við komum – og framtíðarveðurspánni!
Jónas
Haraldsson
jonas@
frettatiminn.is
HELGARPISTILL
Te
ik
ni
ng
/H
ar
i
WASHINGTON D.C. flug f rá
19.999 kr.
BERLÍN flug f rá
13.999 kr.
ALICANTE, BENIDORM flug f rá
18.999 kr.
BOSTON flug f rá
19.999 kr.
PARÍS flug f rá
12.999 kr.
ÞÚ
GETUR
FLOGIÐ!
KATRÍNARTÚNI 12 WOWAIR.IS WOWAIR@WOWAIR.IS
Gerðu verðsamanburð,
það borgar s ig!
apr í l - jún í 2015
maí 2015
apr í l - maí 2015
apr í l - maí 2015
apr í l - jún í 2015
*999 kr. bókunargjald leggst ofan á hverja bókun og töskugjald er ekki innifalið
nema annað sé tekið fram.
*
*
*
*
*
32 viðhorf Helgin 10.-12. apríl 2015