Gerðir kirkjuþings - 2010, Page 154

154
4. Biblían og bænin.
5. Að hjálpa öðrum.
6. Helgihald.

Þessi þemu eiga að vera áhersluatriði við samningu á fræðsluefni. Eins og kostur er
skal velja texta um efni sem undirstrika þessi áhersluatriði.
Lögð skal áhersla á að börnin læri ákveðin minnisvers úr Biblíunni. Það sem er lært
utanað á unga aldri býr með börnunum alla ævi. Þess vegna hefur það mikla þýðingu
að kenna börnunum bænir, vers og söngva. Auk þess sem slíkur lærdómur getur
áréttað þann boðskap sem undirstrika á í fræðslunni.
Bænir og bænaiðkun eiga að skipa stóran sess í allri fræðslu barnanna. Vegna ungs
aldurs þeirra er mikilvægt að börnunum séu kennd valin bænavers. Miða skal við að
börnunum séu kennd a.m.k. 4 bænavers á hverjum vetri. Börn sem hafa mætt í þrjá
vetur ættu því að hafa lært 12 bænavers. Börnin skulu einnig læra að signa sig og læra
Faðir vor. Auk þess væri æskilegt að börnin kynntust annarri bænaiðkun, bænum frá
eigin brjósti og hermibænum. Hvetja má börnin til að koma með fyrirbænaefni. Allir
þessir þættir eru mikilvægir liðir í bænauppeldinu.
Reynt skal að velja meðvitað sálma og söngva þannig að þeir undirstriki þemu
fræðslunnar. Vel má velja misserissálm sem börnin læra. Þegar trúarlegir söngvar eru
sungnir skiptir innihaldið máli. Þess vegna er mikilvægt að læra að nota slíka söngva í
réttu samhengi.
Við val á fræðsluefni, textum og verkefnum, skal gæta fyllsta jafnréttis. Fyrirmyndir í
frásögum og verkefnum skulu vera af báðum kynjum.

3.4 Samning fræðsluefnis
Við samningu og útgáfu á fræðsluefni fyrir barnastarfið skal höfð hliðsjón af
eftirfarandi atriðum:
• Efnið verði fjölbreytt og við hæfi ungra barna.
• Gengið verði út frá þrenns konar efni; fyrir yngri og eldri börn og TTT-starf. Í
barnahópum eru börn á ýmsum aldri og þess vegna er nauðsynlegt að geta skipt
hópnum eftir aldri.
• Til umfjöllunar verði sögur og textar úr Biblíunni, bæði Gamla og Nýja
testamentinu. Tengja skal fræðsluna þeim heimi sem börnin lifa og hrærast í.
• Með efninu fylgi góðar kennsluleiðbeiningar fyrir barnafræðarana þar sem bent er
á ýmsa valmöguleika og leiðbeiningar við framsetningu efnisins.
• Þegar nýtt fræðsluefni er samið skal það metið af fræðurum sem notað hafa það í
starfi. Endurbætur og breytingar á fræðsluefninu skulu taka mið af þessu mati.

3.5 Ólíkar aðferðir
Starfsaðferðir skulu taka mið af þörfum og aðstæðum í hverjum söfnuði fyrir sig.
Þegar starfsaðferðir eru valdar skal tekið mið af eftirfarandi:
• Æskilegt er að barnastarfið hafi sinn fasta sess og tíma í starfi safnaðarins hvort
sem um er að ræða sunnudagaskóla eða starf á virkum dögum. Það skapar festu og
öryggi hjá börnunum. Tímasetning og starfstilhögun ræðst af aðstæðum á hverjum
stað.
• Lögð skal áhersla á að börnin sæki guðsþjónustur og séu í sem mestum tengslum
við söfnuðinn. Barnastundir í tengslum við guðsþjónustuna er ein leið, þar sem
börnin fá fræðslu við sitt hæfi þegar kemur að prédikuninni. Hafa skal barnastarfið
í sem nánustum tengslum við hið almenna safnaðarstarf. Reynt sé að ná til sem
flestra skírðra barna í söfnuðinum.