Saga - 2008, Page 6

Að þessu sinni birtast fimm viðhorfsgreinar í Sögu, sumar reyndar
stuttar. Fyrst ber að geta þess að hér viðra þeir Gunnar Karlsson og Helgi
Þorláksson pælingar sínar um stofnun klausturs á Þingeyrum. Gunnar
ræðir um ýmis álitamál varðandi tímasetningu á stofnuninni og Helgi
fjallar um það hvernig staðið var að stofnun klaustursins. Þá bregst Lára
Magnúsardóttir við andmælum þeirra Haka Antonssonar og Orra
Vésteinssonar, sem birt voru í síðasta hefti Sögu. Síðan gagnrýna þeir Helgi
Þorláksson og Orri Vésteinsson ákveðna þætti í skrifum Steinunnar
Kristjánsdóttur um landnámssýninguna í Aðalstræti. Þá má nefna að
Kristjana Kristinsdóttir ritar hugleiðingu um skjalfræði og skjalasöfn. Hún
bendir meðal annars á mikilvægi þess að þeir sem koma að skjalastýringu
og skjalavörslu fái sagnfræðilega þjálfun. Jafnframt kynnir hún þá
framtíðarsýn sína að skjalfræðin, sem fram að þessu hefur verið kennd
innan vébanda sagnfræðinnar við Háskóla Íslands, verði að sjálfstæðri
kennslugrein.
Skjalaskápurinn er helgaður spænsku veikinni og dregur Bragi Þor-
grímur Ólafsson fram fróðlegar heimildir úr kistum handritadeildar Lands-
bókasafns. Þessi bálkur hóf innreið sína í síðasta hefti og er þetta í annað
skiptið sem handritadeildin annast um „skápinn“. Vonir ritstjórnar standa
til þess að eiga samstarf við fleiri skjalasöfn í framtíðinni og þá að
sjálfsögðu vítt og breitt um landið. Að venju er í Sögu að finna fjölmarga
ritdóma og ritfregnir. Og síðast en ekki síst ber að geta þess að þetta hefti
hefst á viðtali Rósu Magnúsdóttur við Thorsten Borring Olesen um rann-
sóknir á kalda stríðinu og áhrif þeirra á samtímastjórnmál í Danmörku.
Thorsten stendur framarlega í þessum rannsóknum og því er fengur í því
að kynnast viðhorfum hans og sjá hvað getur gerst þegar stjórnmálamenn
fara að reyna að stýra rannsóknum fræðimanna.
Fyrir utan höfundana hafa fjölmargir lagt hönd á plóginn við vinnslu
þessa heftis, allt frá nafnlausum ritrýnum til grafískra hönnuða og um-
brotsmanna, og færum við þeim öllum bestu þakkir fyrir árangursríka
samvinnu.
Eggert Þór Bernharðsson og Páll Björnsson
6 formáli ritstjóra
Saga haust 2008 nota:Saga haust 2004 - NOTA 5/15/08 11:17 AM Page 6