Són - 01.01.2006, Qupperneq 157

157LJÓÐ 2005
Eitthvað skrítið hvað ábreiðan var köld.
Sá svo alltíeinu hvað glugginn var bjartur.
Bráðum dögun. Tel víst að snjórinn sé djúpur.
Gott að heyra kunnuglegt brak í bambus.
Önnur ljóð sem mig langar til að nefna eru „Sá handleggsbrotni“
(bls. 22), „Þungt hugsi í rigningu, um kvöld“ (bls. 34), sem er einlægt
og afar persónulegt ljóð með skemmtilegum líkingum, og „Minningin
um Gullbrá“ (bls. 37) sem einnig er persónulegt en með sorglegri blæ.
Flestir ljóðaunnendur vita hversu gott getur verið að grípa til ljóða-
bókar á náttborðinu og lesa eitt eða tvö ljóð fyrir svefninn. Oft getur
slík nægjusemi gengið upp – og ekkert nema gott eitt um það að segja
– en þessi bók er dálítið „erfið“. Ljóð Po Chü-i eru eins og hlekkir í
keðju, ekki endilega vegna þess að á bókinni er heildarsvipur, þar sem
hverju ljóði má líkja við hlekk, heldur vegna þess að hvert ljóð vekur
forvitni um það næsta og svo koll af kolli. Það getur því hreinlega
orðið erfitt að leggja bókina frá sér, þótt mann langi til að spara, láta
tvö nægja og lesa svo tvö kvöldið eftir. Bókin er því svolítið eins og
sælgætispoki; maður veit ekki fyrr en nammið er búið! Þetta er sem
sagt bók sem ekki er hægt að glugga í – maður les hana upp til agna
og helst í einum rykk.
Að lokum skal þess getið, þótt ekki verði fjallað um þær bækur
sérstaklega, að ljóðaþýðingar Guðrúnar H. Tulinius (Hæðir Machu
Picchu) og Hallbergs Hallmundssonar (Báturinn langi og fleiri ljóð) voru
tilnefndar til íslensku þýðingarverðlaunanna.
Ljóð fyrir börn
Ljóðskáld eiga hrós skilið fyrir þá viðleitni sína að reyna að höfða til
barna og að ætla sér þar með – ef til vill – að ala upp ljóðaunnendur
framtíðarinnar. Persónulega finnst mér enginn vera betur kominn að
bjartsýnisverðlaunum en einmitt þetta fólk. Útgáfur þessar eru reynd-
ar allar myndskreyttar, svo sem algengt er með barnabækur, enda
kennir reynslan okkur foreldrum að góðar myndskreytingar geta
hjálpað börnunum við að lifa sig inn í þann heim sem lesið er um.
Um leið þurfum við að vera meðvituð um að hve miklu leyti mynd-
skreytingin túlkar lesefnið, hvort barnabókmenntir eigi að örva
ímyndunarafl barnanna eða einfaldlega að sjá þeim fyrir sögum.
Eftirfarandi höfundar gáfu út ljóð fyrir börn á árinu 2005: