Morgunblaðið - Sunnudagur - 26.07.2015, Page 48

48 MORGUNBLAÐIÐ SUNNUDAGUR 26.7. 2015
Efnt verður til ljóðadagskrár með nýjum
skáldahópi og kanadískum gesti á Loft hosteli
í dag, laugardag, á milli klukkan 14 og 16.
Hópur kvenna sem tóku þátt í fjölmála rit-
smiðju Bókmenntaborgarinnar fyrr á þessu
ári hefur stofnað nýtt samfélag rithöfunda í
Reykjavík, Ós. Markmið þessa grasrót-
arfélags er að skapa vettvang fyrir rithöfunda
og skáld á Íslandi með ólíkan bakgrunn hvað
varðar upprunaland og tungumál. Ós stefnir
að því að koma þessum höfundum á fram-
færi, bæði á prenti og með viðburðum. Í dag
munu tvær skáldkonur úr hópnum lesa upp,
þær Ewa Marcinek og Randi Stebbins. Þær
koma fram með kanadíska skáldinu Gregory
Betts sem á nú leið um Reykjavík.
NÝR SKÁLDAHÓPUR
LJÓÐ Á LOFT
HOSTELI
Kanadíska skáldið Gregory Betts er staddur
hér á landi og verður hluti af dagskránni.
Mammút, Úlfur Úlfur, Boogie Trouble og Frið-
rik Dór eru meðal þeirra sem koma fram í dag.
Morgunblaðið/Árni Sæberg
Druslugangan verður haldin í fimmta sinn í
dag, laugardag, en lagt verður af stað frá Hall-
grímskirkju klukkan 14. Gangan er orðin að
föstum punkti í íslensku samfélagi og er
höfuðáherslan á að færa ábyrgð kynferð-
isglæpa frá þolendum yfir á gerendur. Gangan
verður farin frá Hallgrímskirkju, niður Skóla-
vörðustíg, Bankastræti og mun enda á Aust-
urvelli þar sem við taka fundarhöld og tón-
leikar. Jóhannes Kr. Kristjánsson, Sóley
Tómasdóttir og Guðrún Katrín Jóhann-
esdóttir munu meðal annars halda ræður og
á tónleikum munu síðan Mammút, Úlfur Úlf-
ur, Boogie Trouble og Friðrik Dór koma
fram.
LAGT AF STAÐ KLUKKAN 14
DRUSLUR GANGA
Bræðslutónleikarnir á
Borgarfirði eystra fara
fram í dag, laugardag.
Þetta árið býður Bræðslan
upp á fjölbreytta dagskrá,
margverðlaunaði Aust-
firðingurinn Prins Póló
kemur fram, Ensími snýr
aftur í sviðsljósið, Lára
Rúnars kemur með sitt
fríða föruneyti, gullbark-
inn Valdimar kemur með samnefnda hljóm-
sveit, rokkararnir í Dimmu mæta og síðast
en ekki síst kemur kóngurinn sjálfur, Bubbi
Morthens, í fyrsta skiptið í Bræðsluna. Ým-
islegt fleira skemmtilegt verður í boði fyrir
gesti, s.s. ljósmyndasýning og ljósmynda-
samkeppni í boði Canon. Síðustu ár hefur
fjölbreytt dagskrá, skipulögð af ýmsum að-
ilum, staðið í heila viku áður en sjálfir
Bræðslutónleikarnir fara fram.
BRÆÐSLAN Á BORGARFIRÐI
TÓNLISTARVEISLA
Prins Póló spilar
á Bræðslunni.
Menning
Guitarama er gítarhátíð þar semBjörn Thoroddsen fær úrvalsgít-arleikara hvaðanæva úr heiminum
til þess að leika með sér kúnstir sínar fyrir
tónlistarunnendur. Hún verður haldin á Ís-
landi í fyrsta sinn í október. Björn, sem
hefur verið einn umsvifamesti djasstónlist-
armaður landsins í ein þrjátíu ár, hefur
gefið út ógrynni platna undir eigin nafni og
í samstarfsverkefnum og hlotið fjölda við-
urkenninga í gegnum tíðina.
Síðastliðin fimmtán ár hefur það færst í
aukana að Björn starfi utan landsteinanna
og fyrir fáeinum árum flutti hann út hug-
mynd sína að Gítarveislu Björns Thor undir
nafninu Guitarama, sem hann sér um
skipulagningu á og stjórnar. Hátíðin hefur
verið haldin í Winnipeg og Edmonton í
Kanada, Denver í Bandaríkjunum og Berg-
en í Noregi. Gestir Björns á Reykjavík Gu-
itarama verða Al Di Meola, sem er einn
virtasti gítarleikari heims í dag, Robben
Ford, Peo Alfonsi og Brynhildur Odds-
dóttir.
Byrjaði sem
Gítarveisla Bjössa Thor
„Þetta byrjaði þannig að þegar ég var bú-
inn að bauka við gítarinn í nokkuð mörg ár
fór ég að halda svona litlar uppákomur sem
ég kallaði Gítarveislu Bjössa Thor, sem
voru alltaf mjög skemmtilegar. Ég hef ver-
ið mikið að spila í útlöndum og það hefur
bara færst í aukana frá árinu 2000. Ég var
þá öðru hvoru að skjóta þessari hugmynd
að fólki úti hvort ekki væri gaman að setja
upp svona gítarhátíð. Ég fór að minnast á
að ég hef verið með svona litlar uppákomur
hérna á Íslandi og hvort það væri ekki
upplagt að gera þetta þarna í Kanada. Ein-
hver sem var bæði réttur maður og þekkti
til mín heyrði af þessu og þannig fór þetta
af stað. Þeir voru reiðubúnir að prófa þetta
og það seldist upp einn, tveir og þrír.
Það var árið 2000 sem ég fór út til Kan-
ada að spila í sambandi við einhvern Ís-
lendingahitting. Ég held ég hafi verið í
fríðu föruneyti, með forsætisráðherra. Þar
kynntist ég fjölda fólks sem ég hef haldið
sambandi við. Ég fer að fara þangað út og
bý mér til eins konar hreiður þarna í
Winnipeg og vinn töluvert mikið út frá
þessum stað. Ætli ég sé ekki búinn að gefa
út um tíu plötur með mér þarna í Kanada.“
Björn segir málin hafa æxlast á þann
veg að hann spili raunar mun meira í Kan-
ada en á Íslandi. Markaðurinn þar sé
stærri, sem hentar honum ágætlega. „Þetta
er ekki beint topp tíu tónlist sem ég hef
staðið fyrir. Bakgrunnur minn er í djass-
inum. Það er kannski ekki stór markaður
fyrir þetta, svona tónlist án söngs, á Ís-
landi. Það segir sig sjálft að það er stærri
markaður í stóru landi. Þetta eru ekki vís-
indi – eða kannski er þetta það?
Svona virkar þetta!
Hins vegar hefur heilmikið breyst frá því
ég byrjaði með þessar uppákomur í Winni-
peg. Það er allt lagt í þetta. Hátíðin er
haldin í stóru leikhúsi og það er alltaf upp-
selt. Þetta er líka orðið að árlegri uppá-
komu. Það er alltaf erfitt að tala stórt um
sjálfan sig“, segir Björn, hógværðin upp-
máluð og tregur til að botna setninguna
„en þetta er komið á „katalóg“ borg-
arinnar.“
„Þetta byrjar í Kanada, svo fer ég til
Denver og held þetta einu sinni þar, sem
gekk mjög vel. Svo hef ég haldið þetta í
Bergen, á listahátíðinni þar, sem heppnaðist
líka vel. Nú síðast var Edmonton að koma
inn í vor og þeir vilja gera þetta að árleg-
um hlut þar.
England var svo að koma inn núna og
það eru um 95% líkur á að það verði að
veruleika. Þá byrjar það í Tenby, litlum bæ
nálægt Bristol. Þangað fór ég að spila um
daginn og skaut fram hugmyndinni. Ég
fékk ferlega flotta blaðaumfjöllun þar og í
framhaldinu var haft samband við mig og
ég spurður hvort ég vildi ekki gera þetta í
Tenby.“
Nú ertu áreiðanlega umfram allt þekktur
sem djassgeggjari. Er dagskráin djass-
miðuð?
„Í upphafi hóaði ég saman djassgítarleik-
urum af því mín rót lá þar. Nú hefur þetta
hins vegar breyst gríðarlega. Nú er djass-
inn í minnihluta og nú eru rokkgítarleik-
arar, blúsgítarleikarar, söngva- og lagaskáld
fyrirferðarmeiri. Fyrst þegar ég byrjaði
með þetta var ekki einu sinni sungið en nú
er það fastur liður.“
Var það meðvituð ákvörðun að auka
breiddina í úrvalinu?
„Þegar þú starfar í Ameríku og Kanada
er ekki um annað að ræða. Þú eltir fólkið.
Það koma menn sem eru að skipuleggja
þetta með mér og segja: „Svona virkar
þetta!“ Ég mótmæli ekki mönnum sem hafa
unnið í þessum bransa í fjölda ára, og þyk-
ist vita betur. Svona er þetta bara. En
samsuðan af fólkinu er orðin ótrúlega
skemmtileg. Mér finnst þetta raunar
skemmtilegra svona.“
Talið berst að því hversu alþjóðlegt fyr-
irbæri Guitarama er og Björn bendir á að
þetta virki á báða bóga. Hann taki líka
með sér Íslendinga á hátíðirnar úti. „Ein-
mitt núna tók ég tvo með mér frá Íslandi
á Edmonton-hátíðina og þeir stóðu sig al-
veg glimrandi vel. Það var hún Brynhildur
Oddsdóttir í Beebee and the bluebirds, sem
verður á Reykjavík Guitarrama. Brynhildur
er blúsari og syngur. Svo fór Jón Hilmar
Kárason með okkur út. Hann er mjög flott-
ur rokkgítarleikari frá Neskaupstað.
Öllum stílum ægir saman á hátíðinni,
bæði spilað á rafmagn og sambandslaust. Í
Winnipeg var t.d. stelpa sem var söngva-
og lagaskáld og á eftir kom metal-maður
með þrjátíu Marshall-magnara. Þetta er
kannski mesti styrkleiki hátíðarinnar. Þú
getur átt von á öllu.“
Með óskalista
Hvernig seturðu upp prógrammið, velurðu
tónlistarmennina sjálfur?
„Fljótlega eftir að ég er búinn að klára
eina sýningu reyni ég að setja þá næstu
saman í huganum. Ég reyni að hafa hana
ólíka því sem fór á undan og set saman
óskalista. Ég er kannski að leita að 3 eða 5
tónlistarmönnum og set þá saman svona tíu
manna lista. Það eru alltaf einhverjir sem
geta ekki komið. Ég þekki orðið mann og
annan, þannig að ég er alltaf að tala við
fólk úti og undirstinga hvort það sé til í
hitt og þetta.
Ég reyni stundum að hafa smá þema.
Einu sinni var til dæmis Bítlaþema í
Winnipeg. En þegar maður er með stór
nöfn, menn sem eru þúsund sinnum fræg-
ari en maður sjálfur, þá verður maður
stundum að hafa sig hægan. Þá orða ég
það kannski þannig að við séum að reyna
að höfða til almennings, spila fyrir fólkið,
að við séum ekki hérna til að nördast.
Hafa þetta aðgengilegt.“
Er þema fyrir Reykjavík Guitarama í ár?
„Það verður svolítið blúsþema. Robben
Ford er mjög frægur blúsmaður og svo má
ekki gleyma Beebee sem er svolítið fyrir
blús. Frábært að geta haft konu með, það
hefur hallað svolítið á þær. Kvengítarleik-
arar hafa stundum gleymst, en ég hef verið
að vinna að því að breyta því. Í Kanada til
dæmis geri ég það að reglu að hafa alltaf
einn kvengítarleikara. Vonandi verður hlut-
fallið jafnt í framtíðinni.“
Blaðamaður spyr í framhaldinu hvort Gu-
itarama sé búið að yfirtaka líf Björns, þetta
sé svo mikið fyrirtæki, út um allt og allan
ársins hring. Björn virðist í fyrstu óviss
hvernig hann eigi að svara en segist alveg
geta lifað eðlilegu lífi. Hann er þó alltaf
með hugann við þetta.
BJÖRN THORODDSEN
Heldur gítarhátíðir
um heim allan
GÍTARVEISLA BJÖSSA THOR HEFUR NUMIÐ LAND Í KANADA, BANDARÍKJUNUM OG NOREGI VIÐ GÓÐAR UNDIR-
TEKTIR UNDIR HEITINU GUITARAMA. BJÖRN HELDUR HÁTÍÐINA Á ÍSLANDI Í HAUST ÞAR SEM EINHVERJAR SKÆR-
USTU GÍTARSTJÖRNUR HEIMS MUNU SPILA MEÐ HONUM Í HÁSKÓLABÍÓI.
Kjartan Már Ómarsson kmo@mbl.is
Félagarnir að snarfingra á Guitarama í Denver á síðasta ári.