Dagblaðið Vísir - DV - 06.04.2011, Page 6

„Þetta fór fyrir rétt og það náðist sátt.
Ég bað um að fá húsið þann 31. mars
svo ég gæti leigt það frá mánaðamót-
um. Hún fór fram á að fá að vera fram
til 5. apríl og fékk það. Það er eins og
hún eigi allan réttinn og ég engan,“
segir Hjördís Ágústsdóttir sem bú-
sett er á Akranesi. DV greindi frá því í
febrúar að leigusamningur sem Hjör-
dís gerði við leigjendur sína hafi runn-
ið út í nóvember en þeir væru enn í
húsinu og hafi ekki greitt leigu. Sam-
kvæmt upplýsingum DV mun sýslu-
maður framkvæma útburð næstkom-
andi föstudag.
Dómsátt
Málið fór fyrir dóm fyrir stuttu þar
sem dómsátt náðist og bendir Hjör-
dís á að í dómsáttinni komi fram að
leigjandinn, María Jósefsdóttir, hafi
átt að rýma húsið fyrir klukkan 12 í
hádeginu á þriðjudag. Hjördís segir
í samtali við DV að hún hafi því farið
með föður sínum að húsinu á hádegi
til að athuga með stöðu mála. „Pabbi
bankaði, opnaði og kallaði inn og í því
komu þeir. Hann sagði að við værum
með dómsvottorð og að samkvæmt
því ættum við að fá húsið afhent,“ seg-
ir Hjördís og bætir við að þá hafi maki
Maríu ráðist á föður hennar. Hún seg-
ir að faðir sinn hafi þurft að leita að-
hlynningar á slysavarðstofu eftir at-
vikið.
Miðnætti en ekki hádegi
DV hafði samband við Maríu vegna
málsins og segir hún að þau hafi hald-
ið að rýma þyrfti húsið fyrir miðnætti.
Hún hafi verið stödd hjá sýslumanni
til að biðja um frest þegar hringt var
í hana vegna uppákomunnar heima
hjá henni. „Ég er búin að reyna að
finna annað húsnæði í þrjá mánuði
en hef alls staðar komið að lokuðum
dyrum. Ég bað hana (Hjördísi) upp-
haflega að gefa mér þriggja mánaða
frest til að finna annað húsnæði en
hún harðneitaði því og það næsta sem
ég vissi var að komin var útburðar-
beiðni til sýslumanns,“ segir hún. Það
mál hafi endað með fyrrgreindri dóm-
sátt. „Ég er öryrki og bóndinn er með
sama og engar tekjur. Hann fótbrotn-
aði fyrir rúmum mánuði og hefur ekki
getað unnið.“
Lögregla skakkaði leikinn
Aðspurð hvað hafi gerst á þriðjudag
segir hún að Hjördís hafi komið ásamt
föður sínum og þau sagst vera komin
til að „sækja“ hús sitt. „Hún stóð hér
og sagðist vera löglegur eigandi og
hefði rétt á að koma hér inn. Bóndinn
sagði hins vegar að svo væri ekki þar
sem hann ætti hér enn lögheimili. Auk
þess væru hér börn og ef þau ætluðu
að þrýsta sér inn ætti fyrst og fremst að
kalla á lögregluna og barnaverndar-
yfirvöld.“ Þá hafi komið til handalög-
mála sem enduðu með því að mað-
ur Maríu tók upp golfkylfu og hótaði
föður Hjördísar með henni. Lögreglan
kom stuttu síðar á staðinn.
Eins og í lygasögu
Hjördís segir málið allt hið skrýtnasta
og í rauninni eins og í lygasögu. „Ég á
þetta hús en hef ekki fengið að stíga
fæti inn í það síðan í október og það
er enginn leigusamningur. Dómar-
inn sagði að það verði að breyta þess-
um lögum sem voru hert vegna þess
að leigusalar gátu verið svo ósvífnir og
hent fólki út án fyrirvara. Ég rak hana
hins vegar aldrei út, samningurinn
rann út í nóvember og ég hafði ekki
hugsað mér að leigja henni lengur. Ég
rak hana aldrei út,“ segir hún og bæt-
ir við að auðvitað sé útburður síðasta
úrræðið. Hún hafi bara ekki haft aðra
kosti og hún sé jafn örvæntingarfull og
María.
Hvert eigum við að fara?
„Þetta er einungis vegna fjárhags-
vandamála sem við erum í þessari
stöðu. Við værum fyrir löngu farin úr
þessu húsi ef við hefðum átt í önn-
ur hús að venda. Við fengum frest til
31. mars til að vera hér en ég bað um
frest til 5. apríl þar sem við vorum að
ferma um síðustu helgi. Nú erum við
að pakka og undirbúa flutning en
hvert eigum við að fara? Út í tjald?“
spyr María og segir að minnsta kosti sé
enginn áhugi hjá þeim að vera á Akra-
nesi lengur.
6 | Fréttir 6. apríl 2011 Miðvikudagur
Formaður rafiðnaðarsambandsins um Icesave:
Nei siglir viðræðum í strand
„Hefur forysta  atvinnurekenda og
verkalýðsfélaga hótað  að slíta við-
ræðum um kjarasamninga  fyr-
ir hönd sinna umbjóðenda, kjós-
enda í landinu,  ef þeir kjósa ekki í
samræmi við vilja forystunnar? Eru
menn alveg búnir að tapa áttum
og tengslum við þá sem þeir eru að
vinna fyrir?“ spyr Eygló Harðardótt-
ir, þingmaður Framsóknarflokksins
á bloggsíðu sinni.
Eygló greinir þar frá því að Hrafn
Gunnlaugsson kvikmyndagerð-
armaður hafi sent þingmönnum,
stjórnlagaráðsmönnum og ýmsum
fjölmiðlum póst þar sem hann hvet-
ur þá til að segja „nei“ í komandi
Icesave-kosningum. Guðmundur
Gunnarsson, formaður Rafiðnað-
arsambands Íslands, er einn þeirra
sem svarar bréfinu og biður um að
vera tekinn af póstlistanum. Svo
segir hann: „Er ákaflega vel inni í
efnahagsforsendum og að ef Nei
verður ofaná þá verður samninga-
viðræðum slitið í Karphúsinu vegna
forsendubrests það gildir um báða
aðila.“
DV hafði samband við Guðmund
vegna þessa sem furðar sig á Eygló
að hafa sett þetta á bloggsíðuna.
„Mér finnst yfirgengilegt að hún sé
að taka svona út og slíta það úr sam-
hengi til þess að búa til eitthvað úr
því,“ sagði hann en vildi lítið láta
hafa eftir sér um málið. Hann sagði
þó að það hefði lengi legið fyrir að
allar forsendur kjarasamninga gætu
breyst ef Icesave yrði hafnað. Það
væru engar nýjar fréttir enda hefðu
Vilhjálmur Egilsson og fleiri vart
komið fram í fjölmiðlum undanfarið
án þess að benda á þá staðreynd.
baldur@dv.is
Bæjarins beztu fá meðmæli:
Bestu pylsur
í heiminum?
„Það eru allar líkur á því að bestu
pylsur í heimi sé að finna á Íslandi,“
skrifar Victoria Haschka, matar- og
ferðarýnir Huffington Post, í pistli
sem birtist á vefsíðu blaðsins á
mánudag. Victoria er yfir sig hrifin af
pylsunum sem fást á Bæjarins beztu.
Í grein sinni lofsyngur hún pyls-
urnar og segist, eftir að hafa smakk-
að, skilja fullkomlega af hverju það
sé biðröð við litla hvíta kofann, sem
stendur steinsnar frá flóamarkaði
(Kolaportinu), á öllum tímum sólar-
hringsins.
Haschka hefur greinilega pantað
sér eina með öllu og ljóst er að þessi
„þjóðarréttur Íslendinga“ hefur
runnið ljúft niður. Hún er yfir sig
hrifin af kjötinu í pylsunum en segir
að „hetja“ réttarins sé laukurinn.
Bæði sá steikti og hrái, sambland
þeirra sé ekkert annað en tær snilld.
Haschka lýkur pistli sínum með
því að benda á þá staðreynd að það
sé margt skemmtilegt hægt að gera á
Íslandi, fara í Bláa lónið, skoða hveri
og fá frábært kaffi á hverju horni.
En fólk geri sjálfu sér mikinn greiða
með því að renna við á þessum besta
pylsustað í heiminum í leiðinni.
Minna áfengi
selt en áður
Alls seldust 12.286 lítrar af áfengi í
mars síðastliðnum, að því er fram
kemur á heimasíðu Vínbúðarinnar.
Þar kemur fram að ekki sé mark-
tækur samanburður við fyrra ár þar
sem sala fyrir páska í fyrra var í mars
en verður nú í apríl. Dagarnir fyrir
páska eru jafnan mjög annasamir
í Vínbúðunum. Það sést berlega
þegar salan dagana 27. til 31. mars
er skoðuð en í ár seldust 109 þúsund
lítrar af áfengi. Sömu daga í fyrra var
salan 441 þúsund lítrar. Tímabil-
ið janúar til mars er að sama skapi
ómarktækt í samanburði. Þegar
eingöngu er horft til lítrasölu á tíma-
bilinu er salan um tíu prósent minni
en á sama tíma í fyrra.
Liggur fyrir Guðmundur undrast
vinnubrögð Eyglóar.
LEIGJENDUR NEITA
AÐ YFIRGEFA HÚSIÐ
n Til átaka kom á Akranesi þegar húseigandi reyndi að fá leigjendur til að yfirgefa húsið
n Leigusamningur rann út í nóvember n Leigjandi segist ekki eiga í önnur hús að venda
„Ég er öryrki og
bóndinn er með
sama og engar tekjur.
Hjördís Ágústsdóttir Hjördís skilur
ekki hvernig rétturinn getur verið allur hjá
leigjendum.
MYND: SIGTRYGGUR ARI JÓHANNSSON
Ágreiningur Lögreglan kom að Mánabraut
21 í gær eftir að ágreiningur kom upp á milli
leigusala og leigjenda.
MYND: SIGTRYGGUR ARI JÓHANNSSON
Gunnhildur Steinarsdóttir
blaðamaður skrifar gunnhildur@dv.is