Skírnir - 01.09.2016, Síða 52

tímabundna athygli, en undirliggjandi drifkraftur mikillar mótmælenda -
þátttöku var, líkt og í Búsáhaldabyltingunni, útbreidd óánægja með stöðu
lýðræðis.26
„Jæja-hópurinn“ safnaði einnig yfir 30.000 undirskriftum með
sömu kröfum. Ólafur Ragnar lýsti yfir sérstakri ánægju sinni með
undirskriftasöfnunina og „sagði hana merki um að lýðræðið virki vel
hér á landi. Þá sagði hann ánægjulegt að sjá að ekki þyrfti sterka
stofnun eða samtök til að safna svo mörgum undirskriftum. Með
fjölda undirskrifta sé undirstrikaður sá vilji þjóðarinnar til þess að
Sigmundur fari frá, sem hann mun formlega gera í dag“ („Ólafur
Ragnar fagnaði …“ 2016).
Ekki var orðið við kröfum um afsagnir Bjarna Benediktssonar
fjármálaráðherra og Ólafar Nordal innanríkisráðherra sem bæði
voru nefnd sem eigendur aflandsreikninga í fyrrnefndum sjón-
varpsþætti. Samkvæmt skoðanakönnun vildu tæplega 70% svar-
enda að Bjarni viki en ríflega 60% að Ólöf færi sömu leið („Tæp
70% vilja að Bjarni …“ 2016) . Forystumenn ríkisstjórnarflokkanna
gáfu óljós fyrirheit um þingrof og haustkosningar. Loft var því sem
fyrr lævi blandið þótt nokkurt spennufall yrði við afsögn Sig-
mundar Davíðs.
Þann 18. apríl boðaði Ólafur Ragnar Grímsson til blaðamanna-
fundar á Bessastöðum og gaf út sérstaka yfirlýsingu. Í nýársávarp-
inu 2016 hafði hann sagt að hans væri ekki lengur þörf á forsetastóli
því að sátt og stöðugleiki væri í landinu. En nú kvað við annan
tón:
Í þessu umróti óvissu og mótmæla og í kjölfar nýliðinna atburða hefur
fjöldi fólks víða úr þjóðfélaginu á undanförnum vikum höfðað til skyldu
minnar, reynslu og ábyrgðar og beðið mig að endurskoða ákvörðunina sem
ég tilkynnti í nýársávarpinu, hvatt til þess að ég gefi á ný kost á mér til emb-
ættis forseta Íslands, standi áfram vaktina með fólkinu í landinu. Hefur þá
iðulega verið vísað til þess að eftir alþingiskosningar geti myndun nýrrar
ríkisstjórnar verið erfið og flókin og sambúð þings og þjóðar áfram þrungin
spennu. (Dagskrá forseta 2016, 19. apríl)
288 svanur kristjánsson skírnir
26 Jón Gunnar Bernburg 2016b. Ítarlega og sannfærandi greiningu á mótmælum
Búsáhaldabyltingarinnar er að finna í bók Jóns Gunnars Bernburg (2016a).